Lúka 17

Hé gálaat Waag el af gaa tatuoká

1Yíésu lalille geey, kieye, Hé gálaat Waag el af gaa tatuoká ali hai kí ˈdeeme, tá máá hé kinaallá hí yé gáá ˈdieká he il haí aargiˈda. 2Máá gál nigini-, hatallóóllá tikiˈd ye el af gaa tuoká gaalí yíérích ilishká luut ki hidhe-, gaalí bás ki layka kalat.

3Hol ˈdeeˈdemíe! Nyárkú har ađááb hileka, a taʼ. Mu har ađaablé hileká ˈdeentle kimite-, Waag makan ˈjieka, mú ˈdú ˈjé. 4Har mu ko kúlích tikiˈdeká a tiiya he ki ˈdeeney-, kor a tííyá tikiˈde kinaal ko hol ˈdu gáá naanadhe-, kieye, Yáá ko he ki ˈdeeney, makanno ko ká ˈjie, yieka, mú ˈdú ˈjé, Yíésu hí yie.

Iiy yeen

5Aalé gál alb fimiká Máá Guđoká geey, kieye, Iiy yeenkínyo héérsish, yie. 6Aalé Máá Guđoká kieye, Itín har iiy yeen ninni-, hát heerteká hí ˈgíinyka, ˈgórallá hí geeyche-, Hidh ˈgar siléew, bás hurt gáá ˈdé, hí chieka, ˈgor đo af haí vedhdhe! muí gáál yie.

Gedech hújíchlé

7Aalé Yíésu geđi lalille geey, kieye, Kálmaréélka, itín mú tikiˈd gédéch hí les ki gugusoká, muuninyka, hí áíy ki ˈdeˈdeenká he ˈgaa. Mu in gédéch kinaal les gáá galeka, gedech hai geđía, Káde, les yíéđig, golólso, hai yéédhe? 8Mu in hé mú ma géđîny? Ye ˈguom kí or, đafar híso, ye ka golólish, ˈguom kóony ubaa he ím hí ye gaa đuyyeka, tá kuun golólso, he ig, hé mú ma yégên? 9Máá guđo kinaal hé gédéchle geeyká gédéchle hí tág ki koyka, in gedech hai geđía, Taglé, kó hujich hát ˈdabaanká niiyye, hai mú yéédhe? Híʼi, hé mú hát kinaallá ma yegen. 10Aaléka, itín úba he lullé gaalí ki muroká hí mé đig chieka, hatallá yiedhíe, Nyíín nyí gede ˈdúúw mánká, nyíín taalle hújích kínyia nyí niiyye, yiedhíe, Yíésu hí gáál yie.

Yíésu gál tomon nyókot ˈgieká bisie

11Yíésu sienylé gaa igire-, Yerúsalem sesemeká, mu lés Samaria ubaa lés Galilaaya toom nadhe. 12Aalé mu he é mé tikiˈd higileká mu gál yááb tomon nyókot ˈgie mare hol met kí ˈdoy. Gaal geđéétí ki ˈdie, 13af gaa guđoká ˈdéé ki huogodhe, kieye, Máá Guđo Yíésu, geer hí ko nyí shâw ˈdú yeet! gaalí yie. 14Mu gáál argeká gáál geey, kieye, Sedhíe, gál suoryoká hol argisía, yie. Aalé gaal ˈgíéríchlé gaa igire-, sesemeká đo midhandhe.#17:14 Bár kinaallá gál Yuuˈdi basham ˈdeđewká ˈguoká máálle bieka mu gállé suoryamká hai ˈdú sedhe, giri gál suoryam kinaal hí dhaˈgasan-, hát he bieká gaalí gálaat geđuoká.

15Gál kinaal mú tikiˈd midhandhe-, hol argeká, hol ká nadhe, Waag af gaa guđoká ki meey. 16Mu Yíésu ˈgas met les gaa ˈdoy, mú gielmít hol ˈdú nie. Máá kinaallá he máá Samaria. 17Yíésu mú heete, kieye, Gál midhandheká hé tomon muunîny? Tá gáál saal hí aake? 18Gaal hé gál éíy hí hol gáá nannaat-, Waag meeyoká mân? Máá kídhích éíyallo tákáma? Yíésu hí yie. 19Aalé Yíésu máá giri Samariaká geey, kieye, Le gaa keʼ, sí, iiy yeen ye iiy chíéllá hé ko rubach shiiche, muí mú yie.

Guch Waaˈgiet aflé ká chiimetká

20Aalé Yíésu gál Farisaayká hí yiete, gaal kieye, Guch Waaˈgiet amáre he ali kí ˈdeenne? gaalí yie. Mu gáál ˈdéé hol ˈdú nie, kieye, Guch Waaˈgiet ali kí ˈdímle hé hé ki il ki aargiroká muuniny. 21Héétí hé máá kieye, Hállia! muuninyka, Hártia! hí yegetká mán. Guch Waaˈgiet íín hé hí hurt gaa iđo, Yíésu hí gáál yie.

22Aaléka Yíésu lalille geey, kieye, Bár Iny Máádhat hí hol af eiy gaa láká ali hai kí ˈdeenne. Bár kinaallá hí mú aargiˈdaká it tág feˈde, har úba kulich tikiˈd tákámle onnônyka. Tá it kúlích kinaal ma aargiriny. 23Gálaat haí geđia, Mu hártá! muuninyka, Mu hállá! haí yeedhe. Tá gáál haí ˈgar ˈdoˈdóon. 24Yaalmit ír biirgách hí úr gaa boloon-, úr lulle gaa eedhesichóóllá, kúlích Iny Máádhat úba hát tikiˈde kinaallá ká ˈdeenne. 25Tá mu íín gon erkob hai maanyjaa, gál barallóóllá haí điidhma.

26Yaalmit giri héle bár Nowaká in Iny Máádhat ˈjímle bárle úba hí cheedhe. 27Bár Nowa kinaallá gálaat he kokoey, he igime, hollo hol shugunne, ˈjíig kúlích Nówa hí kadich gaa hileká đig. In aaléka bie les er suoy, gáál lulle yies.

28Bár giri Lootká úba hát tikiˈde kinaallá, gálaat he kokoey, he igime, he higidhdhe, he mamadie, lesamo fafie, tá ubaa ée ˈdiˈdise. 29Kor kúlích giri Lóot hí Sóˈdom gaa kieká, waar ˈjiet hí gaa boloonneká úr gáá tune, gál Sóˈdom gaa ijeká lulle beete.

30Kúlích Iny Máádhat hí gáá ˈjeen-, hí gálaat hol gaa aargisuoká úba hát bár Nowa ubaa Loot kinaallá hai cheedhe. 31Kúlích Iny Máádhat hí gáá ˈjeen kinaal máádhat ˈbílle ˈdug ˈdú ijo-, kor shokodich hí ˈbíl geer gaa ijoka, hai léen, ˈbíl híliny, shokodich ka shúúnan. Héétí máádhat har lesam gaa ijoka héllé biiy el ki hayká ˈdugaka hai ényle hol ˈdú náan. 32Ebá min Loot hible táb ˈdodhdhíe.#17:32 Erkob 19:26 33Máá sídhle tág chiratká, sídhle hai baađisia. Máá sídhle silluoká sídhle hai riima.

34Yú hí geeye, chúúré Iny Máádhat hí gáá ˈjeen kinaallá gál naama hol rokoˈd tikiˈd af iifoká, mú tikiˈd Waag haí gaa egeete, máátí hai ká ˈgiita. 35ˈDeg naama hol yierich ˈgar rorootká, min tikiˈd Waag haí gaa egeete, minnéétí hai ká ˈgiisata. 36[Gál naama hol les ˈgar fafaatká, mú tikiˈd Waag haí gaa egeete, máátí hai ká ˈgiita, Yíésu hí gáál yie.]#17:36 Gárallá hé warˈgasam heleká ˈbaal gaa mán. 37Aalé gaal mú yiete, kieye, Máá Guđo, hé kinaal ále? gaalí yie. Yíésu gáál geey, kieye, Ál rief hí ijoká in tére hí hol ˈdú hegelle, Yíésu hí gáál yie.

Currently Selected:

Lúka 17: dsh

Highlight

Copy