Marcos 3

Ang Tawo nga may Naitus nga Kamot

(Mat. 12:9-14; Luc. 6:6-11)

1Dayon nagbalik si Jesus sa sinagoga sa diin may tawo nga may naitus nga kamot. 2May mga tawo didto nga nagabantay kay Jesus kon ayuhon niya ang tawo sa Adlaw nga Inugpahuway, agod may isumbong sila batok sa iya. 3Si Jesus nagsiling sa tawo nga naitus ang kamot, “Magpalapit ka diri sa atubangan.” 4Dayon nagpamangkot sia sa mga tawo: “Ano ang ginatugot sang aton Kasugoan nga himuon ta sa Adlaw nga Inugpahuway? Ang magbulig bala ukon ang maghalit? Ang magluwas bala sang kabuhi sang isa ka tawo ukon ang magpatay?”

Pero naghipos sila. 5Gintulok ni Jesus nga may kaakig ang mga tawo nga nagalibot sa iya, pero nagkasubo sia tungod sang katig-a sang ila tagipusoon. Dayon nagsiling sia sa tawo nga naitus ang kamot, “Untaya ang imo kamot.” Gin-untay niya kag nag-ayo ini. 6Gani ang mga Fariseo naggwa sa sinagoga kag sa gilayon nagplano kaupod sa mga sumolunod ni Herodes kon paano mapatay nila si Jesus.

Madamo nga mga Tawo sa Higad sang Linaw

7Si Jesus kag ang iya mga gintuton-an nagkadto sa Linaw sang Galilea, kag ginsunod sia sang madamo nga mga tawo. Ini sila halin sa Galilea, sa Judea, 8sa Jerusalem, sa kadutaan sang Idumea, sa kadutaan sa tabok sang Jordan kag sa palibot sang mga siudad sang Tiro kag Sidon. Ini nga mga tawo nagkadto kay Jesus, kay nakabati sila sang mga butang nga iya ginapanghimo. 9Tungod#Mar. 4:1; Luc. 5:1-3. sang tama kadamo nga mga tawo, si Jesus nagsugo sa iya mga gintuton-an sa pag-aman sang sakayan para sa iya, agod indi sia maipit sang mga tawo. 10Madamo nga mga tawo ang iya gin-ayo, kag tungod sini ang tanan nga may balatian nagpanagil-ot sa pagpalapit kay Jesus, agod makatandog sa iya. 11Kag kon makita sia sang mga tawo nga may malaut nga mga espiritu, nagahapa sila sa atubang niya kag nagasinggit, “Ikaw ang Anak sang Dios!”

12Ginpaandaman gid ni Jesus ang malaut nga mga espiritu nga indi magpanugid kon sin-o sia.

Nagpili si Jesus sang Dose ka mga Apostoles

(Mat. 10:1-4; Luc. 6:12-16)

13Dayon si Jesus nagtaklad sa isa ka bakulod kag gintawag niya ang mga tawo nga iya luyag updon. Nagpalapit sila sa iya, 14kag nagpili sia sang dose nga gintawag niya nga mga apostoles. Si Jesus nagsiling sa ila, “Ginpili ko kamo nga mag-upod sa akon. Ipadala ko man kamo sa pagwali, 15kag magaangkon kamo sang gahom sa pagtabog sang mga demonyo.”

16Ang dose nga ginpili ni Jesus amo ang masunod: si Simon nga ginhingalanan niya kay Pedro, 17si Santiago kag si Juan nga mga anak ni Zebedeo nga ginhingalanan niya nga Boanerges, nga kon sayuron “Mga Anak sang Daguob”, 18si Andres, si Felipe, si Bartolome, si Mateo, si Tomas, si Santiago nga anak ni Alfeo, si Tadeo, si Simon nga Makipungsodnon 19kag si Judas Iscariote nga sang ulihi nagluib sa iya.

Si Jesus kag si Beelzebul

(Mat. 12:22-32; Luc. 11:14-23; 12:10)

20Dayon si Jesus nagpauli. Sa liwat nagtilipon sa palibot niya ang madamo nga mga tawo sa bagay nga sia kag ang iya mga gintuton-an wala na sing tion sa pagkaon. 21Sang mabatian ini sang iya pamilya, naglakat sila sa pagkuha sa iya, tungod kay ang mga tawo nagsiling, “Nagbuang sia!”

22May#Mat. 9:34; 10:25. mga manunodlo sang Kasugoan nga nag-abot gikan sa Jerusalem nga nagsiling, “Yara sa iya si Beelzebul! Ang pangulo sang mga demonyo amo ang naghatag sa iya sing gahom sa pagtabog sa ila.”

23Gani gintawag ni Jesus ang mga tawo sa pagpalapit sa iya kag naghambal sia sa ila sing pila ka mga palaanggiran, “Ano bala ang pagtabog ni Satanas kay Satanas? 24Kon ang isa ka pungsod magbinahinbahin sa iya kaugalingon kag mag-ilinaway ang isa batok sa isa, ina nga pungsod magabuloblag. 25Kon ang isa ka panimalay magbinahinbahin sa iya kaugalingon kag mag-ilinaway ang isa batok sa isa, ina nga panimalay magabuloblag. 26Gani, kon ang ginharian ni Satanas mag-ilinaway batok sa iya kaugalingon kag magbinahinbahin, ina nga ginharian indi magdugay, kundi magabuloblag, kag amo ini ang iya katapusan.

27“Wala sing bisan sin-o nga makasulod sa balay sang isa ka tawo nga makusog sa pagkuha sang iya mga pagkabutang, luas kon iya anay gapuson ang tawo nga makusog. Kon mahimo na niya ini sarang na sia makapanguha sa amo nga balay.

28“Dumdoma ninyo ini! Ang mga tawo sarang mapatawad sang tanan nila nga mga sala kag sang tanan nga mga malaut nga ila ginahambal,#3:28 malaut nga ila ginahambal: ukonmalaut nga ila ginahambal batok sa Dios. 29pero#Luc. 12:10. ang bisan sin-o nga nagahambal sing malain batok sa Espiritu Santo, indi gid mapatawad, kay sia nakahimo sing sala nga wala sing kapatawaran.” 30Ginhambal ini ni Jesus, kay may iban nga nagsiling, “May malaut nga espiritu sa iya.”

Ang Iloy kag mga Utod ni Jesus

(Mat. 12:46-50; Luc. 8:19-21)

31Dayon ang iloy kag ang mga utod ni Jesus nag-abot. Nagtindog sila sa gwa sang balay kag nagpahibalo nga gusto sila magpakigkita kay Jesus. 32May madamo nga mga tawo nga nagapungko sa palibot ni Jesus, kag nagsiling sila sa iya, “Ang iloy mo kag ang imo mga utod yara sa gwa, kag gusto sila magpakigkita sa imo.”

33Nagsabat si Jesus, “Sin-o bala ang akon iloy? Sin-o bala ang akon mga utod?” 34Gintulok niya ang mga tawo nga nagapungko sa palibot niya, kag nagsiling, “Tan-awa ninyo, yari ang akon iloy kag mga utod! 35Kay ang bisan sin-o nga nagabuhat sang kabubot-on sang Dios, amo ang akon utod nga lalaki, ang akon utod nga babayi, kag ang akon iloy.”

Currently Selected:

Marcos 3: MBBHIL12

Highlight

Copy