Yuána 2

Máá eedhdheká ˈjilalle álle Yíésu hí bie hol gaa lay

1Aalé ram seđ ˈgiteká ény Kanna giri lés Galilaayaká máádhat hí gaa eedhdhe. Yíésu ˈjielle hé ál kinaallá gaa iđe. 2Yíésu ubaa lalille úba gaalí kiere, sedhe. 3Aalé gál gaalí kiereká ˈduuny vinnaʼ#2:3 Vínnaʼ he ˈgór ááˈjant ki ég-, saanolle gaalí ˈduˈduo-, gaalí bersh tág gaa nannuoká. hí gaa beeyká Yíésu ˈjielle hí geeyche, kieye, ˈDuu hé gálaat gaa beey, mú chie. 4Yíésu ˈjielle ˈdéé hol ˈdú nie, kieye, ˈJíe, ye hash! Háte ye hatal geđichóol? Aleđuđugulchú hátle hé ali ma kí ˈdíiny, yie. 5Aalé Yíésu ˈjielle gál gálaat golmieká geeyche, kieye, Hé muí geeyoká tág kóo, gáál chie.

6Ál kinaallá ibilaam bie-, gaalí waar tág gaa nieká le hí ˈgie. Ibilaam kinaallá nyátál gál Yuuˈdika, bíé gaalí illam ki dhidhiroká, ubaa gaalí hol ki dhidhiroká gaalí fafaa. Ibil tikiˈdeká bie ˈdáb egeetká đudm guguđoká tomon naama, muuninyka, tomon seđe hí higila. 7Aaléka, Yíésu gál gálaat ˈdúú shigieká geey, kieye, Ibilaam bie fáa, yie. Gaal ibilaam bie kochkoch fie. 8Aalé mu geđi gáál geey, kieye, Ebá hé níínni gáá aría, máá ˈjila mé ki yaalká ˈdú sidháa, yie. Gaal đo hát kinaal ˈdie.

9Máá ˈjila mé ki yaalká bíé giri ˈdúú yieká meeteká, mu đo máá eedhdheká tól eedhdhe. Hééllá he ˈdaa giri ˈduu állé ka nadheká muí muog-, gál bie gáá arieká íín hí ógká. 10Aalé máá ˈjila mé ki yaalká mú geey, kieye, Gálaat lulle erkob ˈduuny midhabká he biiy met ká nannaa, tá waaséél gálaat ˈduu hí gaa nadheka, in ˈduuny ˈdúú elloká gaalí yé ká ˈdeđia, kor kuun káána kó ˈduuny midhaballá biiy el ki ete, yie. 11Hééllá Yíésu héllé erkob ekey-, gálaat hí af ˈdabe-, mu gálaat ˈduuwle argisieká. Hééllá ény Kanna giri lés Galilaayaká muí gaa ekey. Mu hééllá ekeyká, mú lalille đo mú iiy chie.

12Aaléka, héél đueká Yíésu kie, ˈjielle ubaa nyaaramle tá lalille hol eedhdhe, Kafarnáum mé nie. Gaal ál kinaal rám iraam mánká gaa rafe.

Yíésu ˈBíl Waaˈgietká gál hoyyo gaa arie

13ˈJila gál Yuuˈdi-, máá ˈgasso-, urru-, Waaˈgietká hí gáál ˈdug gaa nadheká ka tirtirayyeká Yíésu Yerúsalem mé nie. 14Mu hoy guđo-, ˈBíl Waaˈgiet náble gaa iđo-, ˈgúó ubaa wála tá hóle birm higiat-, ˈbaal karm birm hí ˈdug ˈdú ijoká lag ijo-, tá birm eiy gaa fufumuoká arge. 15Aalé mu massam anakoto hote, gálaat ubaa aanyle lulle ˈBíl Waaˈgiet náble geer gaa arie. Mu gál hol birm eiy ki fufumieká birmle okodie, karm abuunam mure. 16Mu gál hóle nyáláár geer gaa mamadieká ós ki koy, kieye, Hééllá állá geer yé gaa ˈdeeyyíe, ˈbíl ˈJaachú haí ál kíchia hoyyo hóson! gáál yie. 17Mú lalille đo ˈdeeny Warˈgat Waaˈgiet hí hote-, giri kieye, ˈGat yú ˈbílkú ka ˈguoká chiralle hé tág ye chies,#2:17 Warˈgat Arram 69:9 chieká, hí táb ká ˈjie.

18Aalé gál guguđo-, Yuuˈdiká mú yiete, kieye, Kúún ˈduuw máre ˈgayya, hééllá ki ekemeyche? Har ˈduuw kinaallá Waag gaa argiyyeka, ebá nyí hé gáál af ˈdaˈdabsuoká ka argísish, yie. 19Yíésu gáál ˈdéé hol ˈdú nie, kieye, ˈBílallá eiy ˈgieˈgía, ˈbíl kulich seđ gaa ˈdissa, yie. 20Aalé gál Yuuˈdiká kieye, ˈBíl gaalí warram tomon afur tá a le gaa ˈdisseká, háteeye kuun hí kulich seđ tákámle gaa ˈdiita? yie. 21Tá ˈbíl Yíésu hí ˈdeenyle hodhééllá íín he mú gónlé. 22Aalé af giri Waag Yíésu uushich yé gáá ˈdeeycheká mú lalille hé kisso-, muí hogodheká hí táb ká ˈjie. Gaal Warˈgat Waaˈgiet ubaa ˈdeeny Yíésu hí kis huogodheká iiy yie.

23Aalé Yíésu hátlé Yerúsalem álle ˈjila gaa ijeká, gál burnayká hé ke af ˈdaˈdabo-, muí eekemeyká argeká mú iiy yie. 24Tá Yíésu ˈdaa giri gálaat lulle yaalmisanolle eiy eiy ógká, hé gál kinaal hol ma ˈdú fáminy. 25Mu ˈdaa giri hé gaalí ger ka ˈguoká ógká, hé máá éíy taaka hegete-, hí ˈdeeny máádhat geđieká mán.

Currently Selected:

Yuána 2: dsh

Highlight

Copy