Mga Binuhatan 10

Si Pedro kag si Cornelio

1May isa ka tawo sa Cesarea nga ginahingalanan kay Cornelio, isa ka kapitan sang mga soldado nga Romanhon sa batalyon nga ginatawag “Ang Batalyon Italyano.” 2Mainampuon sia nga tawo. Sia kag ang iya bug-os nga panimalay nagasimba sa Dios. Daku gid ang iya nahimo sa pagbulig sa mga imol nga mga Judio kag pirme gid sia nagapangamuyo sa Dios. 3Isa sadto ka hapon, sang mga alas tres ang takna, nakita niya sang maathag ang isa ka palanan-awon nga ang anghel sang Dios nagsulod kag nagsiling sa iya, “Cornelio!”

4Ginhimutaran niya ang anghel nga may kahadlok kag nagsiling, “Ano bala ina, Ginoo?”

Nagsabat ang anghel, “Ginbaton sang Dios ang imo mga pangamuyo kag ang imo pagbulig sa mga imol. Gani iya ikaw ginasabat. 5Karon magpadala ka sing mga tawo sa Jope sa pagsugat sang isa ka tawo nga ginahingalanan kay Simon Pedro. 6Bisita sia ni Simon nga manugbulad sang panit kag ang iya balay yara sa higad sang baybay.” 7Dayon naghalin ang anghel kag gintawag ni Cornelio ang duha sang iya mga suloguon kag ang isa ka soldado nga mainampuon, isa sang mga masaligan nga nagaalagad sa iya. 8Ginsugiran niya sila kon ano ang natabo, kag ginpadala sila sa Jope.

9Sang#Jdt. 8:5. madason nga adlaw, sang nagapakadto sila sa Jope kag malapit na lang sila sa amo nga lugar, si Pedro nagsaka sa atop sang balay sa pagpangamuyo. Nagahingudto gid sadto ang adlaw. 10Ginutom sia kag luyag niya magkaon. Samtang ginaaman ang pagkaon, may nakita sia nga palanan-awon. 11Nakita niya nga nag-abri ang langit kag may nagapaubos sa duta nga daw habol nga malapad nga ginatunton sa apat ka pamusod. 12Yara sa amo nga sulodlan ang tanan nga sahi sang mga kasapatan nga nagalakat, kag ang mga sapat nga nagasaog sa duta kag ang mga pispis sa talon. 13Kag may tingog nga nagsiling sa iya, “Magtindog ka, Pedro! Mag-ihaw ka kag magkaon!”

14Pero nagsabat si Pedro, “Indi ako sina makahimo, Ginoo! Wala gid ako nagakaon sang bisan ano nga nadagtaan ukon mahigko.”

15Ang tingog naghambal sa iya liwat, “Indi pagkabiga nga mahigko ang bisan ano nga butang nga ginsiling sang Dios nga matinlo.” 16Katatlo suliton ini nga hitabo kag sa gilayon ginbatak yadto nga butang sa langit.

17Karon nagpalibog si Pedro kon ano ang kahulogan sang palanan-awon nga iya nakita. Sa sadto man nga tion nahibaluan na sang mga tawo nga ginpadala ni Cornelio kon diin ang balay ni Simon kag yara na sila nagatindog sa pwerta sang kudal. 18Nagpanawag kag nagpamangkot sila, “May bisita bala kamo diri nga ginahingalanan kay Simon Pedro?”

19Nagapanghunahuna pa si Pedro kon ano ang kahulogan sang palanan-awon sang magsiling ang Espiritu Santo sa iya, “Pamati ka! May tatlo#10:19 tatlo: Aang iban nga mga manuskrito maypila; ang isa ka manuskrito mayduha. ka tawo diri nga nagapangita sa imo. 20Gani maghimos ka kag magpanaog kag indi ka magpangduhaduha sa pag-upod sa ila kay ako ang nagpadala sa ila.” 21Gani nagpanaog si Pedro kag nagsiling sa mga tawo, “Ako ang ginapangita ninyo. Ngaa nag-abot kamo?”

22Nagsabat sila, “Ginpadala kami ni Kapitan Cornelio, isa ka maayo nga tawo nga nagasimba sa Dios kag ginataha sang tanan nga mga Judio. Ang isa ka anghel sang Dios nagsiling sa iya nga agdahon ikaw sa iya balay agod nga makapamati sia sang ihambal nimo.” 23Gin-agda ni Pedro ang mga tawo sa pagsulod, kag didto niya sila ginpatulog.

Sang madason nga adlaw nanghimos si Pedro kag nag-upod sa ila. Ang pila sang mga kautoran halin sa Jope nag-upod man sa iya. 24Sang madason nga adlaw nag-abot sila sa Cesarea sa diin nagahulat si Cornelio upod sa iya mga pariente kag suod nga mga abyan nga iya gin-agda. 25Sang nagapasulod na si Pedro, ginsugata sia ni Cornelio. Nagluhod si Cornelio sa iya atubang kag nagsimba sa iya. 26Pero ginpatindog sia ni Pedro kag ginsingganan, “Tindog ka, kay tawo man lang ako.” 27Nagpadayon si Pedro sa paghambal kay Cornelio, samtang nagapasulod sila sa balay kag nakita niya ang madamo nga mga tawo nga nagtipon didto. 28Nagsiling si Pedro sa ila, “Kamo mismo nakahibalo gid nga ang isa ka Judio wala ginatugoti sang iya pagtuluohan sa pagbisita ukon sa pag-upod sa mga Hentil. Pero ang Dios nagpahayag sa akon, nga indi ko pagkabigon ang bisan sin-o nga tawo nga mahigko ukon nadagtaan. 29Gani sang ginpasugoan ninyo ako sa pag-abot, wala ako magbalibad. Karon nagapamangkot ako sa inyo, ngaa ginpakadto ninyo ako?”

30Nagsabat si Cornelio, “Apat na ka adlaw ang nagligad tubtob sa sini nga takna, sang mga alas tres sang hapon, nagapangamuyo#10:30 nagapangamuyo: Ang iban nga mga manuskrito maynagapuasa kag nagapangamuyo. sa akon balay. Sa hinali may nagtindog sa akon atubang nga isa ka tawo nga may masilaw nga bayu, 31kag nagsiling sia, ‘Cornelio! Ginpamatian sang Dios ang imo pangamuyo kag nakita niya ang imo pagbulig sa mga imol. 32Magpadala ka sing tawo sa Jope sa pagsugat sa isa ka tawo nga ginahingalanan kay Simon Pedro. Nagadayon sia sa balay ni Simon nga manugbulad sang panit kag ang iya balay yara sa higad sang baybay.’ 33Gani ginpakadtuan ko ikaw sa gilayon kag karon maayo gid kay nag-abot ka. Karon yari kami tanan sa presensya sang Dios, nga nagahulat sa pagpamati sang bisan ano nga ginsugo sang Ginoo nga isiling mo.”

Ang Hambal ni Pedro

34Nagsugod#Deut. 10:17. si Pedro sa paghambal: “Karon natalupangdan ko nga matuod gid, alalangay ang pagkabig sang Dios sang tanan nga mga tawo. 35Kay ang bisan sin-o nga nagakahadlok sa iya kag nagahimo sing matarong, bisan ano ang iya rasa, nahamut-an sia sang Dios. 36Inyo nahibaluan ang mensahe nga iya ginpadala sa mga tawo sang Israel, nga nagawali sang Maayong Balita sang paghidait paagi kay Jesu-Cristo nga Ginoo sang tanan nga mga tawo. 37Inyo nahibaluan ang daku nga hitabo sa bug-os nga Israel, nga nagsugod sa Galilea, sa tapos nga ginwali ni Juan ang mensahe sang pagbautiso. 38Nakahibalo man kamo nahanungod kay Jesus nga taga-Nazaret, kon paano ang paghatag sang Dios sa iya sang Espiritu Santo kag gahom. Nagkadto sia sa tanan nga mga lugar nga nagahimo sang maayo nga mga buhat kag nagaayo sang tanan nga ginagamhan sang Yawa, kay ang Dios kaupod niya. 39Mga saksi kami sang tanan nga ginhimo niya sa mga kabanwahanan sang mga Judio kag sa Jerusalem. Dayon ginpatay nila sia paagi sa paglansang sa iya sa krus, 40pero ginbanhaw sia sang Dios sa ikatlo nga adlaw. Ginpahayag sia, 41indi sa tanan nga mga tawo, kundi sa amon lang nga ginpili sang Dios subong nga mga saksi. Sa tapos sia mabanhaw, nagkaon kag nag-inom kami upod sa iya. 42Kag ginsugo niya kami sa pagwali sang Maayong Balita sa mga tawo kag sa pagpamatuod nga sia amo ang ginpili sang Dios nga hukom sang mga buhi kag sang mga patay. 43Ang tanan nga mga propeta naghambal nahanungod sa iya, nga ang tanan nga magtuo sa iya pagapatawaron sang ila mga sala paagi sa gahom sang iya ngalan.”

Ginbaton sang mga Hentil ang Espiritu Santo

44Samtang nagahambal pa si Pedro, nagkunsad ang Espiritu Santo sa tanan nga nagapamati sang iya ginahambal. 45Ang mga tumoluo nga mga Judio nga nag-upod kay Pedro halin sa Jope natingala nga ang Dios nagbubo man sing dulot sang Espiritu Santo sa mga Hentil. 46Kay nabatian nila sila nga nagahambal sa iban nga mga linggwahe kag nagadayaw sang pagkagamhanan sang Dios. Nagsiling si Pedro: 47“Nabaton sini nga mga tawo ang Espiritu Santo subong nga kita man nakabaton. Karon may makapugong bala sa ila sa pagpabautiso paagi sa tubig?” 48Gani ginmanduan niya sila sa pagpabautiso sa ngalan ni Jesu-Cristo. Dayon gin-agda nila sia sa pagpabilin upod sa ila sing mga pila ka adlaw.

Currently Selected:

Mga Binuhatan 10: MBBHIL12

Highlight

Copy