Lúka 18

Min hiyesidhe mare ubaa máá arra mare hiblé

1Yíésu lalille hát hibietká geey, giri gaal Waag aadh lulle vivisat-, ma giinanyká. 2Mu kieye, É mé tikiˈd máá arra-, Waag ma kikian-, gálaat úba vére muog mare hí gaa ije. 3Ény kinaallá hé min hiyesidhe-, aadh lulle máá arra kinaal ˈdú seseenne-, kieye, Yú ubaa máá ye mé il gaa yaalallá nyí ˈdéé ki íđish, nyí ˈdéé eiy kí naʼ, mú chegie mare úba hé hí gaa iđe. 4Kor máá giri arraká hé min rám guđoká ˈdeenyle hol ma gaa héésen. Aalé mu waaséél tawue, kieye, Har úba káána yú Waag ma kikian-, gálaat úba yú vére múóytaka, 5min ye hawul ˈgietééllá ˈdéé tágo yú ki kokoo. Har yú hélléél tág ma ki konyka, taalle aadh lulle hai ye ˈgormosicha, máá giri arraká hí hol yie, Yíésu hí yie.

6Aalé Máá Guđo Yíésu geđi kieye, Máá arra ˈdeewal in káána hatal yie háluke, 7Waag íín hé gállé waarate-, hí chúúre ubaa kúlíchle ki bebeenká hé ˈdéé hát ˈdabaanká ma ki iđiminy? Mu hé gáál geer hí ma ˈdú guguan? 8Yú hí geeye, Waag gálle ál ˈjob ˈdéé hát ˈduwantiká hai ˈdú hogoto. Tá hé kinaal kí hayo, Iny Máádhat ka yiimetká, mu hé gál hí iiy yieká lésallá gaa aargiro? Yíésu hí gáál yie.

Máá Farisaay ubaa máá gibíre gugusat mare hiblé

9Yíésu gál ˈbaal hol gál ˈduuˈdúwa-, saas mánká ka dhaˈgasan-, gálaat eesheyo mare hibéél geey, kieye, 10Gáál naam ˈBíl Waaˈgiet sedhe, Waago he vivite. Mú tikiˈd hí máá Farisaay, máátí hí máá gibíre gugusatká. 11Máá giri Farisaayká les gaa kie, Waag vite, kieye, Waag, yáá ko meey, yú yáá hát gálatíá lulle muuniny, gálle gálaat gaa buruan-, hé ˈdeđewká ekemeyo-, tá hol buruanallá. Yáá úba hát máá gibíre gugusatallá muuniny. 12Rám tiiyaká geerle bar lulle ram naam yáá af higisat. Hé tomon yú argoká tikiˈd yáá ko hol ˈdu gáá nannuo, muí yie.

13Aalé máá giri gibíre gugusatká íín tagéétí ki ˈdie, mé les ki ˈdoy, hé úba mé les ma gaa éeny, úr ma ki fuˈjîny. Mu hol ˈdeente, kieye, Waag, yáá ađááb ˈgúóllá, geer hí ko ye ˈdú guat, yie, Yíésu hí gáál yie.

14Aaléka Yíésu geđi gáál geey, kieye, Yú hí geeye, hé máá Farisaayatíá muuniny, máá gibíre gugusatallá ííni ˈdúˈjím Waaˈgiet ki gale. Máá hol máá ˈdúwaká ka dhaˈgasanká, Waag ˈdúúw haí rianna. Máá hol máá ˈdúwaká ma ka dhaˈgaminyká, Waag haí ˈduuwaycha, Yíésu hí gáál yie.

Gálaat um Yíésu ˈdú eey

15Gálaat úba um niginiká Yíésu ˈdú eey, giri um muí met ˈdug ˈdú chichiratká. Gál láliká héél argeká gáál ki ˈday. 16Aaléka Yíésu um vie, lalille geey, kieye, Um haí môny, um hí ye ˈdu gáá yimet. Guch Waaˈgiet gál hílléká hát umééllá. 17Yú hí hé ˈdúwaká geeye, máá Guch Waaˈgiet hát veel ninniká iiy ma ka yeenká hé Guch Waaˈgiet ma higiliny, Yíésu hí gáál yie.

Máá kansich kamúrutká

18Aalé máá kansich mare Yíésu vie, mú yiete, kieye, Máá ˈdúwa-, gálaat he oonisúóllo, háte yú ˈdeeme, giri yú luolmit biiyoká aargiroká? yie. 19Aalé Yíésu mú yiete, kieye, Háteka ye máá ˈdúwaká chegetóol? Hé máá níínní ˈdúwaká mán, Waag tákáma ˈdúwa.#18:19 Yíésu hatallá yíéllá, ˈdeenyle amú hélle kieye, Aaléka ye máá ˈdúwaká cheetal, yú hát Waagká ha ye kímísáte? he yie. 20Hemuumurit Waaˈgiet kó óg, hemuumurít kieye, haí hol ˈdú burúminy, ha máádhat chíésiny, ha buráany, ha máádhat hódho af káany, ˈjaakú ubaa ˈjiekú kiikíaw,#18:20 Hemuumurít ˈDéé Hótlé 5:16-20 chieká, Yíésu hí mú yie. 21Aalé máá giriká kieye, Hé kinaallá af giri yú máá nyigeeny onnoyká lulle yáá ki yiel, ˈjíig káána úba đig, yie.

22Aalé Yíésu héél maaleká mú geey, kieye, He tikiˈd tákáma hátle ko gaa laʼ. He lullé kua ˈgayyoká mádish, birmle gál he maamanká eiy gis, hát kinaallá in kamúr úratíá gaa aargiˈda, tá káde, ye el gáá véer, Yíésu hí mú yie. 23Máá giriká héél maaleká, máá kamúrut ki yeetká, geer hí súm gaa ˈdeenedhe. 24Yíésu mú geer hí gaa ˈdeenedhe-, argeká, kieye, Gál kaamúreká Guch Waaˈgiet higiloká, ebá fargogóon! 25Máá kamúrutká Guch Waaˈgiet higiloká hé tág fargogo! Galt márfí íllé ninniká nannaatoká úba hí hawul ˈdú man, Yíésu hí yie.

26Gál giri héél maaleká mú yiete, kieye, Tá aaléka gálya rubach aargira? yie. 27Aalé Yíésu kieye, Hé gálaat hí hát gaa mánká, hé Waag hí hát gaa ˈgayyo, muí gáál yie.

28Aalé Bétiro Yíésu geey, kieye, Bá dháash! Nyíín hékínyo lullé nyí hayche, nyí ko el gáá veeˈde, yie. 29Aalé Yíésu gáál geey, kieye, Yú hí hé ˈdúwaká geeye, máá Guch Waaˈgiet ˈdaalle ˈdugaka ényle yíekaʼ, minle yíekaʼ, nyaaramle yíekaʼ, gállé hí ˈdaloká yíekaʼ, tá umle yíekaʼ hayoká, 30máá kinaallá gon ˈdúˈjím hát kinaallo burnayyeká bárallá hai gaa aargira, héétí bííy biraamiet ka chiimetóótíá mu luolmit biiyoká úba hai gaa yíéđima, Yíésu hí gáál yie.

Yíésu geđi kúfáchle ubaa uushich yé gaa ˈdímle hodhe

31Yíésu gál giri láli-, tomon a naamaká taak eedhdhe, gáál geey, kieye, Bá dhaayyíe, múún Yerúsalemo ke seseme, ˈdeeny Iny Máádhat ˈdaalle ˈdugaka gál Waag hí ˈdéé ka shigicheká hí veereká lulle ál kinaal hai gaa ˈduuwaa. 32Mú kídh gíl geer ha gaalí gaa kakaa, mú ha gaalí ˈdú kosolmo, mú he gaalí gaa ˈdeđia, sillam ha gaalí ki tuuna, 33mú tuuˈd ha gaalí ki tuuna, ha gaalí yeese. Tá kúlích ki seđeká sídhle hollo hí hol ˈdú naata, uushich yé hai gáá ˈdeeme, Yíésu hí gáál yie. 34Gál giri láliká hé ˈdeeny kinaallá umut tikiˈd úba ma gaa kimísan, ˈdee hí mé eiy ki sedhe, gaal hé muí huogodheká hé gíl ka mán.

Yíésu máá in mánká in kaay

35Aalé Yíésu Yeríko ki ˈjobondheká máá in mannay mare ˈgierich af ˈdíne ija, roˈgonmo. 36Mu nyésébích ali ka nanadheká af maaleká gáál yiete, kieye, He meete? yie. 37Gaal mú geey, kieye, Yíésu Nasaretká ali ká nanadha, gaalí mú yie. 38Aaléka mu Yíésu af gaa guđoká ki vie, kieye, Yíésu, Iny ˈDawuˈdallo!#18:38 Iny ˈDawuˈd hélle kieye, máá ˈbíl íl ˈDawuˈd. Geer hí ko ye ˈdú guat! yie. 39Gál nyesebich met gaa igireká mú ki ˈday, Shab áat! mú yie. Mu geđi súm af úr ki eey, Iny ˈDawuˈdallo! Geer hí ko ye ˈdú guat! yie.

40Aalé Yíésu ali ki ˈdie, gáál geey, giri gaal mú mú ˈdu gáá egewká. Aalé mu ka ˈjobondheká Yíésu mú yiete, kieye, 41Meete feˈde yú ko ki ekemeye? yie. Aalé máá giri in mánká kieye, Máá Guđo, yú biiy gaa aargiroká fede, yie. 42Aalé Yíésu mú geey, kieye, In hí ko eiy ˈdie. Iiy yeen kua ye iiy chíéllá hé ko bisiche, yie. 43Tíkíˈdé kinaal mú đo in hí eiy ˈdie, mu Yíésu el gaa veere, Waag meey. Gálaat lulle héél argeká úba Waag meey.

Currently Selected:

Lúka 18: dsh

Highlight

Copy