Márko 12

Hib gál ˈdeđew-, máá les léká hí lésle mé ki koyká

1Aalé Yíésu hát hibietká gáál he onisie, kieye, Mú tikiˈd ˈguor saano vinnaká #12:1 ˈGór vinnáállá saanolle hát saano nyaa, tá ˈgor íín hát yierite ká yaalla. lésle gaa fie, tá đír ki ˈdisse. Mu les hurt ˈguoˈd gaalí saano gaa ˈduˈduoká gaa ˈgodhe, konnoch úba les gaa ˈdisse. Aalé mu gál les ˈdeˈdeen-, aadh ˈdaatika saano hisseka mú hol saano ki léká les af iđie, đo kie, lés eiy mé nie. 2Aalé saano vinna he hí baan yieká, máá giri lesléká gédéchle gál he lésle af iđieká ali ˈdú kaay, giri gál kinaal mú lésle saanolle gaalí mú ˈbaal ka shiguoká. 3Aalé gál giri les ˈdeˈdemeká máá giri gedechká ˈgiliˈgay, mú tune, mú gil ki arie. 4Aalé máá giri les léká geđi gédéch eiy gáál ali ˈdú kaay. Máá kinaal gaalí mé ˈdoy, gaalí chaachare. 5Máá giri les léká geđi máá éíy taaka ali gaa kaay, máá kinaal gaalí yies. Mu geđi gál éíy burnayká ali fie, gáál ˈdáá tikiˈd gaalí tune, ˈdáá tikiˈd gaalí yies.

6Máá muí ali ma gaa káany-, ká ˈgiteká tikiˈde. Máá kinaallá he mú inylé gelaamká. Mu inyle gáál el ˈdaˈdo ali gaa kaay, tawunyleka kieye, Gaal inychú hai kiadha, yie.

7Gál giri muí les af iđieká íny argeká hol geey, kieye, Máá lesallá léká inylé hí aˈjibaatle higiloká hállá. Ka yimedhíe, mú kí yees, les kí lilet, gaalí hol yie. 8Aalé gaal đo íny hol ˈdú ˈgiiliˈgay, íny yies, íny les sug ki lay.

9Aalé máá lesléká háte he ˈdeeme? Mu hai ká yiimedhe, gál kinaal af hai ki beđita, les gál eiy af hai iđimia. 10Ití Warˈgat Waaˈgiet giri kieye,

Wár gál é ˈdiˈdisoká hí điidheká hé ˈbíl árle yie.

11Wár kinaallá Máá kúnnaa Guđo Waago hí hát kinaallá koy.

Yaalmit ke il ki argóóllá ebá gáál af gil fafaa! #12:11 Warˈgat Arram 118:22-23

chieká ma túony? Yíésu hí yie.

12Aalé gál giri guguđoká hib Yíésu hí hogodhééllá hát hí ˈdaalle ki tielká onnoyká Yíésu ˈgiiliˈgayká fede, kor gaal ˈdaa giri nyésébích Yíésu af nee kokoyká kiadheká mú hay, ali gaa sedhe.

Hé Kaisar he hé Kaisar Hé Waaˈgiet he hé Waaˈgiet

13Aalé gál Farisaay ubaa Heróˈde gállé hí ˈdú ijoká ˈdáá tikiˈd gaalí Yíésu ali ˈdú fie, giri gál kinaal ˈdéé um mákárta-, mú a geer yé gáá ˈdeˈdeenká mú af ki raraatká. 14Gaal mú ˈdu gáá yimie, kieye, Máá gáál he oonisúóllo, kúún hát ˈdúúw hogoto-, afka hódho mánká nyáá nyí óg. Kó máá níínní kikiato-, ubaa ˈdú iiyyoká mán. Tá kuun ˈgíérích ˈdúwa-, Waaˈgietká gálaat oonisicha. Aaléka, Káísar ki gibíre ki gugusoká taglée, ebá hé tagle muuniny? 15Gibíre ha nyí guutáa, ebá nyáá nyí ma guusiny? gaalí yie.

Aalé Yíésu gáál điđamle kimiteká gáál geey, kieye, Háteka hí ye héél af kí dhaˈgasanáal? Ebá ye bíre tikiˈd kí helía, yú dhaaya, yie. 16Aalé gaal mú bíre tikiˈd kí helieká, Yíésu gáál yiete, kieye, birééllá gách ubaa hedh hí gaa yaalallá hé mááya? yie.

Gaal Yíésu ˈdéé hol ˈdú nie, kieye, Hé Kaisar, yie. 17Aalé mu gáál geey, kieye, Hé Kaisar máállé Káísar shía, hé Waag hí léká Waagle shía, yie.

Aalé gaal mú ˈdeenyléél af ˈdabe.

Gál kufeká uushich yé gáá ˈdímle ˈdeenylé

18Aalé gál Saˈdukaay#12:18 Gál Saˈdukaay he gál Yuuˈdi-, kaamúre-, gúch hí gál suoryoká. Gál kinaallá tawunyleka kieye, Gál kufoká hé uushim yiem ma gáá ˈdeˈdeminy, héétí hé geđi ma logolnon, he yegedhe. giri kieye, Gálaat gál mán yeetká hé sidhamle hí hol ma ˈdú gáá nannaan, uushim yiem ma gáá ˈdeˈdeminy, yegetká Yíésu ˈdéé hót ˈdú gáá eedhdhe. 19Gaal kieye, Máá gáál he oonisúóllo, Móshe hé muun gáál kí veereká kieye, máádhat nyárle eedhdhe-, tá hátlé um ma ˈdálinyká mán yieka, mú nyárle hí min kinaallá eet, hí mú um kí ˈdalo, he yie.#12:19 Hemuumurít ˈDéé Hótlé 25:5-6 20Aaléka, gál yááb hol ki ˈdalidhe mare tiiya. Máá erká min eedhdhe, hátlé ma nyiˈdísinyká mán yie. 21Aalé mú nyárlé hí elloká đo min kinaal eedhdhe, tá hátlé um ma ˈdálinyká úba mán yie. Máá kinaal nyárlé hí ˈgar yielká min kinaal úba eedhdhe, kor hátlé um ma ˈdálinyká úba mán yie. Yaalmitééllá gaal lullé hol ki ˈdalidhééllá mé gáá ˈjeeˈjeenne, ˈjíig máá ki tiiyaká đig. 22Gaal lullé hol ki ˈdalidhe-, tiiyáállá hídh mánt kufe. Min íín úba el ˈdaal mán chie. 23Aaléka, ˈdaa giri min gál hol ki ˈdalidhe-, tiiyyáállá lúl hí shuunneká, af giri gál kufeká uushim yiem gáá ˈdeˈdeenká minnééllá gálallá mááya hí le? gaalí yie.

24Aalé Yíésu gáál geey, kieye, ˈDaa giri hí Warˈgat Waaˈgiet ubaa fargogint Waaˈgiet ki muogká, in hí hééllá ˈdeeneyche muunîny? 25Gál kufeká af giri uushim yiem gáá ˈdeˈdeenká hé máá níínní egeet-, ubaa gaalí egeetká mán. Af kinaallá gaal hát Waag gállé ˈgasso-, urruká hai yeedhe, gaal hé ma shugunan. 26Ta gál kufeká uushim yiem gáá ˈdímle ˈdeenyle ití warˈgat Móshe hí veereká ma gaa túony, giri ˈgór bolomeká Waag hí ˈdéé gáá hote-, Waag kieye, Yú he Waag Abiraayam, Waag Yisak, tá Waag Yakob, Waag hí chieká?#12:26 Yíéˈdími 3:6 27Waag hé Waag gál kúfach gaa yíéđianká muuniny, Waag he Waag gál luogolká. It tág hééllá ˈdeeneyche! muí yie.

Hemurit súm fargogiyyoká

28Aalé gál nyatalaamká mú tikiˈd ká yimieká, gál hol ki fafalmeká ˈdeenyle nee koy. Yíésu gáál hát ˈdabaanká ˈdéé hol ˈdú naʼ argeká, mu Yíésu yiete, kieye, Hemuumurit Waag hí Móshe ka shiichééllá, hemurit máre hí met iđa? yie. 29Aalé Yíésu mú ˈdéé hol ˈdú nie, kieye, Hemurit súm hí met iđoká hééllá: Gál Yisirayel, nee kóo, Máá Guđo Waag kúnnaaká tákámlé ká Guđo. 30Máá Guđo Waag kuaká geerkú lulle ki géélneb, hodhinkú lulle ki géélneb, tawunykú lulle ki géélneb ubaa fargogintkú lulle ki géélneb,#12:30 Hemuumurít ˈDéé Hótlé 6:4, 5 31hemuritlé ki naamaká kieye, Máá olkú hát kúún dhúrkú hol gielallá úba géélnebo he chie.#12:31 ˈDeemano Gál Levi 19:18 Hemuumurit naamáállá hé hemuumurit éíy taaka hí met iđoká mán, Yíésu hí yie.

32Aalé máá giriká Yíésu geey, kieye, Máá gáál he oonisúóllo, kó tág hé ˈdúwaká hote, hát káána kieye, Waag tikiˈde, Waag éíy taaka hé mán, chíéllá. 33Máádhat he Waag geerle, ubaa tawunyle, tá fargogintle lulle ki geelnedhe-, ubaa máá olle hát íín tuuˈdle hol gielallá geelnedheka, hé kinaallá hé suor ke Waag ki ˈdunmayoká ubaa suor ke Waag ki ˈgaˈgaloká lulle a mé ˈgite, muí yie.

34Yíésu mu ˈdéé hát ˈdaalimoká hol ká nie-, argeká mú geey, kieye, Kúún kó Guch Waaˈgiet ma gaa faganany, yie. Aalé gaal hé máá níínní geđi úba Yíésu yieteká mán.

Messíya iny mááya?

35Aalé Yíésu ˈBíl Waaˈgiet gáál he gaa oonisieká gáál yiete, kieye, Háteka gál nyatalaamká kieye, Máá Waag hí kansím koyye-, Messíya lééllá he Iny ˈDawuˈd,#12:35 Iny ˈDawuˈd hélle kieye, máá ˈbíl íl ˈDawuˈd. yegíel? 36ˈDáwuˈd af giri Hím Naasan Waaˈgiet hí ˈdéé ka shigicheká tuuˈdle kieye,

Máá Guđo Waag hé Máá chia Guđoká geey, mu kieye,

ˈDaab gál ko ka kídhká yú ko ˈgas gim ma fíinyká,

ye gíl ˈdaa naanietallá yíéđig,

he mú yie,#12:36 Warˈgat Arram 110:1

ˈDáwuˈd hí yie.

37ˈDáwuˈd tuuˈdle in Messíya Máá chia Guđoká yeedhe háluke, tá Messíya háte geđi mú inylé? Yíésu hí yie. Aalé nyésébích giri Yíésu af nee kokoyká mú ˈdeenylé kinaal hí geer gaa meey.

38Aalé Yíésu gáál he oonisieká kieye, Gál nyatalaam halúg đafaraam ˈdeˈdier les đigká fafaat-, gálaat in gaa muurshaw-, tá gaalí alb hoyyoká naa gaa yegetká fedóóllá, hol ˈdeeˈdemíe. 39Gaal ény ˈdiiyiminyká ubaa alb he koonyietká karmlé giri gál ˈduuˈdúwaká hí ˈdú yíéđianká fede. 40Gaal ˈdeg híyeská tagano ki ˈdeˈdeme, Waag visan met ˈdeˈdierká gálaat met gaa vivita. Gálallá súmo Waag hí hé il ká aargisicha, yie.

Min hiyesidheká bírellé guteká

41Yíésu ˈBíl Waaˈgiet gaa ijeká, ál gaalí bíre fafieká láá yíéđie. Gál sanˈdúg bíre fafieká dhaay. Gál burnay-, kaamúreká birm iigilishká ali fie. 42Aalé min he mán-, hiyesidhe mare bakanállé naama ˈgayyeká ali fiiyye. 43Yíésu lalille ká vie, kieye, Yú hí hé ˈdúwaká geeye, min he mán-, hiyesidhééllá hé ali fiiyyeká hé gálallá hí ali fieká lulle ˈdú guđo. 44Gálallá hé ali fieká, hé guđoká hí kí ˈgite. Minnééllá íín héllé ninni-, les ki iđeká lullé ali fiiyye, muí yie.

Currently Selected:

Márko 12: dsh

Highlight

Copy