Genesis 38

Si Juda kag si Tamar

1Sadto man nga panahon si Juda nagbiya sa iya mga utod kag nag-estar upod kay Hira, isa ka tawo nga taga-Adulam. 2Didto nakita ni Juda ang isa ka babayi nga bata ni Sua nga taga-Canaan. Ginpangasawa sia ni Juda, 3kag nagbusong sia kag nagbata sing lalaki, nga ginhingalanan niya kay Er. 4Nagbusong sia liwat kag nagbata sia sing lalaki, kag ginhingalanan niya ini kay Onan. 5Nagbata sia liwat sing lalaki, kag ginhingalanan niya sia kay Sela. Si Juda didto sa Kezib sang pagbata sang iya asawa kay Sela.

6Ginpaasaw-an ni Juda ang iya panganay nga anak nga si Er. Ang ngalan sang iya asawa amo si Tamar. 7Ang Ginoo naakig sa malaut nga pamatasan ni Er, gani ginpatay sia sang Ginoo. 8Dayon si Juda nagsiling sa utod ni Er nga si Onan, “Magpakighirop ka sa asawa sang imo utod nga napatay. Himua ang imo katungdanan sa iya subong nga utod sang iya bana, agod ang imo utod may mga kaliwat.” 9Pero si Onan nakahibalo nga ang mga kabataan indi mangin-iya, gani, kon maghiusa sia sa asawa sang iya utod, ginapaawas niya ang iya binhi sa duta, agod wala sing mga kaliwat ang iya utod. 10Naakig ang Ginoo sang iya ginhimo, kag ginpatay man sia sang Ginoo. 11Dayon si Juda nagsiling sa iya umagad nga si Tamar, “Pauli ka kay tatay mo, kag indi ka magpamana tubtob ang bata ko nga si Sela magdaku.” Ginsiling niya ini tungod kay nahadlok sia nga basi patyon man si Sela subong sang iya mga utod. Gani, si Tamar nagpauli sa balay sang iya amay.

12Sang ulihi ang asawa ni Juda napatay. Sang makatapos na si Juda sa paglalaw, sia kag ang iya abyan nga si Hira nga taga-Adulam nagkadto sa Timna sa diin ang iya mga karnero ginaguntingan. 13May nagsugid kay Tamar, “Ang imo ugangan magakadto sa Timna sa paggunting sang iya mga karnero.” 14Gani, gin-uba niya ang iya bayu sang pagkabalo, kag nagpanabon sang iya guya sang iya takurong, kag nagpungko sa pwerta pasulod sa Enaim, nga isa ka banwa sa alagyan pakadto sa Timna. Nakahibalo sia nga si Sela daku na, pero wala pa sia ginpaasawa kay Sela.

15Sang pagkakita sa iya ni Juda, naghunahuna si Juda nga isa sia ka babayi nga nagabaligya sang iya dungog, tungod kay gintabunan niya ang iya guya. 16Ginkadtuan niya sia sa higad sang dalan kag ginsingganan, “Dali, mahiusa ako sa imo.” Wala si Juda makahibalo nga umagad niya sia.

Nagsiling ang babayi, “Ano ang ihatag mo sa akon?”

17Nagsabat sia, “Padalhan ko ikaw sing tinday nga kanding halin sa akon mga panong.”

Nagsiling ang babayi, “Sigi, kon mahatagan mo ako sing kalig-unan tubtob mapadala mo ini.”

18Nagpamangkot sia, “Ano ang ihatag ko sa imo nga kalig-unan?”

Nagsabat ang babayi, “Ang imo singsing nga inugpat-in upod sang iya higot, kag ang imo sungkod nga ginadala.” Ginhatag niya ini sa babayi. Dayon naghiusa sila kag nagbusong ang babayi. 19Dayon nagbangon si Tamar kag nagpauli. Ginkuha niya ang takurong nga iya ginapanabon, kag nagsuksok sang bayu sang balo.

20Si Juda nagpadul-ong sang tinday nga kanding paagi sa iya abyan nga si Hira sa pagbawi sang iya mga kalig-unan sa babayi, pero wala niya sia makita. 21Ginpamangkot niya ang mga tawo sa Enaim, “Diin bala ang babayi nga nagabaligya sang iya dungog nga diri anay sa alagyan?”

Nagsabat sila, “Wala gid diri sing babayi nga nagabaligya sang iya dungog.”

22Nagbalik sia kay Juda kag nagsiling, “Wala ko sia makita. Ang mga tawo didto nagsiling nga wala didto sing babayi nga nagabaligya sang iya dungog.”

23Si Juda nagsiling, “Indi ka na magtinguha sa pagbawi sini, basi yagutaon kita sang mga tawo. Kon sa bagay, nagtinguha ako sa pagbayad sa iya, pero wala mo sia makita.”

24Sang makaligad ang tatlo ka bulan, may nagsugid kay Juda, “Ang imo umagad nga si Tamar nanginmalain nga babayi, kag karon nagabusong na sia.”

Si Juda nagmando, “Dalha ninyo sia sa gwa kag tutdan sia tubtob mapatay.”

25Sang ginadala sia pa gwa, ginpasugoan niya nga singganon ang iya ugangan: “Ginpabusong ako sang tawo nga tag-iya sini nga mga butang. Tan-awa kon kay sin-o ining singsing nga inugpat-in upod sang iya higot, kag ini nga sungkod.”

26Si Juda nakakilala sini kag nagsiling, “Matarong sia. Ako amo ang nakasala. Kuntani ginpaasawa ko sia sa akon anak nga si Sela.” Kag wala na sia maghiusa sa iya liwat.

27Sang manugbata na si Tamar, nasapwan nga kapid ang ginabusong niya. 28Sang ginasakitan na sia, naggwa ang kamot sang isa sa ila. Gindakop ini sang paltera kag ginhigtan sang pula nga hilo kag nagsiling sia, “Amo ining una natawo.” 29Pero ginpasulod sang bata ang iya kamot, kag ang iya kapid amo ang natawo sing una. Dayon ang paltera nagsiling, “Daw ano ang paghingagaw mo sa paggwa sing una!” Gani ginhingalanan niya sia kay Perez.#38:29 PEREZ: Ini nga ngalan sa Hebreo nagakahulogan “hingagaw pa gwa.” 30Dayon ang iya utod nga lalaki nga natawo nga may higot nga pula sa kamot, ginhingalanan kay Zera.#38:30 ZERA: Ini nga ngalan pareho sang Hebreo nga pulong para sa “mapula nga pagbanaag sang pamanagbanag.”

Currently Selected:

Genesis 38: MBBHIL12

Highlight

Copy