Lúka 13

Ađaabanokícho hayyíe, Waag makan famíe

1Aalé af kinaal gál ál kinaal gaa ije mare fayam gál Galilaaya-, gálle giri suor ˈgaˈgale-, Bilááto hí yies-, fásle ubaa fás aanyle suor ˈgaˈgale kinaal hol fameká Yíésu geey. 2Yíésu gáál ˈdéé hol ˈdú nie, kieye, Itín tawunykíchoka, gál Galilaaya manyjayal ííni súm gál Galilaayáátíá lúl ađaabano ˈdú ˈgáa? 3Yú hí geeye, hé hát kinaallá muuniny. Itín hí hé kíchia ˈdeđewká ma hany-, hí Waag makan ma faminyka, úba lulkícho haí maanyjayya. 4Tá itín úba tawunykíchoka, gál tomon a síet ˈbíl ˈdér naˈbual Siloom láá yielká hí ˈdú ˈdoy-, hí yieská ííni súm gál Yerúsalem gaa ijeká lúl ađaabano ˈdú ˈgaa? 5Yú hí geeye, hé hát kinaallá muuniny. Itín hí hé kíchia ˈdeđewká ma hany-, hí Waag makan ma faminyka, úba lulkícho haí maanyjayya, muí gáál yie.

6Aalé mu gáál hibéél geey, kieye, Mú tikiˈd lésle kinnach gaa fie. Aalé kulich tikiˈd mu sedhe, kerka kinnacho he ká babadhdhe. Mu kinnach af kí ˈdieká kinnach má hisiny. 7Aalé mu máállé hí les ki ˈdeˈdemeká geey, kieye, Bá dháash, yú warram seđe gáá yiimie, kínnáchallá um gaa babadhdheká fede, kor yáá kinnach um níínní gaa argeká mán. Kinnach ali gaa mur, kinnach meete taalle hí lésal hurt gaa koy? muí máá les ˈdeˈdemeká yie. 8Aalé máá lés kinaal ˈdeˈdemeká mú ˈdéé hol ˈdú nie, kieye, Máá guđo, kinnach wárallá úba gaa hash, kinnach yú ˈdinnam ˈgodho, yú dhigit ki sisidha. 9Har he hisseka, af kinaalka hé midhab. Har he ma hisinyka, af kinaalka tá kí ali gaa muro, muí mú yie, Yíésu hí gáál yie.

Yíésu Kúlích Hef ˈGisanká min gaa bisie

10Yíésu Kúlích Hef ˈGisanká ény ˈdiiyiminyká ˈbíl tikiˈd gálaat he gaa onisie. 11Min aryáán hí ˈdeeneyche-, hí warram tomon a síet báásh ki chie mare hé úba ál kinaallá gaa iđe. Min gaa kongʼodnote, hé úba hát leđugul ˈdiiyyoká mán. 12Aalé Yíésu min argeká min vie, min geey, kieye, Minnééllo, baash hí ko yé gaa ˈdie, yie. 13Aalé mu min gil ˈdú fie, min giriká đo leđugul ˈdiiyye, Waag meeyche.

14ˈDaa giri Yíésu hí Kúlích Hef ˈGisanká min gaa bisieká, in ˈbíl ˈdiiyiminy kinaal máállé hí mé ki yielká idhane, gál ál kinaal ijeká geey, kieye, Ram le gálaat hí hujich gaa nannaa. Rám le kinaallá gáá yiimedhíe, gaalí gaa biibisuo, tá hé Kúlích Hef ˈGisanká muuniny, gáál yie. 15Aalé Yíésu mú geey, kieye, It ˈdeent gálaat argiyya-, ˈdeentkícho ma arginyal! Itín lulkícho it Kúlích Hef ˈGisanká ókícho ubaa olokícho af ma egêny? Hí bie ma shigîny? 16Tá ini Abiraayam-,#13:16 Ini Abiraayam hélle kieye, Min ˈbíl íl Abiraayam. Hélle úba kieye, Min iiy yeen hát iiy yeen Abirááyam hí ˈgieká ˈgayyoká. Sátan hí warram tomon a síet báásh ˈdú iđichíéllá hé máá hí Kúlích Hef ˈGisannallá gaa biisuoká mân? muí mú yie. 17Mu ˈdeenyéél huogodheká gál hí mé il gaa ˈgieká kern hí ˈgidhe, kor gáláátatí lulle hé midhab fargogínt ˈgie-, muí eekemeyká argeká ger hí gaa meedhe.

Guch Waaˈgiet meete ke hol ki ekemeye?

18Aalé Yíésu gáál yiete, kieye, Guch Waaˈgiet hé hát máre yaal? Tá meete kor yú hol ki ekemeye? 19Guch Waaˈgiet hát heert ninniká. Heert kinaallá máádhat hí eedhdhe-, hí fie-, ká ˈdiiyye-, ˈgórle guđandheka, kimír đo haí ˈdú galle, é haí gaa ˈdisate, muí yie. 20Aalé mu geđi kieye, Guch Waaˈgiet geđi meete yú hol ki ekemeye? yie. 21Guch Waaˈgiet he hát maat ninni-, min hí eete-, ˈdúlo ongʼolaam hí seđeká ki ˈdaaˈdiche-, ˈdúlo lulle karsicheká,#13:21 Balashá ˈbaal gaalí ˈdoˈdootká ˈdúlo gaalí maat fafaa. Yíésu hí yie.

Káráf gaa chálká

22Yíésu ˈgíéríchlé gaa igire-, Yerúsalem sesemeká, ˈjien gaa naanadhe, gálaat he oonisie. 23Mú tikiˈd mú yiete, kieye, Máá Guđo, gál bísach aargiroká in hé iraam mánkâ? yie. Aalé Yíésu gáál geey, kieye, 24Laađamíe, káráf gaa chálká nadhíe! Yú hí geeye, gál burnayká kár kinaallá ki higiloká hé fedo, kor hé ma higiliny. 25Máá ˈbíl léká les gaa kie-, ˈbíl af gaa koyka, itín baaˈd haí ki ˈgiisata, ˈbíl af haí tuunna, hí kieye, Máá Guđo, nyí ˈbíl af kí fur, haí cheedhe. Tá mu íín ˈdéé hollo hí hol ˈdú gáá nannaa, Yáá itín ubaa ál hí gáá chimieká muog, haí yeedhe. 26Tá itín mú hatal haí cheedhe, Hé ke hol ˈgar gololte, ko hol he ˈgar ˈjie. Kó nyí úba ˈgierim ˈjienkínyo af he gaa oonisiche, haí mú cheedhe. 27Kor mu íín haí geđia, It ađaabano gaa seseennééllá ye gaa sedhíe! Yáá alb hí gáá chimieká muog, haí yeedhe. 28Ál kinaal hí Abirááyam, Yísak, ubaa Yákob, tá gál Waag hí ˈdéé ka shigicheká lulle hí Guch Waaˈgiet gaa argiyyeka, itín hát gaalí baaˈd ki ˈgidhieká haí kiimisata, haí beenne, kach amet hollo hí hol gaa ˈginianna. 29Gálaat biiy ˈdinnam lulle hai gáá yiimedhe, gólól Guch Waaˈgiet hai gaa yíéđima, hai golmoto. 30Bá dhaayyíe, gál biiy elloká ˈbaal alb gál biiy metoká hai ki maada. Gál biiy metoká ˈbaal alb gál biiy elloká hai ki maada, Yíésu hí gáál yie.

Yíésu Yerúsalem ˈdaalle ˈdugaka geer hí gaa ˈdeenedhe

31Aadh ˈgás tikiˈde kinaallá gál Farisaay ˈbaal hí Yíésu ˈdu gáá yimie, mú geey, kieye, Heróˈde ko yegeská he fede, állá gaa keʼ, ál eiy mé naʼ, mú yie. 32Yíésu gáál ˈdéé hol ˈdú nie, kieye, Sedhíe, đérích kinaallá geeyyíe, Yú kúlíchallá ubaa beríka aryáán ubaa bashamo gálaat yiem gaa ˈdeđia, burgalia in yú hújíchchú beđita, mú yiedhíe, Yíésu hí gáál yie. 33Har úba káána hát mákártaká kátaka, yú kúlíchallá ubaa beríka tá burgalia hé chiallá gaa seseme, ˈdaa giri gál Waag hí ˈdéé ka shigicheká máá níínní gaalí Yerúsalem ma ki yíésiny mánká.

34It ˈjien Yerusalemallo! It gál Waag hí ˈdeem ka shigichoká cheges-, gál Waag hí ali ˈdu gáá fafiyyoká waar ki tutunnóol! Yú af burnayká hát lug umle kuol gim fafaatokáka itín hí hol ˈdú gáá shuguneká fede. Tá it hé kinaal ká điite. 35Bá dhaayyíe, Waag ˈbílkícho haí kí haađicha. Yú hí geeye, ití geđi ye ma aargiriny, ˈdaab giri bár hí ye ma árginy-, hí kieye, Máá meeny Máá Guđo Waag kí yimíéllá Waag hí ˈdú ˈguunuan,#13:35 Warˈgat Arram 118:26 hí ma chéenká, Yíésu hí gáál yie.

Currently Selected:

Lúka 13: dsh

Highlight

Copy