Matááyo 14
14
Yuána gálaat bie gim nannieká hát gaalí yieská
1Af kinaallá Heróˈde giri kánsích lés Galilaaya onnoyká fayam Yiesu maale. 2Mu gállé gédeká geey, kieye, Máállá he Yuána giri gálaat bie gim nannie-, uushich yé gáá ˈdie, ˈdaa kinaallá in fargogínt hí gaa iđa, hé ki af ˈdaˈdabóóllá ekemeye, muí gáál yie.
3Máá Heróˈde lééllá in héle Yuána ˈgiliˈgay, mú hiigidhe, mú ˈbíl hiiginká gaa kaay. Mu Yuána ˈbíl hiiginká gaa kaayallá, mu nyárlé Fílib minlé Heróˈdias minle hote, hé kinaallá in Yuána hí mú ˈdú ˈdeente. 4Yuána ˈdeeny he Heróˈde geeyká kieye, Minnééllá kuun hí minkú hođisatoká hé tagle muuninyo, he mú yie. 5Heróˈde đo Yuána yegieská he fede, kor gálaat kiadhe, ˈdaa giri gálaat Yuána hát máá Waag hí ˈdeem ka shigicheká ka dhaˈgameká.
6Kor af giri Heróˈde kúlích he gaa ˈdalidheká ˈjilalle ali kí ˈdiiyyeká, ini Heroˈdias gál gaalí kiereká met gaa laalate, Heróˈde geer hí gaa meedhe, 7ˈgaađame, Waag ˈdodhdhe, giri hé ini hí heesetoká ini shiguoká. 8Aalé ini ˈjielle hí ˈdéé af ki ˈguunuanneká, siete, Heróˈde geeyche, kieye, Yuána gálaat bie gim nannuoká meenyle ye ˈbakalich kí káab, chie. 9Heróˈde đo geer hí gaa ˈdeenedhe, kor ˈdaa giri gál kiereká metle Waag gaa ˈdodhdheká ˈdéé mure, giri ini héllé ruogonneká gaalí shiguoká. 10Aalé máá muí ali gaa kaayká ˈbíl hiiginká sedhe, Yuána mé gáá muˈde. 11Yuána meenyle muí ˈbakalich gáá kaadhdhe, muí ini ˈdu gáá sidhe, ini hí ˈjielle ˈdú site. 12Aalé Yuána gállé láliká kie, mú gónle eedhe, mú galie, đo sedhe, Yíésu fayaméél shie.
Yíésu gál shíí chen-, af ˈdaab gúúđo ˈguoká gololie
13Yíésu fayaméél maaleká ubaa lalille kie, kadich hile, gaal ál gálaat mán-, Yíésu hí tákámle gaa yíéđianká mé nie. 14Yíésu bás ílung ka ˈdoy-, kadich gáá leedhe-, nyésébích ilishká argeká, gáál geer hí ˈdú gudhdhe, gáál gállé fursam ˈgieká bisie.
15Biiy gelga chieká gál láliká Yíésu ˈdú sedhe, mú geey, kieye, Állá ˈbakate, aadh hé gaanate, gálaat Waag ki éeb, gaal hí kie, hí ˈjien siet, hí ˈguomano hol ki yiat, yie. 16Yíésu kieye, Gáál mee ke ˈdú egee? Gáál itín hí hé geere shía, yie. 17Gaal Yíésu ˈdéé hol ˈdú nie, kieye, Nyáá nyí hé ˈgayyaká mán, állá balashá chen ubaa béé naama tákáma hí gaa ija, gaalí yie. 18Yíésu gáál geey, kieye, Balashá ubaa beeny kinaallá állá ka sidháa, gáál yie.
19Aalé Yíésu gálaat geey, giri gaal les yíéđianká. Aaléka, mu balasha giri chenká ubaa beeny giri naamaká eedhdhe, úr gaa dhaay, Waag ˈgielmít hol ˈdú nie. Mu balashá eiy ˈgiˈgidhie, lalille shie, lali hí gálaat eiy gise. 20Gálaat lulle gololte, heyie. Mú lalille ˈguom ka ˈgisate-, he hol ˈdú shuunneká illam tomon a naama koch koch. 21Gál ˈguom kinaallá koeyká lúl ke gál ˈdiet ubaa um taak gaa shuuneka, gál yááb shíí chen.
Yíésu bie ˈdug gaa sedhe
22Héél gaalí el ki naateká Yíésu lalille geey, giri gaal kadich higilo-, mú met nannaat-, bás ílung ˈdaatí yé ki ˈdeˈdeen-, mu íín nyesebich Waag ki egewká. 23Mu nyesebich Waag ki eeyká sedhe, gúm feˈjie, giri Waag vivisatká. Aadh dhúú ˈjiiyyeká Yíésu tákámlé he ál kinaallá gaa ije. 24Kadich af kinaalláka hé fagandhe. Aalé wááních fargogoká ˈdoy, baran le gaa eey, kadich hát ˈdeđewká ˈbaalˈbalsie. 25Bar hátle gil má ká sin, Yíésu bás ˈdug gaa sedhe, lalille ˈdú sedhe. 26Aaléka, mú lalille máádhat bie ˈdug gaa seseme-, argiyyeká sierm ˈdeewká hí faanne, kieye, Gaaram hállá! yie, gaal đo koˈdam ˈdaaˈdie.
27Yíésu đo ál tikiˈde kinaallá ˈdéé hodhe, kieye, Haí néeny, he yú, sierm hayyíe! gáál yie. 28Bétiro mú ˈdéé hol ˈdú nie, kieye, Máá Guđo, he har kúún kátaka, ye géesh, yú bie ˈdug gaa sedhe, ko ˈdu gáá yimedhe, yie. 29Yíésu mú vie, kieye, Káde, yie. Aalé Bétiro kadich gaa leedhe, bie ˈdug gaa sedhe, Yíésu ˈdú sedhe. 30Aalé Bétiro waanich fargogóon argeká ˈbinineny hí faanne, đo he hí ˈdiin yie, kúóˈd ˈdoy, kieye, Máá Guđo, ye rig! yie. 31Tíkíˈdé kinaal Yíésu đo gíl helie, mú ká ˈgiliˈgay, mú geey, kieye, Kó iiy yeen ko ninníil! Háteka geer totom gaa ˈgiˈgisatóol? yie.
32Gaal kadich tákáma he hile, waanich đo ali ki ˈdie. 33Gál kádích kinaal gaa ijeká lulle mú vite, kieye, Hé ˈduwa, kúún gon Iny Waaˈgiet! gaalí Yíésu yie.
Yíésu Genésaret álle gál fursam ˈguoká gaa bisie
34Gaal baad af ˈdaati-, basietká yé ki ˈdieká, gaal ény Genesaret ílungle ki ˈdie. 35Gál eny kinaalloká Yíésu kimiteká, gaal ˈjien les kinaalloká fayám bash ki hoy, gálaat gállé basham ˈguoká lulle Yíésu ˈdú gáá sisidhe. 36Aalé gaal Yíésu gil ki efe, giri gál basham ˈguoká đafar muí kaadhdheká net đig yegetká. Ameeny gál mú đafarle đig yieká lulle bie.
Currently Selected:
Matááyo 14: dsh
Highlight
Share
Copy
Want to have your highlights saved across all your devices? Sign up or sign in
Bible Translation and Literacy
