Yuána 16

1Hééllá lullé yú hí geeyallá, he giri iiy yeen kíchia hí ye ka ˈgayyaká hí ma haađinyká. 2Itín gaal ény ˈdiiyiminyká haí ká riidha. Tá bár gál hí yegeská kieye, Nyíín Waago nyí hujich ki nanniyya, yegetká, hé geđ igiˈdo. 3Gaal hí hééllá ki ekemeyóóllá he ˈdaa giri gaal ˈJaachú ubaa yú nyí muogká. 4Aaléka, yáá hí geey, giri hééllá bárle ali kí ˈdiiyyeka, hát yú hí geeyká hí táb ka ˈjeenká. ˈDaa giri kis ke hol ˈgieká in yú hí hééllá biiy ératíá ma gáá géeny.

Hím Naasan Waaˈgiet hújíchlé

5Tá káána yú Máá ye ali gáá kaayká bííylé mé nannaa, tá itín it máá níínní ye hegeset-, kieye, Ále seseenne? ye yegetká mán. 6ˈDaa giri yú hí hééllá geeyká, in ger hí gaa ˈdeenedhe. 7Tá yú hí hé ˈdúwaká geeye, kímchú hé hí ki midhab. Har yú ma kiinyka, Máá hí rangʼit yegetká hé hí ma ˈdu gáá yiimen. Tá yú sedheka, mú ali ha yú hí ˈdu gáá kakaa. 8Mu ká yimieka, gálaat tawunylé ˈdaa ađaabano-, ubaa he fedit Waaˈgiet-, tá ˈdéé ki iđiny Waaˈgietká hát gaalí taawuo-, tagle muuninyallá gáál eiy hai ki nannaa. 9Ađaabano muí gáál eiy ki nannúóllá hélle hééllá: Gaal ađaabano ˈgúóllá, he ˈdaa giri gaal ye iiy ma yéenká. 10Mu he fedit Waaˈgiet hélle gálaat eiy ki nannúóllá, he ˈdaa giri yú bííy ˈJaachú mé nannuo-, hí ye ál ˈjob ma gaa aargirinyká. 11Tá ˈdéé ki iđiny muí gálaat eiy ki nannúóllá, he ˈdaa giri Waag kis kánsích lesallo-, Sátan léká ˈdéé ki iđicheká.

12Yú yáá hé guđo-, hí ka geđuoká ˈguo, kor it káánallá hé kinaallá ma uriny. 13Tá Hím Naasan hí ˈduuw Waaˈgiet af ki tatiyyo kinaallá ká chimieka, he lullé ˈdúwaká af haí gáá kokoyyo. Mu hé hélle ma hogon, mu hé maaleká hai hogodho, hé geđ igiroká haí ká geđia. 14Mu héchú met hai ye gáá egedhdhe, haí ˈdu gáá siidha, eiy haí kí nannaa. Yaalmitééllá in mu ye ˈduuwasia. 15He lullé ˈJaachú hí léká, héchú. ˈDaa kinaallá in yú kieye, Hím Naasan héchú met hai ye gáá egeete, haí ˈdu gáá siita, eiy haí kí nanniyya, yú hí yie.

16It guch guđo hí yíéđiannoká mán it ye ma aargiriny, it guch guđo úba hí yíéđiannoká mán đo haí ye argiyye, Yíésu hí lalille yie.

Gál láliká ger gaa ˈdeenenle geyyiny yé hai ˈdú ˈdeenne

17Mú lalille ˈbaal hí hol heegesete, kieye, ˈDeeny muí hodhe-, mu kieye, It guch guđo hí yíéđiannoká mán it ye ma aargiriny, it guch guđo úba hí yíéđiannoká mán đo haí ye argiyye, muí yíéllá, kor hélle meete? Héétí ˈdeeny muí hodhe-, kieye, Yú ˈJaa chia bííyle mé nannaa, muí yíéllá, hélle úba meete? gaalí hol yie. 18Aalé gaal taalle hol heegete, kieye, Guch guđo mán, hélle meete? Hé muí hogodhóóllá, har ki múógaa! gaal hí hol yie.

19Yíésu hát gaalí ˈdéé hótal hegesetká kimite, gáál geey, kieye, He in hé yú hodhe-, yú kieye, It guch guđo hí yíéđiannoká mán, it ye ma aargiriny, it guch guđo úba hí yíéđiannoká mán đo haí ye argiyye, yú hí yíéllo, hélle hí hol hegesete? 20Yú hí hé ˈdúwaká geeye, itín haí beenne, imiro haí ˈjiibicha, les gálle íín ger haí gaa meedhe. Itín ger haí gaa ˈdeđendhe, tá ger gaa ˈdeenenkícho geyyiny yé hai ˈdú ˈdeenne. 21Min ˈdal hí ká chirate-, geer hí veerenneka, đo gon haí boloyye. Hol eiy niiyyeka, gon bolo he argiyyeká gíl sugó ki hayche, geer haí gaa meedhe, ˈdaa giri véel ˈdalleká. 22Aalé káánaka, itín it ger hí gaa ˈdeenedhe. Tá yú geđi hollo ke hol aargira, af kinaallá ger haí gaa meedhe, geyyiny kíchia kinaallá hé máá níínní hí gaa egeetká mán. 23Kúlích kinaallá it hé hí ye hegesetoká mán. Tá yú hí hé ˈdúwaká geeye, ˈJaachú hé hí ˈdaa meenychú ki hegesetoká haí ká shigia. 24It hátle hé hí ˈdaa meenychú ki ruogonneká mán. Roogonóo, he haí aargiˈda, ger súm haí gaa meedhe.

25Hééllá lulle hát he hol ki ekeny-, hibanoká yú hí ká geey. Tá aadh ˈgas yú hí hát he hol ki ekeny-, hibanoká ma ká geđiny-, yú hí yaalmit ˈJaachú hát ˈdabaanká ka geđuoká ali hai kí ˈdeenne. 26Kúlích kinaallá ˈdaa meenychú he haí ki rogononno. Tá yáá kieye, Itín ˈJaachú he yú hí kí rogonmo, hí ma yegen. 27ˈJaachú íín hé hí giel, ˈdaa giri itín hí ye giel-, ubaa yú hát Waag gáá yimieká hí iiy chieká. 28Yú ˈJaa chia gáá yimie, in lésallá mé ká nie. Aalé káána lésallá ha haađia, ˈJaa chia hol ˈdú naadha, Yíésu hí gáál yie.

29Aalé Yíésu lalille kieye, Đug, kó káána ˈdeeny édhká huogote, kó hibano hélle nyí eiy ma nannasanká ma húógon. 30Aaléka, hát kuun he lulle óg-, máá ko ˈdéé hol ˈdu gáá nannuo-, mánká nyáá nyí argiyye. Hééllá in hát kuun Waag gáá chimieká nyí iiy hoy, gaalí mú yie. 31Yíésu gáál ˈdéé hol ˈdú nie, kieye, Afééllo hí iiy chegedhe? 32Bá dhaayyíe, aadh ˈgas hé tág ká ˈjobonte, giri itín hí eiy baađayya-, hí eiy gaallaʼ-, hí ye tákámchú ká gaataká. Tá yáá tákámchú ma ká ˈgiisan, ˈJaachú nyáá nyí hol ˈgayya. 33Yú hí hééllá geeyallá, he giri ˈdaachúka, hí naanná aargiˈdaká. Lésallá he il haí gaa aargiˈda, tá haí ger mare ˈgíiny, yáá les ká adhdhe, muí gáál yie.

Currently Selected:

Yuána 16: dsh

Highlight

Copy