Genesis 11

Ang Tore sang Babilonia

1Sang una, ang mga tawo sa bug-os nga kalibutan may isa lang ka linggwahe kag pareho nga mga pulong ang ila ginagamit. 2Samtang nagapakadto sila sa sidlangan, nakalambot sila sa patag sang duta sang Babilonia kag nag-estar sila didto. 3Dayon nagsiling sila sa isa kag isa, “Dali kamo, mahimo kita sing mga tisa kag aton ini patig-ahon sa hornohan.” Gani may tisa sila nga inugpatindog, kag aspalto sa pagpatapik sang mga tisa. 4Dayon nagsiling sila, “Dali, mahimo kita sing isa ka siudad nga may tore nga nagalambot sa langit, agod manginbantog kita kag indi kita maglapta sa bug-os nga duta.”

5Karon ang Ginoo nagpanaog sa pagtan-aw sang siudad kag sang tore nga ginpatindog sang mga tawo. 6Kag nagsiling sia, “Karon, ini nga mga tawo may pag-isa kag isa lang ang ila linggwahe. Pamuno pa lang ini sang ila pagahimuon. Sa indi madugay magahimo sila sang bisan ano nga luyag nila! 7Dali, manaog kita kag tublagon ta ang ila panghambal agod nga indi sila mag-intiendihanay.” 8Gani ginpaalaplaag sila sang Ginoo sa bug-os nga duta, kag nauntat ang ila paghimo sang siudad. 9Ang siudad gintawag Babilonia,#11:9 BABILONIA: Ini nga ngalan pareho sa Hebreo nga pulong nga kon sayuron “tublag.” tungod kay didto gintublag sang Ginoo ang linggwahe sang tanan nga mga tawo, kag halin didto ginpalapta niya sila sa bug-os nga kalibutan.

Ang mga Kaliwat ni Sem

(1 Cron. 1:24-27)

10Amo ini ang mga kaliwat ni Sem. Duha ka tuig sa tapos sang anaw, sang si Sem nagaedad sing 100 ka tuig, natawo ang iya anak nga lalaki nga si Arfaxad. 11Sa tapos sini, nagkabuhi sia sing 500 pa ka tuig kag may iban pa sia nga mga kabataan.

12Sang si Arfaxad nagaedad na sing trayntay singko ka tuig, natawo ang iya anak nga lalaki nga si Sela. 13Sa tapos sini, nagkabuhi sia sing 403 pa ka tuig kag may iban pa sia nga mga kabataan.

14Sang si Sela nagaedad na sing traynta ka tuig, natawo ang iya anak nga lalaki nga si Eber. 15Sa tapos sini, nagkabuhi sia sing 403 pa ka tuig kag may iban pa sia nga mga kabataan.

16Sang si Eber nagaedad sing trayntay kwatro ka tuig, natawo ang iya anak nga lalaki nga si Peleg. 17Sa tapos sini, nagkabuhi sia sing 430 pa ka tuig kag may iban pa sia nga mga kabataan.

18Sang si Peleg nagaedad sing traynta ka tuig, natawo ang iya anak nga lalaki nga si Reu. 19Sa tapos sini, nagkabuhi sia sing 209 pa ka tuig kag may iban pa sia nga mga kabataan.

20Sang si Reu nagaedad sing trayntay dos ka tuig, natawo ang iya anak nga lalaki nga si Serug. 21Sa tapos sini, nagkabuhi sia sing 207 pa ka tuig kag may iban pa sia nga mga kabataan.

22Sang si Serug nagaedad sing traynta ka tuig, natawo ang iya anak nga lalaki nga si Nahor. 23Sa tapos sini, nagkabuhi sia sing 200 pa ka tuig kag may iban pa sia nga mga kabataan.

24Sang si Nahor nagaedad sing baynte nwebe ka tuig, natawo ang iya anak nga lalaki nga si Tera. 25Sa tapos sini, nagkabuhi sia sing 119 pa ka tuig kag may iban pa sia nga mga kabataan.

26Sa tapos makaedad si Tera sing setenta ka tuig, natawo ang iya mga anak nga amo sanday Abram, Nahor, kag Haran.

Ang mga Kaliwat ni Tera

27Amo ini ang mga kaliwat ni Tera. Si Tera amay nanday Abram, Nahor, kag Haran. Si Haran amay ni Lot. 28Si Haran napatay sa iya kaugalingon nga banwa sang Ur sakop sang Babilonia sang buhi pa ang iya amay. 29Si Abram nagpangasawa kay Sarai, kag si Nahor nagpangasawa kay Milca, ang bata nga babayi ni Haran nga amay man ni Isca. 30Si Sarai wala makapamata.

31Gindala ni Tera ang iya anak nga lalaki nga si Abram, ang iya apo nga lalaki nga si Lot nga anak nga lalaki ni Haran, kag ang iya umagad nga babayi nga si Sarai, nga asawa ni Abram, kag naghalin sila sa siudad sang Ur sang Babilonia sa pagkadto sa duta sang Canaan. Naglakat sila tubtob sa Haran kag didto nag-estar sila. 32Didto napatay si Tera sang nagaedad sia sang 205) ka tuig.

Currently Selected:

Genesis 11: MBBHIL12

Highlight

Copy