Matááyo 13
13
Yíésu hib máá les fafuoká nyesebich geey
1Kúlích tikiˈde kinaallá Yíésu ˈbíl kinaal gaa kie, mu bás ílung yíéđie. 2Nyésébích ilishká hol ˈdu gáá yimie-, mú ki madeká, mu đo les gaa kie, kadich hile, kadich geer gaa yíéđie. Gálaat lulle íín ílung ki ˈdie. 3Aalé mu hé burnayká gáál hát hibiet-, he hol ki ekenyká onisie, kieye, Máá les fafuoká les hurt mé nie, giri áár fafuoká.#13:3 Ár siindi gálaat hí fafuoká gálaat haí lalama. 4Mu les fímlé fafieká áár ˈdáá tikiˈd ˈgierich af ki okoˈde, hurum ká yimie, hí koey. 5Áár ˈdáá tikiˈd ál waaroká les gaa ˈdane. ˈDaa giri ál waaro kinaal eeˈd hí iraam mannayyeká hirís đo ál ˈjob yé gáá ˈdiiyye. 6Aalé ˈdaa giri hirís hidh súm les ma ki arînyká, aadh ká ˈjiiyyeká hirís đo boloyye. 7Áár ˈdáá tikiˈd ál híí ˈgayyoká les gaa ˈdane, hirís hí yé ká ˈdiiyyeká hiris kinaal hii hí bolosie. 8Ár giri muí ál maal hí midhabká gaa fieká ká ˈdie, hisse, ˈbaal hí kúˈd ˈdale, ˈbaal hí tomon le ˈdale, ˈbaal hí tomon seđ ˈdale. 9Aaléka, máá nee ˈguoká hí hééllá maalo, Yíésu hí gáál yie.
10Aalé gál láliká ká yimie, Yíésu heete, gaal kieye, He onisinykú in hát hibiet-, he hol ki ekenyká tákáma gálaat ki geđicha? mú yie. 11Yíésu gáál ˈdéé hol ˈdú nie, kieye, Itíni in hé geer geđi Guch Waaˈgietká Waag hí shiiche. Tá gálaatí íín hé hé kinaallá Waag hí ma shíiny. 12Máá hé gaalí gíl geer gaa kaayká tág chiratká, hé éíy taaka guđoká úba ha gaalí shigia. Tá máá hé gaalí gíl geer gaa kaayká tág ma ki yaalinyká héllé gíl ká ˈguo kinaal ha gaalí gaa egedhdhe. 13Yú he onisiny hát hibiet-, he hol ki ekenyká gáál ki geđúóllá he ˈdaa giri gaal he dhaˈgasan-, kor he ma kiimisan-, he maalo-, kor he ma maaliny-, he eiy ma nannasanká. 14Tá ˈdeeny héle Waag hí Yisááya ka shiiche-, hé gálallá hí ˈduway, giri kieye,
Gálallá he maalít hai maala, kor hé he eiy ma naasan,
he hai dhaˈgama, kor hé he ma kiimisan.
15Gálallá hé tág met chúg,
gaal hé mamaloká nee afo hol ki yegese,
hé argoká hé ma arginy.
Gálallá he gál onnônyka inle he ki kiimisat-,
neelle he ki mamalo-, kasle he eiy ki nannasat-,
ye hol ˈdu gáá nannaat-, yú biisuoká,#13:15 Yisááya 6:9-10
chie-, Yisááya hí ˈdiiyimeká.
16Tá itín ebá Waag hí ˈdú ˈjiiy! It inkícho he argo, neekícho he mamalóol! 17Yú hí hé ˈdúwaká geeye, gál Waag hí ˈdeem ka shigiche-, burnayká ubaa gál ˈduuˈdúwa-, burnayká hé itín hí argiyyééllá úba aargireká he fede, kor hé ma árginy. Gál kinaallá hé itín hí maallééllá úba he mamaleká he fede, kor hé ma mááliny.
Yíésu hib máá les fafuoká hélle lalille geey
18Aaléka, nee kóo! Ebá yú hí hib máálle les fafieká hélle eiy kí naa. 19Máá Guch Waaˈgiet fayamle maalo-, kor ˈdéé eiy ma náásan-, ˈdeeny giri he geer ka ˈguoká Sátan hí af ki ririatká, hé kinaallá he hát ár ˈgierich af ki okoˈde-, hurum hí koeyká. 20Ár giri ál waaroká les gaa ˈdaneká hélle he hát máá ˈdeeny Waaˈgiet maaleka, đo ˈdéé iiy yeget-, geer hí gaa memeetká. 21Tá ˈdaa giri mu ˈdeeny Waaˈgiet hidh ma ki arînyká mu hé ˈdeeny Waaˈgiet kinaallá súm ma chochony. Hééllá he ˈdaa giri ˈdeeny Waaˈgietallá gaa manyjanyle ubaa he il ká argisinyle mú ali af kí mureka, mu đo ˈdéé gíl sug ki haađuoká. 22Ár ál híí ˈgayyoká les gaa ˈdaneká hélle he hát máá ˈdeeny Waaˈgiet maaleka, ˈdéé iiy yeet-, kor hé lesalloká ˈgar kirmisat-, kamur lesalloká hí lalaat-, hát Waag hí feˈdoká el ma gaa igirinyká. 23Ár gaalí eeˈd máálká álle gaa fieká he hol ki ekenyle he hát máá ˈdeeny Waaˈgiet maaleka, ˈdéé hát ˈdabaanká chichiratká. Gál hat kinaallóóllá saano midhab hí yé gáá ˈdeˈdeenká hé burnayyeká, mááká kúˈd, mááká tomon le, mááká tomon seđe.
Hib sííndílle iish hol totom gáá ˈdieká
24Aalé Yíésu hib éíy taaka he hol ki ekenyká gálaat geey, kieye, Guch Uratiká yaalmit ki égká he hát máá ár midhabká lésle gaa fieká. 25Aalé mu gale-, gálaat lulle rafeká mú kídhíchle mú el ˈgite, ísh sííndí hol ki égká umle sííndí muí fieká totom gaa fie, đo úba gale. 26Aalé sííndí ka ˈdiiyye-, tiish chieká sííndí iish totom ká ˈgayye.
27Aalé máá guđo-, les léká gedelle hí ˈdú sedhe, hí geey, gaal kieye, Máá guđo, ár nyí ká shiiche-, nyí ko kí fiiyyeká hé midhabká, muunîny? Tá ísh sííndí totom gaa ˈgíéllá ále he ká nadhe? gaalí yie. 28Mu gáál geey, kieye, Hé kinaallá kídhích ye mé il gaa yaalká hí ekey, yie. Aaléka mú gedelle kieye, Nyí seete, nyí iish ali gaa bííyya? chie. 29Aalé mu gedelle ˈdéé hol ˈdú nie, kieye, Híʼi, iish hí babiyyaká álká sííndí haí babiyya. 30Hayyíe! Hí hol ˈgar ˈdie, ˈjíig sííndí hí hát ˈdabaanká hito. Af giri sííndí he hí mé ˈdony yegetká gál sííndí mumuroká ha yú geđia, giri iish erkob gaalí ká babuo-, hát metoká gaalí hol ki higidho-, gaalí ˈjiet gaa vereno-, ˈguom íín gaalí ye bush kí fafuoká, muí gedelle yie, Yíésu hí gáál yie.
Heerit ninniká hiblé
31Yíésu geđi hib éíy taaka he hol ki ekenyká gálaat geey, kieye, Guch Uratiká yaalmit ki égká he hát heert ninni-, máá les fafuoká hí eedhdhe-, hí lésle gaa fafuoká. 32Heert kinaallá hé arram lullé muí léslé ˈguomietká gaa fafuoká súm ˈdú ninni, kor ká ˈdiiyyeka, hé ˈguom lullé mú lésle gáá ˈdeˈdeennoká ˈdú ˈdér, ˈgórle đo kimír haí ˈdú galle, é haí gaa ˈdisate.
Hib maata
33Yíésu geđi hib éíy taaka he hol ki ekenyká gálaat geey, kieye, Guch Uratiká yaalmit ki égká he hát maat ninni-, min hí eete-, ˈdúlo ongʼolaam hí seđeká ki ˈdaaˈdiche-, ˈdúlo lulle karsicheká.
34Yíésu he onisinylééllá lulle hát hibietká he nyesebich onisie, hé níínní muí nyesebich geey-, muí he hol ma ki ekênyká mán. 35Yíésu hát hibietallá nyesebich geeyallá ˈdeeny héle máá Waag hí ˈdeem ka shigicheká hí hodheká ˈduway, giri kieye,
He hát hibiet-, he hol ki ekenyká gálaat ha yú geđia,
hé Waag hátlé lés ma ka kúóninyká kaany gaa ijeká ha yú hogodho,#13:35 Warˈgat Arram 78:2
chieká.
Yíésu hib siindi-, iish hol totom gáá ˈdieká hélle lalille geey
36Aalé Yíésu nyesebich ki ˈdiiyiminy hí gaa đuyyeká đo sedhe, ˈbíl hile. Mú gállé láliká mú ˈdú sedhe, kieye, Ebá he hol ki ekeny íshle lés ˈguomiet hurt gáá ˈdieká hélle nyí ka géesh, yie.
37Yíésu gáál geey, kieye, Hib máálle les fafuo-, ár midhabká fíéllá he yáá Iny Máádhátallá. 38Les ˈguom hí gáá igitoká íín he lés ke ˈdú ijóóllá. Ár midhabká íín he gál Guch Waaˈgiet léká. Iish íín he kídhích kúnnaa Sátan gállé. 39Kídhích iish sííndí totom gaa fieká he Sátan ííni. ˈGuom mé ˈdony íín he kúlích biiy el ˈdaˈdká. Tá gál ˈguom mé ˈdaraanká íín he Waag gállé ˈgasso-, urruká.
40Ísh gaalí met hol ki higidho-, gaalí ˈjiet gaa verenóóllá, hé kinaallá yaalmit Waag hí kúlích biiy el ˈdaˈdká gál ađaabano ˈguoká ki ekemeychoká. 41Kúlích biiy el ˈdaˈd kinaallá yáá Iny Máádhátallá gál chia ˈgasso-, urruká ali ha ká fafaa, gaal Guchchú gál gálaat ađaabano met ki kokuoká ubaa gál hé gaa nyakarichká gaa seseenká lulle hollo hol ˈdú shuguna, 42gáál ˈjiet biiyoká hai fafaa. Hé kinaallá he ál gaalí gaa bebeen-, gaalí kach hol a met gaa ˈginianká. 43Gál giri Waag gálléká ˈJaa kúnnaa Waag Guchle hai gaa yíéđima, hát aadhka hai ˈjiimiˈda. Máá nee ˈguoká hí hééllá maalo, Yíésu hí lalille yie.
Guch Uratiká héllé éíy taaka geđi he hol ki égká
44Yíésu hibéél úba gálaat geey, kieye, Guch Uratiká yaalmit ki égká he hát hé him hí ilish-, gaalí lés ˈguomiet ki kaay-, máá hí shuunatká geer hí gaa memeet-, kor geđi hí lés kinaal hurt kakaw-, tá mu seseen-, he lullé ˈguoká el gaa maaduo-, lés kinaal higiatká.
45Guch Uratiká úba yaalmit ki égká he hát máá shokodich hol gaa mamaduo-, bier ˈdabaanká hol gaa ˈgeˈgedho-, 46bieˈdit súm midhab-, him hí ilishká argeka, đo seseen-, héllé lulle ˈguoká el gaa maaduo-, tá bieˈdit kinaal higiatká.
47Guch Uratiká úba yaalmit ki égká he hát mas gaalí bás ki layka, béé met lulle ka ˈgiiliˈgaw-, 48beeny hí koch yieká gaalí ílung ki heergiteka, gaal les yíéđian-, gaal beeny hím ˈguoká béé gaa waarat-, beeny hím mánká lalaanká. 49Kúlích biiy el ˈdaˈdká úba yaalmitééllá ˈdoonno. Waag gállé ˈgasso-, urruká ali hai ká fafiyya, gaal gál hát Waag hí feˈdoká ekemeyoká ubaa gál hé nyakarichká gaa seseenká eiyyo hol gaa nannaa, 50gaal gál hé nyakarichká gaa seseenká ˈjiet biiyoká hai fafaa. Ál kinaallá he ál gaalí gaa bebeen-, gaalí kach hol a met gaa ˈginianká, Yíésú hí gáál yie.
51Aalé Yíésu gáál yiete, kieye, It he onisinyééllá eiy naasate? Gaal kieye, Iiy-hí, nyáá nyí eiy naasate, gaalí yie. 52Aalé Yíésu đo gáál geey, kieye, Aaléka, máá gálaat nyatalaam oonisuo-, Guch Waaˈgiet lalille yieká he hát máá ˈbíl geerle mé ki yaal-, tokolle hé ˈduuˈdúwa-, kissoká ubaa hé ˈduuˈdúwa-, kaanaká hí gaa ijoká yé gáá ˈdeđuoká, yie.
Yíésu énylé Nasaret-, gáá guđandheká gaalí gaa điidhe
53Aaléka, Yíésu gálaat he onisiny hát hibiet-, he hol ki ekenyallá gálaat geeyká đo ál kinaal gaa kie, 54ˈjien gáá guđandheká sedhe. Mu ˈjien kinaal ˈbíllé ˈdiiyiminyká gálaat he gaa onisie. Gálaat mú he onisinyléél af ˈdabe, kieye, Máállá ˈdaalim guđo he guo-, ubaa hé ki af ˈdaˈdaboká, ekemeyóóllá ále he gaa arge? 55Máállá hé máá ˈguor hođuoká inyle muunîny? ˈJiellé hí ˈdalloká meenyle hé María muunîny? Mú nyaaramlé yaabká hé mú Yákob, Yúósef, Símon, tá Yúúˈda muunîny? 56Mú nyaaramlé ˈdedhitká lulle hé ényallá gaa ijóóllá muunîny? Tá hééllá lullééllá ále muí gaa arge? gaalí yie. 57Aalé gaal mú eeshey.
Yíésu đo gáál geey, kieye, Máá Waag hí ˈdeem ka shigichoká hé gaalí ma egesheny. Gál lésle ubaa mú ˈbíl ílle tákáma hí egesheye, yie. 58Aalé gaal ˈdaa giri mú iiy yeen ka mánká, mu hé burnay-, gálaat hí af ˈdaˈdabo-, onnônyka ekemeyká hé ˈjien kinaallá ma gaa ekêny.
Currently Selected:
Matááyo 13: dsh
Highlight
Share
Copy
Want to have your highlights saved across all your devices? Sign up or sign in
Bible Translation and Literacy
