Matááyo 11
11
Yuána giri gálaat bie gim nannieká lalille Yíésu ali ˈdú fie
1Aalé Yíésu lalillé tomon a naamaká atímle hí gaa đuyyeká mu ál kinaal gaa kie, ˈjien éíy taaka les kinaalloká mé nie, gálaat he onisie, gálaat ki ˈdiiyime.
2Aalé Yuána hiiginlé gaa ijeká Yíésu héllé eekemeyká maaleká, mu lalille ˈbáál ali fie, 3giri gaal mú ka hegeset-, kieye, Kúún he máá giri nyí met egete-, ká yiimetkáa, ebá, máá éíyyo nyí met egete? yeetká.
4Aalé gaal Yíésu hatal yieteká, Yíésu gáál ˈdéé hol ˈdú nie, kieye, Hol nadhíe, hé yu hogodhe-, hí maalleká ubaa hé yú eekemey-, hí ye gaa argiyyeká Yuána geeyyíe. 5Hát gál in maamanká in kaadhdhe-, gál ˈgas maamanká hol gaa seeseme-, gál nyókot ˈgieká fayandhe-, gál nee maamannayká he maale-, gál kufeká geđi loolnodhe-, tá gál he maamanká Fayam Midhabká hí ka hileká mú geeyyíe. 6Tá máá yú ye ma ki nannaanká Waag haí ˈdú ˈjeenne, Yíésu hí gáál yie.
Yíésu Yuána ˈduuwle huogodhe
7Aalé lali Yuana he ˈgas badhdheká, Yíésu Yuána ˈduuwle nyesebich geey, gáál yiete, kieye, Lés ˈbakatéétí hí sieteká meete hí aargiˈde hí feˈde? Hóch waanich hí muotisuoká hí aargiˈde? 8Har hé kinaal muuninyka, af kinaalka meete hí eey, hí aargiˈde? Hí sieteká, máá đafaraam ˈdabaanká fadhdheká hí aargíˈde? Gál đafaraam ˈdabaanká fadhdheká ˈjienlé kansimoká he gaa ija. 9Tá meete hí ˈdú siete, hí aargiˈde? Máá Waag hí ˈdeem ka shigichokâ? Hé ˈduwa! Tá yú hí geeye, Yuána kinaallá hé gál Waag hí ˈdeem ka shigicheká lulle ˈdú ˈdúwa. 10Yuánáállá he máá ˈdeenyle Warˈgat Waaˈgiet hí hote-, giri Waag kieye,
Ebá dháash, yú máá chia ˈgassoká ali ha gáá kakaa,
mu met hai ko naadha,
mu ˈgíérích kua ko met tág kokoo,#11:10 Maláki 3:1
chieká.
11Yú hí hé ˈdúwaká geeye, gál gál ˈdiet hí ˈdaleká hé máá níínní Yuána gálaat bie gim nannuoká a mé ijoká mán. Tá Guch Uratiká gálle máállé biiy el ˈdaˈdká íín mú a mé ija. 12Ameeny Yuána gálaat ki ˈdiyimeká tá káána đigallá Guch Waaˈgiet gál hí eiy fufumuoká fedoká hé hí ˈdu gáá ruruan, hí uunmách gaa ˈgeˈgedho. 13Guch Waaˈgietallá hátlé Yuána hí ma ˈdiiyíminyká hé úba gál Waag hí ˈdeem ka shigicheká ubaa warˈgasam Moshe hí huogodhe. 14Har ˈdeem gálaat hí huogodhééllá hí mé ki eeteka, Yuánáállá he Elíya giri hí met egete-, ka yiimieká. 15Máá nee ˈguoká hí hééllá maalo.
16Tá gál barallóóllá meete yú hol ki ekemeye? Yú hí geeye, gaal hát um nigini-, alb himiká gaa ijo-, um eiy veveen-, kieye, 17Itín ke hí geyyiny árle gil kí ˈdoyká it ma láálan, ke hí innum ˈdéént árle kí ˈdoyká it ma búony, um hí yegetká he ká ˈgee.#11:17 Um ár gáál geer gaa ˈdeđeneyyoká maale-, ma bebiminyká he hát gál fayam Yuána hí ˈdiiyimeká maale-, kor Waag makan ma fáminyká. Um ár gáál geer gaa memesuoká maale-, kor ma láálanká he hát gál fayam Yiesu maaleká fayám iiy ma yéenká. 18Yuána ká yimie-, af higite-, ubaa bersh ma igíminyká, gálaat hé hogodhoká kieye, Mú aryáánno hí hille, he yeedhe. 19Tá yáá Iny Máádhátallá ká yimie-, nyí gálaat hol ˈgar gololsote-, nyí gáál he hol ˈgar iyyeká gálaat hé hol geđuoká kieye, Bá dhaayyíe, máállá ebá he kokoo! Mu ebá bersh igima! Mú sheelle har gál gálaat birm gaa gugusatká ubaa gál ađaabano ˈguokaa! he ye yegedhe. Tá ˈdaalim Waaˈgiet hát ke kiimisatká he hé midhab ˈdaalim kinaal hújíchle yé gáá ˈdeˈdeenká, Yíésu hí gáál yie.
Yíésu ˈjien gálle Waag makan ma fáminyká ˈdeente
20Aalé Yíésu hé burnay-, gálaat hí af ˈdaˈdaboká ˈjien he gaa eekemeyká gálle ˈdeente, ˈdaa giri gaal héllé ˈdeđew-, ekemeyoká ma hâny-, Waag makan ma fáminyká. 21Mu ˈdéé huogodhe, kieye, Ény Korasinallo! Ény Beđesaidáállo! He hát hí ki ˈdeewká onnóo! Hé burnay-, gálaat hí af ˈdaˈdabo-, yú hí hurt gaa ekeyká héle gaalí ˈjien Turo ubaa ˈjien Siˈdon gaa ekênyka, gál ˈjien kinaalloká kisso onnônyka he sharim hite, egem ˈjidhdhe, Waag makan fame. 22Tá yú hí geeye, kúlích Waag hí gálaat ˈdéé ki iđimichoká ali kí ˈdiiyyeka, itín manyjany il hí aargiˈdoká hé tág ˈdeew! Manyjany gál ˈjien Turo ubaa gál ˈjien Siˈdon il hí aargiˈdoká úba ˈdiefiyya.
23Tá kó ˈjien Kafarnaumallo, hollo hol ˈderneche-, úr nyoorónno? Kó úr ma nyuorminy! Kuun Waag hai ko gaanaycha, ál gál kufeká hí mé nannuoká ha gaa maanyjayya. Hé burnay-, gálaat hí af ˈdaˈdabo-, yú ko hurt gaa ekeyká, gaalí ˈjien Soˈdom gaa ekênyka, gál ˈjien kinaalloká kisso onnônyka Waag makan fame, ˈjien kinaallá onnônyka afééllá hé hátle ali ijo. 24Tá yú ko geeye, kúlích Waag hí gálaat ˈdeem ki iđimichoká ali kí ˈdiiyyeka, manyjany il hí ko aargiˈdoká hé tág ˈdeew! Manyjany gál Soˈdom il hí aargiˈdoká úba ˈdiefiyya, Yíésu hí yie.
Yíésu ˈJaalle gielmít hol ˈdú nie
25Bár kinaal Yíésu kieye, Baabá, Máá Guđo úr ubaa les lééllo! ˈDaa giri kuun hé gál ˈdaalelle-, hínyaská in ká kaayyeká đalbááya#11:25 Đalbááya he gál hát um niginikáka Waag iiy yeget-, Waag atimle el gaa igiroká. eiy naasanle shiicheká, gielmitlé yú ko hol ˈdú gáá nannaa. 26Baabá, hé ˈduwa! Hééllá hát kuun hí feˈdeká, Yíésu hí yie. 27Aalé Yíésu gálaat geey, kieye, He met lulle hé ˈJaachú hí ye gíl ká fie. Yáá Ínyííllá hé máá níínní ye ogká mán, ˈJaa chia tákáma ye og. Héétí hé máá níínní ˈJaachú ogká mán, yáá mú Inylééllá ubaa gál yú wawarat-, yú ˈJaachú aargisuoká tákáma nyí og, yie.
Gál hef lesalloká hí chieská Yíésu hí héf ˈgiidhia
28Yíésu gáál geey, kieye, It aayaˈgiyya-, ilsh lesalloká hí chiesallá ye ˈdu gáá yimedhíe, hí héf ˈgidhia. 29Ye ká hiláa, ye he gaa onodhíe. Yú he máá gielmít ubaa geer guurá ˈguoká. Itín héf haí ye gaa ˈgiisata, 30ˈdaa giri atimchú hawul mán-, ilsh chia yú hí ˈdú iđimuoká úba heefiyyoká, Yíésu hí gáál yie.
Currently Selected:
Matááyo 11: dsh
Highlight
Share
Copy
Want to have your highlights saved across all your devices? Sign up or sign in
Bible Translation and Literacy
