Lúka 12

Il gíl gaa helít ubaa guofsiny

1Kúlích kinaal gál shíí burnay mare hol ˈdu gáá yiimie-, úba hol kar ririmeká, Yíésu erkob lalille geey, kieye, Gál Farisaay maatle hol raaradhíe. Haí hát gaal íín hí hol gál ˈduuˈdúwaká hol hođúóllá hí hol hôny. 2Hé níínní gaalí kakaw-, Waag hí yé ma ká ˈdeđinyká mán. ˈDeeny gaalí les đireká yé hai ká ˈdeeme. 3Hé hí chúúre hol geeycheká bííy kulichká gálaat haí gaa maala. Hé hí é ger hol nee ki shaakaˈdeká é met ˈdug af ˈdérká ha gaalí ki ˈdiyime.

4Sheelchú, yú hí geeye, haí gál gónkícho yeges-, hé éíy ˈdaati ekemeyo-, mánká kikían. 5Máá tuuˈdle hí kiatoká ha yú hí ká geđia: Máá kinaallá he Máá fargogínt ˈguo-, gáál yieska, gáál ˈjiet biiyoká ki lalaanká. Hééllá taglé yú hí geđia, mú kiikiadhíe! 6Húrum chen hé gaalí saantím naam ma shugunîny? Waag íín hé húrmáách níínní hí in ká baađawká mán, muunîny? 7Metkícho dhúrlé hí gaa ˈgieká túóyle lulle hé Waag hí óg. Sierm hayyíe, itín it húrúm burnayká súm ˈdú ˈdúwa.

8Yú hí geeye, Máá gálaat metle yú ye mááchú gaa yeetká, máá kinaallá yáá Iny Máádhátallá Waag gállé ˈgasso-, urruká metle úba mááchú ha yú gaa yeedhe. 9Máá ye gálaat metle gaa điidhoká, máá kinaallá úba Waag gállé ˈgasso-, urruká metle ha yú gaa điidhma. 10Máá Iny Máádhat ˈdeeny ˈdeewká ki hodhoká, máá kinaallá héllé ˈdeeney kinaal Waag haí haađicha. Tá máá Hím Naasan Waaˈgiet chaaroká hé Waag hí ma haađiny, Waag ˈdéé haí ki iđimicha.

11Gaal hí ény ˈdiiyiminyká eey-, hí gál kaansúoká ubaa gál arráká met gaa kokuoka, hé hí hogotoká ubaa ˈdeeny hí gáál hol ˈdú nanniyyaká haí neesîny. 12Aadh ˈgas kinaallá tuuˈdle Hím Naasan Waaˈgiet hé hí hogotoká af haí ká fafiyya, Yíésu hí lalille yie.

Máá kamúrut đeechká hiblé

13Nyésébích kinaal mú tikiˈd Yíésu geey, kieye, Máá gáál he oonisúóllo, nyárchú géesh, aˈjibaat ˈjaakínyo hí nyí ˈdu gáá hayká, hí ye héchú gáá shuo, yie. 14Yíésu mú ˈdéé hol ˈdú nie, kieye, Musó, mááya ye máá arra hoy, hí hékícho eiy kí nannaa? mú yie. 15Aalé Yíésu gáál geey, kieye, Hol ˈdeeˈdemíe, hol gajált ka ridhdhíe. Máádhat sídhle hé aanylé burnay muí ˈguoká ma gaa iđiny, Yíésu hí gáál yie.

16Aalé mu hibéél gáál geey, mu kieye, Máá kamúrut mare ˈguom fie, ˈguom hí súm hite. 17Máá kamúrut kinaal geer ki tawue, kieye, Yáá ˈguomchú ál fuo mánnal, háte ˈdeeme? yie. 18Aalé mu kieye, Hatallá yú ˈdeeme, bushchú ha yú fufura, bush éíy taaka bushééllá ˈdú guguđoká ha yú ˈgieˈgia, bush ˈguomchú ubaa shokodaamchú lulle ha yú fafaa. 19Hé kinaal yú tág koyka, yú hatallá hol yeedhe, Yáá ˈguom warram ilishká gaa kokuoká ˈdés kodhdhe. Aalé héf ˈgita, héchú koo, he ˈjia, geyyee, hollo hol yeedhe, muí yie.

20Aalé Waag máá kinaal geeyche, kieye, Kó đeechal! Kúún chúúrééllá sídhkú ha yú egedhdhe. Tá hé hol tág ki koyyéél mááya hí higila? Waag hí mú chie, Yíésu hí gáál yie.

21Aalé Yíésu hibéél beeteká kieye, Máá hol kaamurasuo-, kor íín kamur Waaˈgiet mánká, máá kinaallá hát máá hí hibééllá gaa maalleká, yie.

Haí ger mare ˈgíiny

22Aalé Yíésu lalille geey, kieye, Hé kinaallá ˈdugaka in yú hí geđia, ˈGuom hí kokonyo-, hí sidh met gaa kokoyyoká gerle haí gaa ˈdeenêny. Đafaraam hí higisataká úba haí neesîny. 23Máádhat sídhle hé hé geere tákámle af ma ki iđiny. Máádhat gónle úba hé đafaraam tákámle af ma ki iđiny. 24Ebá yaalmit haara dhaayyíe. Hé ˈguom níínní he fafiyyo-, mumurat-, tá bush fafaatká mán. Waago hí wawaycha. Itín it tág súm kimír ˈdú ˈdúwa. 25Itín mááya sídhle ˈdú neeyka, sídhle á níínni mare úba mé ˈdeerneye? 26Har hé ninni hatallóóllá úba hí ma urinyka, háteeye héétí lulle hí nenesia?

27Ebá ísh lesiet kállányle dhaayyíe. Iish hé hujich ma nanniny, ubaa hé kírre ma susuny. Tá yú hí geeye, Sólomon giri kánsích ˈdúwaká onnoyká đafaraamlé fafadhdheká hé bís ˈdabaan-, iish kállányle hí ˈgúóllá mannay. 28It Waag iiy yeen hí ninníil! Waag har ísh halúg kúlíchal les gáá ˈdeˈdeen-, aadh ˈdaatika gaalí ˈjiet gaa verenóól in hatal buukaycha, mu bukam hatallo-, bís kallany a mé ˈdaatíká hé úba hí ma ki buukany? 29Héétí hé hí kokonyoká ubaa hé hí igiannoká haí ˈgar aayáˈginy, ubaa haí ger mare ˈgíiny. 30Kidh met lullé les gaa ijóóllá in hééllá lulle ˈgar aayaˈga. Tá ˈJaa kíchia Waag íín hééllá hát hí feˈdoká hé óg. 31Waag Guchle hol gaa ˈgeˈgedhée, aalé hééllá lulle úba Waag haí shigicha.

32Wala iraam mánnallo, haí biiy gaa kikían! ˈJaakícho hí Guch Waaˈgiet shiguoká hé tág fedo. 33Hé kíchia hí ˈgayyaká birm hidhdhíe, birm gál he maamanká eiy gisáa. Shomodhaam kamur Waaˈgiet ma ˈgiˈginká dhaadhíe. Kamurkícho hí kamur biiyo urati-, ma bebeenyká cheet. Úratíá hé máá buraa léká ál hí ˈdú naatká mán. Kamur Waaˈgiet urati kinaallá hé guur níínní hí ˈdeđeneychoká mán. 34Ál kamurkícho hí gaa iđoká, in tawunykícho hí gaa iđa, Yíésu hí gáál yie.

Gede tág ˈgieká

35Aalé Yíésu geđi lalille geey, kieye, Đafaraamkícho hát ˈdabaanká hitíe, edhekícho taalle hí booloon. 36Hát gál géde-, máállé guđo herginy álle sedheká met egesoká yiedhíe, giri mu karaf kí ˈdie-, gáál vieka, a tikiˈdeká mú đo gaalí karaf ki fuuroká. 37Gál gédeká máállé guđoká hol ká nadheka, íín in bano-, karaf gaa ˈgieka, ger haí gaa meedhe. Hé ˈdúwaká yú hí geeye, máá guđo kinaallá đafaraam gede hí ˈguoká hai higita, gáál kara ˈguomietká álle hai iđimia, gáál hai golmia. 38Máá guđoká hát káána chúúre hurtákaká yíekaʼ, héétí bár kí ˈjieka, mu gaal hátlé hújíchle gaa ˈgieká af kí ˈdieka, gál géde kinaallá đo ger haí gaa meedhe. 39Tá máá ˈbíl léká kúlích máá buraalléká hí gáá yiimetká onnônyka, mu hát máá buraa léká ˈbíl ma kí haađiny-, mu ˈbíl el ma fufuriny-, ˈbíl ma gaa buruminyká it óg. 40Hát tikiˈdéél itín úba tág ˈdée! Iny Máádhat aadh ˈgás giri itín hí ki muogká hai gáá ˈjeeme, Yíésu hí lalille yie.

41Bétiro Yíésu yiete, kieye, Máá Guđo, hibéél nyííni nyí ká geđichaa, ebá gálaat lullé geđicha? yie. 42Aalé Máá Guđo Yíésu kieye, Gédéch ˈdúwa-, ˈdaallé-, hújíchle hát ˈdabaanká nannuoká he gédéch máre? Gédéch kinaallá he gédéch máállé guđoká hí gede éíy taaka met gaa koyka, géde ˈguom aleđuđugul urgúa gaalí gaa shiguoká gaa shiguoká 43Tá gédéch kinaal máállé guđoká hí af kí ˈdie-, hújíchle tág gaa yaalka, ebá geer hí súm gaa meedhe! 44Yú hí hé ˈdúwaká geeye, máá guđo kinaallá héllé lulle ˈguoká gédéchlé kinaallá mé hai ki kokoo. 45Tá gédéch muí gede éíy taaka met gaa koyká har he ˈdeenítaka, hát he taawuoká kieye, Máá chia guđoká hé ál ˈjob ma gáá ˈjeeminyo, he yeedhe, đo gállé gede yaabká ubaa gede ˈdietká he mé ki yaalká hai tuutune, gál bersham hí fafaanká hollo hol ˈdoy, gáál ˈgarro he hol koey, gáál bersham ˈgarro hol iigime. 46Tá gédéch kinaallá aadh ˈgas ubaa kúlích he muogká máállé guđoká haí gáá ˈjeeme. Mú máállé guđo kinaallá mú hát ˈdeđewká he hai ki ekemeye, mú ál gálle ˈdeem el ma gaa igirinyká hai ki laama.

47Gédéch kinaal hát máállé guđoká hí fedeká óg-, kor ˈgíéríchle kinaal ma náan-, tág ma kônyká, máá kinaallá súmo gaalí tuuna. 48Gédéch máállé guđoká hátlé fedeká muog-, tá hé ˈdeew-, gaalí gaa tuunoká ekeyka, máá kinaallá taalle ha gaalí hagashia. Máá gaalí hé guđoká gíl fieká, hé guđoká gaalí gaa fede. Máá gaalí hé guđoká mé ki koyká, hé kinaallá hát ˈdabaanká tág ki yaalitlé gaalí gaa fede, Yíésu hí yie.

Yíésu he máá gálaat hol eiy gaa ˈgiˈgidhuoká

49Aalé Yíésu geđi kieye, Yú ka yimíéllá ˈjiete les ká sidhe, ˈjiet onnônyka kis ma bolónyol hemme. 50Yú yáá manyjasiny gaa nannaatká ˈguo. Manyjasiny kinaallá ˈdaab yú yé ma gaa ˈdíinyká geerle hé ye gaa ˈdeew! 51Tawunykíchoka, yú ka yimíéllá, naanná les ká sidhe? Yú hí geeye, yáá naanná les ma ka sîn. Yú hol eiy gaa ˈgiiˈgidhinyo les ká sidhe. 52Káána ke gaa ijo-, ˈjíig biiy met ki suoyééllá gál chen hol ki ˈdalidheká eiy hollo hol gaa ˈgiˈgita. Gáál seđ gáál naam af hai ká điidhma. Gáál naam gáál seđ af hai ká điidhma. 53Íny ˈjaalle af haí ká điidhma. Iny ˈjaalle af hai ká điidhma. Ini ˈjielle af haí ká điidhanna. Ini ˈjielle af hai ká điidhanna. Min suogle af haí ká điidhanna. Min suogle af hai ká điidhanna, Yíésu hí yie.

Yaalmit baralloká kimisan

54Yíésu geđi nyesebich geey, kieye, Nyáˈdow ˈdaa aadho yé gáá ˈdiiyye-, hí argiyyeka, ir hai ká tuuna, hí cheedhe. Ir đo hai ká tune. 55Héétí waanich he ˈdaa urru gáá ˈdoy-, hí argiyyeka, biiy hai gaa kaaˈda, hí cheedhe. Biiy đo hai gaa kaˈde. 56It hol ˈdug gáá sasalláal! It yaalmit lesietká ubaa yaalmit urruká hélle ógal, háteeye hí yaalmit barallóól hélle ma kiimisan?

57Háteka itín dhúrkícho hé midhabká ubaa hé ˈdeđewká hí hol eiy ma gaa nanninyal? 58Máádhat ko máá arra ˈdú egewka, hí síé gaa igiˈdaká, hol gár ˈdú naʼ, mu hai ko máá arra ˈdú éeny, máá arra hai ko máá yuoy mé ki yaalká gíl gaa káany, máá kinaal ko ˈbíl hiiginká gaa káany. 59Yú ko geeye, kó ˈbíl hiigin kinaallá yé ma gáá ˈdeeminy, ˈdaab bíre gaalí ko ki mureká lulle les ma fíiny-, bíre tikiˈd úba hí ma gaa lalanyká, Yíésu hí yie.

Currently Selected:

Lúka 12: dsh

Highlight

Copy