Lúka 10

Yíésu gál tomon tiiya a naamaká alb fie

1Waaséél Máá Guđo Yíésu gáál tomon tiiya tá a naam éíy taaka waaˈde. Mu gáál nanam hol ki ˈdane, gáál hol met nie, giri gaal ˈjien ubaa alb muí sienyle ˈgieká lulle gaalí sedhe. 2Mu gáál geey, kieye, ˈGuom hiteká hé tág guđo, tá gál hí mumuroká íín hé iraam mán. Máá Guđo-, ˈguom léká heetíe, muí gállé hí hujich ki nannuoká lesam ali ˈdú fuo, gaal hí mú ˈguom kí muro. 3Sedhíe. Bá dhaayyíe, yú albo hí fafaa, hát wala đányar hursam gaa seseenká haí cheedhe. 4Haí shomodhaam birmoká, tá tokolaam, ubaa koiy éíy taaka shúúnan. Hí ˈgierich gaa igiˈdaká haí alb ki ˈdeˈdéminy, hí gálaat naa chégen.

5ˈBíl mákárta-, hí higilloká er, ˈBílallá hí naanná yíéđuo, yiegedhíe. 6Máá naanná fedoká har ˈbíl kinaal gaa ijoka, af kinaallá naannakícho máá kinaallá hai buanna. Har máá naanná fedoká líítaka, naannakícho itle hollo hí hol ˈdu gáá naata. 7ˈBíl tikiˈde kinaallá gaa yíéđía. Hát giri máá hujich nuoká gaal hí símísle hol ˈdú nannuoká ˈguom gaalí ká shuoká kóo, hé imi gaalí ka shuoká ˈjía. Haí beríka ˈbílatí ˈdú gúúriny, beríka ˈbílatí ˈdú gúúriny.

8ˈJien hí ki faan-, gálle hí mé guđáan yeetká, hé gaalí afka iđuoká kóo. 9Gál basham ˈguo-, ál kinaal gaa ijoká bisía, gálaat geeyyíe, Guch Waaˈgiet hé hí kí ˈjobonte, yiedhíe. 10Tá ˈjien hí ki faan-, gálle hí mé guđáan ma yeenká, ˈjien kinaal ˈgíéríchlé hí hurt iifoká ki ˈdée, hatallá yiedhíe, 11Shere lés kíchia nyí ˈgas chiˈdééllá ˈgas ha nyí gaa ˈdooto, hí il gíl gaa helitkícho yeet. Tá onnóo, Guch Waaˈgiet hé ka ˈjobonte, yiedhíe. 12Yú hí geeye, kúlích ˈdeeká ali kí ˈdiiyyeka, ˈjien kinaallá hé il hí aargiˈdoká hé ˈjien Soˈdom il hí aargiˈdoká úba hí ˈdú kalat, Yíésu hí gáál yie.

13Aalé mu geđi kieye, Ény Korasinallo! Ény Beđesaidáállo! Hééllá onnóo! Hé burnay-, gálaat hí af ˈdaˈdabo-, yú hí hurt gaa ekeyká héle gaalí ˈjien Turo ubaa ˈjien Siˈdon gaa ekênyka, gál ˈjien kinaalloká kisso onnônyka he sharim hite, egem ˈjidhdhe, Waag makan fame. 14Kúlích Waag hí gálaat ˈdéé ki iđimichoká ali kí ˈdiiyyeka, itín manyjany il hí aargiˈdoká hé tág ˈdeew! Manyjany gál ˈjien Turo ubaa gál ˈjien Siˈdon il hí aargiˈdoká úba ˈdiefiyya. 15Tá kó ˈjien Kafarnaumallo, hollo hol ˈderneche-, úr nyoorónno? Kó úr ma nyuorminy! Kuun Waag hai ko gaanaycha, ál gál kufeká hí mé nannuoká ha gaa maanyjayya, muí yie. 16Aalé Yíésu geđi gál alb fimiká geey, kieye, Máá hí af maaloká, yaa ye af maale. Máá hí điidhoká, yaa ye điidhe. Héétí máá ye điidhoká, máá kinaallá Máá ye ali gáá kaayká úba he điidhe, Yíésu hí yie.

Gál giri tomon tiiya a naamaká hol ká nadhe

17Waaséél gál giri tomon tiiya a naamaká geyyiny hol kí nadhe, Yíésu geey, kieye, Máá Guđo, úba aryáán meenykú nyí viiyyeká đo nyí met gaa kiiyye, gaalí yie. 18Mu gáál ˈdéé hol ˈdú nie, kieye, Sátan hát ír birgianáka úr gáá ˈjiiyye-, les ˈdaraanneká yáá arge. 19Bá dhaayyíe, yáá hí fargogint itle hí chaara ubaa genyam met ˈdú ˈdiđianká shie. Hééllá ubaa kídhích kúnnaa Sátan fargoginsamle lulle hé hát níínní hí kokuoká mán. 20Tá aryaan hí met gaa kiiyyééllá gerle súm haí gaa méen. Hát meetkícho Waag hí úratí gaa veeˈdééllá ˈdaalle ki geyyée, Yíésu hí gáál yie.

21Ál tikiˈde kinaal Yíésu Hím Naasan Waaˈgiet hí geer gaa meeyche, mu kieye, Baabá, Máá Guđo úr ubaa les lééllo, ˈdaa giri kuun hé gál ˈdaalelle-, hínyaská in ká kaayyeká đalbááya eiy naasanle shiicheká, gielmitlé yú ko hol ˈdú gáá nannaa. Baabá, hé ˈduwa! Hééllá hát kuun hí feˈdeká, Yíésu hí yie.

22Aalé Yíésu geđi kieye, He met lulle hé ˈJaachú hí ye gíl ká fie. Yáá Ínyííllá hé máá níínní ye ogká mán, ˈJaa chia tákáma ye og. Héétí hé máá níínní ˈJaachú ogká mán, yáá mú Inylééllá ubaa gál yú wawarat-, yú ˈJaachú aargisuoká tákáma nyí og, Yíésu hí yie. 23Aalé Yíésu lalille bala ˈdú nie, ˈdéé hótal gaal íín tákámle geey, kieye, Gál hé itín hí argiyyééllá argoká ebá Waag hí ˈdú ˈjiiy! 24Yú hí geeye, gál héle Waag hí ˈdeem ka shigiche-, burnayká ubaa gál kaansúo-, burnayká hé itín hí argiyyééllá aargireká he fede, tá hé ma árginy. Gál kinaallá hé itín hí maallééllá úba mamaleká he fede, tá hé ma mááliny, Yíésu hí gáál yie.

Hib máá Samaria geer kurshachká

25Waaséél máá súm hemuumurit Waag hí Móshe ka shiicheká óg mare le gaa kie, Yíésu ˈdéé a kí dhaay, kieye, Máá gáál he oonisúóllo, háte yú ˈdeeme, tá yú luolmit biiyoká aargira? yie. 26Aalé Yíésu mú geey, kieye, Warˈgat Waaˈgiet meete gaalí gaa veere? Meete gaa tuoyche? yie. 27Máá giriká kieye, Warˈgát kieye, Máá Guđo Waag kuaká geerkú lulle ki géélneb, hodhinkú lulle ki géélneb, fargogintkú lulle ki géélneb, ubaa tawunykú lulle ki géélneb.#10:27 Hemuumurít ˈDéé Hótlé 6:5 Héétí máá olkú hát kúún dhúrkú hol gielallá úba géélnebo,#10:27 ˈDeemano Gál Levi 19:18 he chie, yie. 28Yíésu mú geey, kieye, Taglé hote. Aalé hat kinaallá ˈdé, luolmit biiyoká ha aargiˈda, mú yie.

29Tá máá giriká ˈdaa giri ˈduuwle gálaat aargisuoká fedoká, Yíésu heete, kieye, Máá olchú mááya? yie. 30Aalé Yíésu mú hát hibietká geey, kieye, Mú tikiˈd Yerúsalem gaa kie, Yeríko mé nannie. Mu ˈgíéríchlé gaa igireká mú gál buraa léká hí fame, hí tune, hí shokodich gaa uune. Gaal mú kúfach a bala gaa hay. 31Aalé máá suoryo-, Waaˈgiet mare ˈgíérích kinaal nadhe, mú ˈdu gáá suoy. Mú argeká đo a tame, ali gaa sedhe. 32Hát tikiˈdéél máá Levi mare úba ál kinaal ká nadhe, mú argeká đo a tame, ali gaa sedhe.

33Aalé máá Samaria mare sienylé gaa igireká, máá giri ali iifeká ˈdu gáá suoy. Mu mú argeká mú geer hí ˈdú gudhdhe. 34Mú ˈdú sedhe, mú lilo salab ubaa bersh ˈdúúká ˈdú fafie, lilo af đafaraam gaa hidhe. Aalé óllé he ˈgieká mú ˈdú iđie, mú ˈbíl dheeˈgo mare eey, mú ˈbíl gaa kaay, mú hol af saanie, mú hol af rafe. 35Burroká máá ˈbíl léká bíre shíí naam ki gusse, mú geey, kieye, Máállá wâsh, bírééllá beeyyeka, hé éíy mú ki waychoká yú hol ká nadheka, ewle ha yú ko kí higidha, mú yie.

36Aalé híb el hí ˈgidheká Yíésu mú heete, Máá gál buraa léká hí tunééllá tá gál seđééllá mááya mú máá ollé? yie. 37Máá giriká kieye, Máá mú ˈdú ˈjieká mú máá olle hé kinaallá, yie. Aalé Yíésu mú geey, kieye, Kúún sí, hát kinaallá úba ˈdeeˈdémo, mú yie.

Yíésu Márta ubaa María dheeg ˈdú sedhe

38Yíésu ubaa lalille sienylé gaa igireká, gaal é mé tikiˈd ki fame. Ál kinaal min gaalí Márta yegie mare gáál mé guđáan chie. 39Márta nyaarlé mare María gaalí yeedhe. María Yíésu ˈgas met gaa yíéđiyye, mú he onisinyle nee koyye. 40Márta hújích guđo giri nanniyyeká ˈdaalle ˈdugaka innum gaa tiiyye. Aalé Márta Yíésu ˈdú siete, kieye, Máá Guđo, nyaarchú hát ye hayche-, yú tákámchú gólol tág nannúól, hé ko geer ma gaa ˈdeeneny? Mú géesh, muí ká kie, muí ye hujich kí chirat, chie.

41Aalé Máá Guđoká mú ˈdéé hol ˈdú nie, kieye, Márta, Márta, kúún hé burnay tág nanniyyóóllá ko ˈgorosie, ko geer gaa ˈdeew. 42He tikiˈd tákáma ˈdúwa. Hé ˈdúwa kinaallá in María hí he toom gaa eete. Hé kinaallá gaalí mú gaa egeetká hé Waag hí iiy ma chegen, Yíésu hí Márta yie.

Currently Selected:

Lúka 10: dsh

Highlight

Copy