Marcos 11
11
Ang Madinalag-on nga Pagsulod ni Jesus sa Jerusalem
(Mat. 21:1-11; Luc. 19:28-40; Juan 12:12-19)
1Sang nagahilapit na sila sa Jerusalem, sa mga banwa sang Betfage kag Betania nakaabot sila sa Bukid sang mga Olivo. Ginpauna ni Jesus ang duha niya ka mga gintuton-an 2kag ginsingganan sila: “Kadto kamo didto sa barangay nga yara sa unhan ninyo. Sa inyo gid pagsulod, inyo makita ang isa ka tinday sang asno nga nahigot kag wala pa gid masakyi. Hubari ninyo kag dal-a diri. 3Kag kon may magpamangkot sa inyo, ‘Ngaa inyo ginahimo ini?’ singgana sia, ‘Ang Ginoo#11:3 Ang Ginoo: ukonAng tag-iya sini. nagakinahanglan sini kag iuli man niya gilayon.’”
4Gani naglakat sila nga duha, kag ila nakita sa dalan ang isa ka tinday sang asno nga nahigot sa pwertahan sang isa ka balay. Samtang ila ini ginahubaran, 5may mga nagatalan-aw nga nagpamangkot sa ila, “Ano ang inyo ginahimo? Ngaa ginahubaran ninyo ang tinday sang asno?”
6Nagsabat sila suno sa ginsiling ni Jesus sa ila, kag ginpabay-an sila sang mga tawo. 7Gindala nila ang tinday sang asno kay Jesus, ila ginhampiluan sang ila mga kunop, kag ginsakyan ini ni Jesus. 8Madamo nga mga tawo ang naghumlad sang ila mga kunop sa dalan kag ang iban nagladlad sang mga sanga nga ila ginpanapas sa mga kahoy sa kaumhan. 9Ang#Sal. 118:25-26. mga nagauna kag nagasunod sa iya nagsilinggit, “Dayawon ang Dios! Dayawon ang nagaabot sa ngalan sang Ginoo! 10Dayawon ang palaabuton nga ginharian sang isa sang aton mga katigulangan nga si Haring David! Dayawon ang Dios sa kahitaasan!”
11Nagkadto si Jesus sa Jerusalem, nagsulod sia sa Templo kag nagpanan-awtan-aw sang tanan. Tungod kay madali na lang magtunod ang adlaw, naglakat sia upod sa dose ka mga apostoles pakadto sa Betania.
Ginpakamalaut ni Jesus ang Kahoy nga Higera
(Mat. 21:18-19)
12Pagkaaga, sang nagbalik sila gikan sa Betania ginutom si Jesus. 13Nakita niya sa unhan ang isa ka madabong nga kahoy nga higera, gani nagkadto sia sa pagtan-aw kon may makuha sia nga bunga. Sang didto na sia, wala sia sing may nakita nga bunga, kundi mga dahon lamang, tungod kay indi pa yadto tigbulunga sang kahoy nga higera. 14Si Jesus nagsiling sa kahoy nga higera, “Halin karon wala na gid sing may makakaon liwat sang imo bunga!”
Kag ang iya mga gintuton-an nakabati sini.
Si Jesus Nagkadto sa Templo
(Mat. 21:12-17; Luc. 19:45-48; Juan 2:13-22)
15Sang pag-abot nila sa Jerusalem, si Jesus nagsulod sa Templo kag nagsugod sa pagpanabog sang tanan nga mga nagapamaligya kag nagapamakal didto. Ginpamaliskad niya ang mga lamisa sang mga manugbaylo sang kwarta kag ang mga pulongkuan sang mga nagapamaligya sang mga pating, 16kag iya gindumili sa tanan ang paglaktod sa Templo nga nagadala sang bisan ano nga butang. 17Dayon#Isa. 56:7; Jer. 7:11. nagpanudlo sia sa mga tawo nga nagasiling: “Nasulat na sa mga Kasulatan, ‘Ang akon Templo pagatawgon nga balay nga palangamuyoan para sa mga tawo sang tanan nga mga pungsod.’ Pero inyo ini ginhimo nga isa ka palanaguan sang mga makawat!”
18Ang pangulo nga mga pari kag ang mga manunodlo sang Kasugoan nakabati sini. Gani, nagpangita sila sing mga pahito sa pagpatay kay Jesus. Ugaling nahadlok sila sa iya, tungod kay ang tanan nga mga tawo natingala sa iya pagtulon-an.
19Sang madali na lang magtunod ang adlaw, si Jesus kag ang iya mga gintuton-an naggwa sa siudad.
Ang Leksyon gikan sa Kahoy nga Higera
(Mat. 21:20-22)
20Aga pa gid sa madason nga adlaw, sang pag-agi nila liwat sa dalan, nakita nila nga ang kahoy nga higera nalaya tubtob sa iya mga gamot. 21Nadumdoman ni Pedro ang nahanabo, gani nagsiling sia kay Jesus, “Manunodlo, tan-awa! Ang kahoy nga higera nga imo ginpakamalaut nalaya!”
22Si Jesus nagsabat sa ila, “Magtuo kamo sa Dios. 23Dumdoma#Mat. 17:20; 1 Cor. 13:2. ninyo ini! Ang bisan sin-o nga magsiling sa sining bukid, ‘Halin ka diri kag maglukso sa dagat,’ kag wala sia nagaduhaduha sa iya tagipusoon, kundi nagatuo nga ang iya ginasiling mahanabo, matuman ina sa iya. 24Gani nagasiling ako sa inyo: Ang bisan ano nga inyo ginapangayo sa pangamuyo, magtuo kamo nga inyo na ina nabaton, kag ini tanan ihatag gid sa inyo. 25Kag#Mat. 6:14-15. kon kamo nagatindog nga nagapangamuyo, patawara ninyo ang mga nakasayop sa inyo, agod nga ang inyo Amay sa langit magpatawad man sang inyo mga sala.#11:25 Ang iban nga mga manuskrito nagadugang sang bersikulo 26: Kon wala kamo nagapatawad sa iban, indi man kamo pagpatawaron sang inyo Amay nga yara sa langit (tan-awa ang Mat. 6:15).
Ang Pamangkot Nahanungod sa Awtoridad ni Jesus
(Mat. 21:23-27; Luc. 20:1-8)
27Nagbalik sila liwat sa Jerusalem. Sang nagalakat si Jesus sa sulod sang Templo, ang pangulo nga mga pari kag ang mga manunodlo sang Kasugoan kag ang mga katigulangan sang mga Judio nagpalapit sa iya 28kag nagpamangkot, “Ano bala ang imo awtoridad sa paghimo sining mga butang, ukon sin-o ang naghatag sa imo sang awtoridad sa paghimo sini?”
29Si Jesus nagsabat sa ila, “Mamangkot ako sa inyo sing isa lang. Sabta anay ninyo ako kag ako man magasugid sa inyo kon sa kay sin-o awtoridad ginahimo ko ining mga butang. 30Kay sin-o bala nagikan ang awtoridad ni Juan sa pagbautiso: sa Dios ukon sa tawo? Sugiri ninyo ako!”
31Kag nagbinaisay sila, “Ano ang aton isiling? Kon magsiling kita, ‘Gikan sa Dios,’ masiling sia, ‘Ti, ngaa wala kamo magpati kay Juan?’ 32Pero kon kita magsiling, ‘Gikan sa tawo…’” Bangod nahadlok sila sa mga tawo, kay ang tanan nagakabig kay Juan nga isa ka matuod nga propeta. 33Gani, nagsabat sila kay Jesus, “Wala kami makahibalo.”
Kag si Jesus nagsiling sa ila, “Indi ko man kamo pagsugiran kon sa kay sin-o awtoridad ginahimo ko ini nga mga butang.”
Currently Selected:
Marcos 11: MBBHIL12
Highlight
Share
Copy
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
