Juan 20

Ang Lulobngan nga Wala na sing Sulod

(Mat. 28:1-8; Mar. 16:1-8; Luc. 24:1-12)

1Aga pa gid sang Domingo nga adlaw samtang madulomdulom pa, si Maria Magdalena nagkadto sa lulobngan, kag nakita niya nga wala na ang bato sa pwertahan sang lulobngan. 2Gani nagdalagan sia kag nagkadto kay Simon Pedro kag sa isa ka gintuton-an nga hinigugma ni Jesus, kag ginsugiran sila, “Ginkuha nila ang Ginoo sa lulobngan, kag wala kami makahibalo kon diin nila sia ginbutang!”

3Dayon si Pedro upod yadtong isa ka gintuton-an nagkadto sa lulobngan. 4Nagdalagan sila nga duha, pero yadtong isa ka gintuton-an mas madasig sang sa kay Pedro kag nakauna sia abot sa lulobngan. 5Nagduko sia sa pagsid-ing kag nakita niya ang tela nga lino, pero wala sia magsulod. 6Si Simon Pedro nga nagasunod sa iya, nag-abot man, kag nagsulod sia dayon sa lulobngan. Nakita niya ang tela nga lino nga nahamtang didto, 7kag ang tela nga ginsambod sa ulo ni Jesus. Wala ini nahamtang upod sa mga tela nga lino, kundi nabalulon ini sang pahain. 8Dayon yadtong gintuton-an nga una nag-abot sa lulobngan nagsulod man. Nakita niya ini kag nagtuo sia. (9Wala pa sila makahangop sang kasulatan nga nagsiling nga kinahanglan mabanhaw sia.) 10Dayon ang mga gintuton-an nagbalik sa diin sila nagaestar.

Si Jesus Nagpakita kay Maria Magdalena

(Mat. 28:9-10; Mar. 16:9-11)

11Si Maria nagtindog nga nagahilibion sa gwa sang lulobngan. Samtang nagahibi pa sia, nagduko sia sa pagsid-ing sa lulobngan, 12kag nakita niya ang duha ka mga anghel didto nga nagabayo sing puti. Nagapungko sila sa lugar nga ginhamyangan sang bangkay ni Jesus. Ang isa sa ulohan kag ang isa sa tiilan. 13Ginpamangkot nila sia, “Babayi, ngaa bala nagahibi ka?”

Nagsabat sia, “Ginkuha nila ang akon Ginoo kag wala ako makahibalo kon diin nila sia ginbutang!”

14Sang makasiling sia sini, nagliso sia kag iya nakita si Jesus nga nagatindog didto, pero wala niya makilala nga si Jesus yadto. 15Si Jesus nagpamangkot sa iya, “Ngaa bala nagahibi ka? Sin-o bala ang imo ginapangita?”

Naghunahuna si Maria nga hardinero sia, gani nagsiling sia sa iya, “Tyoy, kon ikaw ang nagkuha sa iya, sugiri ako kon diin mo sia ginbutang, kay kuhaon ko sia.”

16Si Jesus nagsiling sa iya, “Maria!”

Nagliso si Maria sa pag-atubang kay Jesus kag nagsiling sa Hebreo, “Rabboni!” (Ini nagakahulogan, “Manunodlo.”)

17Si Jesus nagsiling sa iya, “Indi ka mag-uyat sa akon, tungod kay wala pa ako makakayab sa Amay. Pero kadtoi ang akon mga utod kag sugiri sila nga magakayab ako sa akon Amay kag inyo Amay, sa akon Dios kag inyo Dios.”

18Gani si Maria Magdalena naglakat kag nagsugid sa mga gintuton-an, “Nakit-an ko ang Ginoo!” kag ginpaalinton niya sa ila ang ginsiling sang Ginoo sa iya.

Si Jesus Nagpakita sa Iya mga Gintuton-an

(Mat. 28:16-20; Mar. 16:14-18; Luc. 24:36-49)

19Gab-i na sadto sang Domingo nga adlaw, nagtipon ang mga gintuton-an sa isa ka balay kag nagpanarangka sila sang mga pwertahan tungod kay nahadlok sila sa mga pangulo sang mga Judio. Dayon si Jesus nag-abot kag nagtindog sa tunga nila. Nagsiling sia, “Ang paghidait manginyara sa inyo.” 20Sang makasiling sia sini, ginpakita niya sa ila ang iya mga kamot kag ang iya kilid. Daku gid ang kalipay sang mga gintuton-an sang makita nila ang Ginoo. 21Si Jesus nagsiling liwat sa ila, “Ang paghidait manginyara sa inyo. Subong nga ang Amay nagpadala sa akon sa kalibutan, ako man nagapadala sa inyo sa kalibutan.” 22Kag sang makasiling sia sini, ginhuypan niya sila kag ginsingganan, “Batuna ninyo ang Espiritu Santo. 23Kon#Mat. 16:19; 18:18. ginapatawad ninyo ang mga sala sang bisan sin-o, ang Dios man nagapatawad sa ila. Kon wala ninyo ginapatawad sila, ang Dios wala man nagapatawad sa ila.

Si Jesus kag si Tomas

24Ang isa sang mga dose ka gintuton-an, si Tomas (nga gintawag ang Kapid), indi nila kaupod sang pag-abot ni Jesus. 25Gani ginsugiran sia sang iban nga mga gintuton-an, “Nakita namon ang Ginoo!”

Pero si Tomas nagsiling sa ila, “Kon indi ko makita ang agi sang mga lansang sa iya mga kamot, kag matandog sang akon tudlo ang agi sang mga lansang, kag matandog ko sang akon kamot ang iya kilid, indi ako magtuo nga nabanhaw sia.”

26Sang makaligad ang isa ka simana, ang iya mga gintuton-an nagtipon liwat sa sulod sang balay kag si Tomas kaupod na nila. Ang mga pwertahan natrangkahan, pero si Jesus nag-abot kag nagtindog sa tunga nila kag nagsiling, “Ang paghidait manginyara sa inyo.” 27Dayon nagsiling sia kay Tomas, “Ibutang diri ang imo tudlo, kag tan-awa ang akon mga kamot. Dayon idab-ot ang imo kamot kag ibutang sa akon kilid. Indi ka na magpangduhaduha, kundi magtuo!”

28Si Tomas nagsabat sa iya, “Ginoo ko kag Dios ko!”

29Si Jesus nagsiling sa iya, “Nagatuo ka bala tungod kay nakakita ka sa akon? Daw ano ka malipayon ang mga nagatuo bisan wala sila makakita!”

Ang Tinutuyo sini nga Libro

30Karon madamo pa gid nga gamhanan nga mga buhat ang ginhimo ni Jesus sa atubang sang iya mga gintuton-an nga wala masulat sa sini nga libro. 31Pero ginsulat ini agod magtuo kamo#20:31 magtuo kamo: Ang iban nga mga manuskrito maymagpadayon kamo sa pagtuo. nga si Jesus amo ang Cristo, ang Anak sang Dios, kag paagi sa sini nga pagtuo may kabuhi kamo sa iya ngalan.

Currently Selected:

Juan 20: MBBHIL12

Highlight

Copy