Marcos 13

Naghambal si Jesus Nahanungod sang Pagguba sang Templo

(Mat. 24:1-2; Luc. 21:5-6)

1Sang nagagwa si Jesus sa Templo nagsiling ang isa sang iya mga gintuton-an, “Manunodlo, tan-awa bala! Sa pagkatahom sining mga bato kag sa pagkadalagku nga mga balay!”

2Si Jesus nagsabat, “Nakita mo ining dalagku nga mga balay? Wala sing bisan isa ka bato nga mabilin nga nagatungtong pa sa ibabaw sang isa ka bato kay ang tanan pagagub-on.”

Mga Kagamo kag mga Paghingabot

(Mat. 24:3-14; Luc. 21:7-19)

3Samtang nagapungko si Jesus sa Bukid sang mga Olivo nga nagaatubang sa Templo, nagpalapit sa iya sanday Pedro, Santiago, Juan kag Andres kag nagpamangkot sa iya nga silahanon lang, 4“Sugiri kami kon san-o ini mahanabo kag sugiri man kami sang mga tanda nga madali na lang ini tanan nga mga butang mahanabo.”

5Si Jesus nagsiling sa ila, “Mag-andam kamo nga wala sing may makapatalang sa inyo. 6Madamo ang magaabot sa akon ngalan kag magasiling, ‘Ako ang Cristo!’ kag sila magapatalang sang madamo nga mga tawo. 7Kag indi kamo magpakulba kon mabatian ninyo ang linupok sang mga inaway sa malapit kag ang balita sang mga gira sa malayo nga lugar. Kay ini nga mga butang kinahanglan matabo, pero wala ini nagakahulogan nga ang katapusan nag-abot na. 8Ang mga pungsod magailinaway kag ang mga ginharian magasumponganay. May mga linog kag gutom sa nagakalainlain nga mga lugar. Ini nga mga butang manginkaangay sang nahauna nga pagpasakit sang manugbata.

9“Kamo#Mat. 10:17-20; Luc. 12:11-12. inyo dapat mag-andam, kay ipadakop kamo sang mga tawo kag ipadala sa hukmanan. Pagabunalon kamo sa mga sinagoga. Magatindog kamo sa atubang sang mga pangulo kag sang mga hari tungod sa akon sa pagsugid sa ila sang Maayong Balita. 10Ang Maayong Balita kinahanglan iwali anay sa tanan nga mga tawo dayon ang katapusan magaabot. 11Kag kon dakpon kamo kag dalhon sa hukmanan, indi kamo magpalibog kon ano ang inyo ihambal sa wala pa ang tion. Kon mag-abot na ina nga tion ihambal lang ninyo ang ginahatag sang Dios sa inyo. Kay ang mga pulong nga inyo igahambal indi inyo, kundi magahalin sa Espiritu Santo. 12May mga tawo nga magatugyan sang ila kaugalingon nga mga utod agod pagapatyon, kag amo man ini ang himuon sang mga amay sa ila mga anak. Ang mga anak magabato kag magapapatay sang ila mga ginikanan. 13Ang#Mat. 10:22. tanan magadumot sa inyo tungod sa akon, pero ang bisan sin-o nga nagapadayon tubtob sa katapusan maluwas.

Ang Makakulogmat nga Kangil-aran

(Mat. 24:15-28; Luc. 21:20-24)

14“Makita#Dan. 9:27; 11:31; 12:11; 1 Mac. 1:54; 6:7. ninyo ‘Ang Makakulogmat nga Kangil-aran’ nga ginpatindog sa lugar nga indi dapat niya luntaran.” (Sa bumalasa: hangpa ang kahulogan sini!), “Sa sadto nga tion ang yara sa Judea kinahanglan magpalagyo sa kabukiran. 15Ang#Luc. 17:31. tawo nga yara sa atop sang iya balay dapat nga indi na mag-usik sang tion sa pagpanaog kag pagsulod sa iya balay sa pagkuha sang iya dalal-on. 16Ang tawo nga yara sa uma dapat nga indi na magpauli sa pagkuha sang iya kunop. 17Sa sadto nga mga adlaw daw ano ka makaluluoy ang mga babayi nga nagabusong kag ang mga iloy nga may lapsag nga ginapasuso! 18Magpangamuyo kamo sa Dios nga ini nga mga butang indi mahanabo sa tion sang tigtulognaw! 19Kay#Dan. 12:1; Bug. 7:14. ang kalalat-an sadto nga mga adlaw indi matupongan halin sang pagtuga sang Dios sang kalibutan tubtob karon. Kag wala na gid sing manginkaangay pa sini liwat. 20Pero ginpalip-ot sang Ginoo ang kalawigon sadtong mga adlaw, kay kon wala niya paghimua ini, wala sing may mabilin nga buhi. Pero tungod sang iya pinili nga mga katawhan, ginpalip-ot niya yadtong mga adlaw.

21“Gani indi kamo magpati kon may magsiling sa inyo, ‘Tan-awa bala, yari ang Cristo!’ ukon ‘Lantawa bala, adto sia didto!’ 22Kay magatuhaw ang indi matuod nga mga Cristo kag ang indi matuod nga mga propeta. Magahimo sila sing mga talandaan kag mga kalatingalahan sa tuyo nga ila mapatalang, kon sarang pa lang nila mahimo, bisan pa ang pinili nga mga katawhan sang Dios. 23Pero kamo inyo magbantay! Nasugid ko na sa inyo ang tanan, sa wala pa mahanabo ini nga mga butang.

Ang Pag-abot sang Anak sang Tawo

(Mat. 24:29-31; Luc. 21:25-28)

24“Sa#Isa. 13:10; Joel 2:10, 31; 3:15; Bug. 6:12; Isa. 13:10; Ezeq. 32:7. sadtong mga adlaw, sa tapos sining kalalat-an, ang adlaw magadulom kag ang bulan indi na magsanag, 25ang#Isa. 34:4; Bug. 6:13; Joel 2:10. mga bituon magakalahulog gikan sa langit, kag ang mga gahom sa kahawaan pagapatalangon sa ila kinaandan nga alagyan. 26Dayon#Dan. 7:13; Bug. 1:7. makita ang Anak sang Tawo nga nagapadulong nga yara sa mga panganod, nga may daku nga gahom kag himaya. 27Magapadala sia sang mga anghel sa apat ka pamusod sang duta sa pagtipon sang pinili nga mga katawhan sang Dios gikan sa tanan nga mga lugar sang kalibutan.

Ang Leksyon Nahanungod sa Kahoy nga Higera

(Mat. 24:32-35; Luc. 21:29-33)

28“Magtuon kamo sing leksyon sa kahoy nga higera. Kon ang iya mga sanga magpanglumbay na, inyo mahibaluan nga malapit na ang tingadlaw. 29Sa amo man nga bagay, kon makita ninyo nga nagakahanabo na ini nga mga butang, inyo mahibaluan nga malapit na sia, kag madali na lang mag-abot.#13:29 malapit na sia, kag madali na lang mag-abot: ukonang tion malapit na, handa na sa pagsugod. 30Dumdoma ninyo ini! Mahanabo ini tanan nga mga butang sa wala pa magkalamatay ang mga tawo nga buhi pa subong. 31Ang langit kag ang duta magataliwan, pero ang akon mga pulong indi gid magtaliwan.

Wala sing may Nakahibalo sang Adlaw ukon Oras

(Mat. 24:36-44)

32“Pero#Mat. 24:36. wala sing may nakahibalo kon san-o ina nga adlaw ukon oras magaabot, bisan pa ang mga anghel sa langit, ukon ang Anak, kundi ang Amay gid lamang. 33Magbantay kag magpangaman kamo, kay wala ninyo mahibaloi kon san-o yadto nga tion magaabot. 34Manginkaangay#Luc. 12:36-38. ini sang isa ka tawo nga nagpanglakaton sa malayo. Sa wala pa sia makahalin, gintugyan niya sa iya mga suloguon ang pag-atipan sang iya balay, ang tagsatagsa may iya nga kaugalingon nga hilikuton. Kag nagsugo sia sa manugbantay sang pwertahan sa pagbantay. 35Gani magbantay kamo kay wala kamo makahibalo kon san-o mabalik ang agalon sang puloy-an, basi sa kahapunanon, ukon sa tungang gab-i, sa kaagahon ukon sa pagbutlak sang adlaw. 36Kon mag-abot sia sing hinali, kinahanglan nga indi niya kamo maabtan nga nagakatulog. 37Ang ginasiling ko sa inyo ginasiling ko sa tanan: Magbantay kamo!”

Currently Selected:

Marcos 13: MBBHIL12

Highlight

Copy