Lucas 17
17
Ang Sala
(Mat. 18:6-7, 21-22; Mar. 9:42)
1Si Jesus nagsiling sa iya mga gintuton-an, “Indi malikawan ang mga kabangdanan nga ang mga tawo magapakasala, pero daw ano ka makaluluoy man sa iya nga manginkabangdanan sang pagpakasala sang mga tawo. 2Mas maayo pa sa sina nga tawo nga ihigot ang galingan nga bato sa iya liog kag lumsan sia sa madalom nga dagat sang sa manginkabangdanan sia sang pagpakasala sang isa sining mga katawhan nga nagasalig sa akon kaangay sang mga kabataan. 3Gani#Mat. 18:15. mag-andam kamo!
“Kon ang imo utod makasala, sawaya sia, kag kon maghinulsol sia, patawara sia. 4Kon makasala sia sa imo sing makapito sa isa ka adlaw, kag sa tagsa ka pagpakasala niya nagakadto sia sa imo kag nagasiling, ‘Nagahinulsol ako,’ dapat nga patawaron mo sia.”
Ang Pagtuo
5Ang mga apostoles nagsiling sa Ginoo, “Dugangi ang amon pagtuo.”
6Ang Ginoo nagsabat, “Kon may pagtuo kamo pareho ka daku sang binhi sang mustasa makasiling kamo sa sining kahoy nga sikomoro, ‘Gabuta ang imo mga gamot kag itanom ang imo kaugalingon sa dagat!’ kag magatuman ini sa inyo.
Ang Katungdanan sang Suloguon
7“Abi ang isa sa inyo may suloguon nga nagaarado ukon nagabantay sang mga karnero. Kon magpauli sia halin sa uma, nagasiling bala kamo sa iya, ‘Dali, kaon na’? 8Wala gid kamo nagasiling sini. Sa baylo, nagasiling kamo sa iya, ‘Ihanda ang akon panihapon, mag-ilis ka kag magsirbe sa akon samtang nagakaon kag nagainom ako. Magkaon kag mag-inom ka ugaling kon tapos na ako.’ 9Ginapasalamatan bala ang suloguon tungod kay ginahimo niya ang ginsugo sa iya? 10Subong man ini sa inyo, sa tapos ninyo mahimo ang tanan nga ginsugo sa inyo, magsiling kamo, ‘Mga suloguon man lang kami. Ginhimo lamang namon ang amon katungdanan.’”
Gin-ayo ni Jesus ang Napulo ka mga Aruon
11Sang nagapakadto si Jesus sa Jerusalem nag-agi sia sa dulonan sang Samaria kag Galilea. 12Sang nagapasulod sia sa isa ka barangay ginsugata sia sang napulo ka mga aruon, nga nagtindog sa unhan 13kag nagsinggit, “Jesus nga manunodlo, kaluoyi kami!”
14Nakita#Lev. 14:1-32. sila ni Jesus kag nagsiling sia sa ila, “Lakat kamo kag ipatan-aw ang inyo kaugalingon sa mga pari.”
Sang nagalakat sila nag-ayo sila. 15Ang isa sa ila, sang makita niya nga nag-ayo na sia, nagbalik nga nagadayaw sa Dios sa mabaskog nga tingog. 16Nagluhod sia sa tiilan ni Jesus kag nagpasalamat sa iya. Yadto nga tawo taga-Samaria. 17Si Jesus nagsiling, “Indi bala napulo ka tawo ang gintinluan? Diin na ang siyam? 18Ngaa ining dumoluong lang ang nagbalik sa pagpasalamat sa Dios?” 19Dayon si Jesus nagsiling sa iya, “Tindog ka kag maglakat. Ang imo pagtuo nag-ayo sa imo.”
Ang Pag-abot sang Ginharian
(Mat. 24:23-28, 37-41)
20May mga Fariseo nga nagpamangkot kay Jesus kon san-o magaabot ang paghari sang Dios. Nagsabat sia sa ila, “Ang paghari sang Dios indi magaabot nga may mga tanda nga makita. 21Wala sing makasiling, ‘Tan-awa ninyo, yari diri!’ ukon ‘Yadto didto!’ tungod kay ang paghari sang Dios yara sa inyo.”#17:21 yara sa inyo: ukonupod sa inyo, ukonsa hinali magapakita sa inyo.
22Dayon nagsiling sia sa mga gintuton-an, “Magaabot ang mga inadlaw nga magahandom kamo sa pagtan-aw sang isa sang mga inadlaw sang Anak sang Tawo, pero indi ninyo ini makita. 23May magasiling sa inyo, ‘Tan-awa, yadto didto!’ ukon, ‘Tan-awa, yari diri!’ Pero indi kamo magkadto sa pagpangita sini. 24Subong nga ang kilat nagaidlab kag nagapasanag sang langit halin sa pihak tubtob sa pihak, mangin-amo man ang pag-abot sang Anak sang Tawo. 25Ugaling dapat sia anay mag-antos sing tuman kag pagasikwayon sang mga tawo sa sini nga mga inadlaw. 26Subong#Gen. 6:5-8. sang natabo sa panahon ni Noe, mangin-amo man ang matabo sa mga inadlaw sang Anak sang Tawo. 27Ang#Gen. 7:6-24. tanan nagkalaon kag nag-ininom, ang mga lalaki nagpalangasawa kag ang mga babayi nagpalamana, tubtob sa adlaw nga si Noe nagsulod sa arka kag ang anaw nag-abot kag naglumos sa ila tanan. 28Amo#Gen. 18:20–19:25. man ang natabo sa mga inadlaw ni Lot. Nagkalaon kag nag-ininom sila, nagpamakal kag nagpamaligya sila, nagpananom sila kag nagpatindog sang mga balay. 29Pero sa adlaw nga si Lot nakagwa sa Sodoma, nag-ulan sing kalayo kag asupre halin sa langit kag nagkalamatay didto ang tanan nga mga tawo. 30Manginkaangay man sini sa adlaw nga ipahayag ang Anak sang Tawo.
31“Sa#Mat. 24:17-18; Mar. 13:15-16. sadto nga adlaw ang tawo nga yara sa atop sang iya balay indi na magpanaog sa pagkuha sang iya mga pagkabutang nga yara sa sulod sang balay. Sa amo man nga bagay, ang tawo nga yara sa uma indi na magpauli. 32Dumdoma#Gen. 19:26. ninyo ang natabo sa asawa ni Lot. 33Ang#Mat. 10:39; 16:25; Mar. 8:35; Luc. 9:24; Juan 12:25. bisan sin-o nga nagatinguha sa pagluwas sang iya kabuhi madula niya ini, kag ang bisan sin-o nga nagadula sang iya kabuhi maluwas niya ini. 34Nagasiling ako sa inyo, sa sina nga gab-i may duha ka tawo nga magatulog sa isa ka higdaan: ang isa kuhaon kag ang isa ibilin. 35May duha ka babayi nga nagagaling, ang isa kuhaon kag ang isa ibilin.#17:35 Ang iban nga mga manuskrito nagadugang sang bersikulo 36: May duha ka tawo nga nagaobra sa uma: ang isa kuhaon kag ang isa ibilin (tan-awa ang Mat. 24:40).
37Ang mga gintuton-an nagpamangkot sa iya, “Sa diin bala ini mahanabo Ginoo?”
Si Jesus nagsabat, “Kon diin may lawas nga patay, didto man magatipon ang mga uwak.”
Currently Selected:
Lucas 17: MBBHIL12
Highlight
Share
Copy
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
