Marcos 16

Nabanhaw si Jesus

(Mat. 28:1-8; Luc. 24:1-12; Juan 20:1-10)

1Sa paglabay sa Adlawng Igpapahulay, si Maria Magdalena, si Maria nga inahan ni Santiago ug si Salome namalit ug mga pahumot aron idihog sa lawas ni Jesus. 2Ug sayo kaayo sa Domingo sa buntag, sa misubang na ang adlaw, miadto sila sa lubnganan. 3Sa ilang pagpanglakaw, nag-ingnanay sila, “Kinsa may atong paligiron sa bato aron pag-abli sa lubnganan?” 4(Dako kaayo kining batoha.) Unya sa pagtan-aw nila, ilang nakita nga naligid na ang bato nga gitabon sa lubnganan. 5Ug sa pagsulod nila sa lubnganan, nakita nila didto ang usa ka batan-ong lalaki. Naglingkod siya sa tuo nga daplin ug nagsul-ob ug puting sapot nga taas. Ug nangalisang sila.

6Apan miingon siya kanila, “Ayaw kamo kahadlok! Nangita kamo kang Jesus nga taga-Nazaret, ang gilansang sa krus? Wala na siya dinhi. Nabanhaw siya! Tan-awa ang ilang gibutangan kaniya. 7Lakaw#Mat. 26:32; Mar. 14:28. hinuon kamo ug suginli ang iyang mga tinun-an, lakip si Pedro, nga si Jesus nag-una kaninyo sa Galilea. Didto inyo siyang makita sumala sa iyang gisulti kaninyo.”

8Busa nanagan sila sa ilang pagpanggula gikan sa lubnganan tungod sa kakulba ug kalisang. Ug wala sila manulti kang bisan kinsa kay nahadlok man sila.

KARAANG KATAPOSAN#16:8 May mga sinulat nga wala maglakip niining kataposan sa Ebanghelyo (bersikulo 9-20).

Nagpakita si Jesus kang Maria Magdalena

(Mat. 28:9-10; Juan 20:11-18)

[ 9Human mabanhaw si Jesus sayo sa unang adlaw sa semana, mipakita siya pag-una kang Maria Magdalena. Kaniadto gihinginlan ni Jesus ang pito ka yawa nga diha sa maong babaye. 10Unya milakaw si Maria ug gipahibalo niya ang iyang mga kauban nga nagsubo ug naghilak. 11Sa pagkadungog nila nga si Jesus nabuhi ug nga si Maria nakakita kaniya, wala sila motuo.

Nagpakita si Jesus sa Duha Niya ka Tinun-an

(Luc. 24:13-35)

12Human niini, mipakita si Jesus sa laing paagi ngadto sa duha kanila samtang naglakaw sila padulong sa gawas sa siyudad. 13Namalik sila ug nanugilon sa uban apan wala sila tuohi.

Nagpakita si Jesus sa Napulog-Usa

(Mat. 28:16-20; Luc. 24:36-49; Juan 20:19-23; Buh. 1:6-8)

14Sa kataposan, mipakita si Jesus sa napulog-usa ka tinun-an samtang nangaon sila. Gisaway niya sila tungod sa ilang pagkakulang sa pagtuo ug pagkagahi sa ilang ulo kay wala man sila motuo niadtong nakakita kaniya nga nabanhaw. 15Miingon#Buh. 1:8. siya kanila, “Panglakaw kamo sa tibuok kalibotan ug isangyaw kining Maayong Balita ngadto sa tanang mga tawo. 16Ang motuo ug magpabunyag maluwas, apan ang dili motuo, silotan. 17Ug mao kini ang mga timaan nga mabatonan sa mga motuo: sa akong ngalan maghingilin silag mga yawa ug manulti silag lainlaing mga sinultihan. 18Makakupot silag mga halas ug kon makainom silag hilo, dili sila maunsa. Itapion nila ang ilang mga kamot sa mga masakiton ug mangaayo sila.”

Gibayaw si Jesus ngadto sa Langit

(Luc. 24:50-53; Buh. 1:9-11)

19Human#Buh. 1:9-11. makigsulti kanila ang Ginoong Jesus, gibayaw siya ngadto sa langit ug milingkod sa tuo sa Dios. 20Ug nanglakaw ang mga tinun-an ug nagsangyaw sa Maayong Balita sa tanang dapit. Mitabang gayod kanila ang Ginoo ug nagpamatuod sa ilang giwali pinaagi sa paghatag kanila ug gahom sa pagbuhat ug ilhanan.]

LAING KARAAN NGA KATAPOSAN#16:20 May mga sinulat ug karaang mga hubad nga naglakip niining mubo nga kataposan sa Ebanghelyo dugang sa mas taas nga kataposan (bersikulo 9-20).

[ 9 Nangadto dayon ang mga babaye kang Pedro ug sa iyang mga higala ug mihatag kanila ug mubo nga taho sa tanan nga gisulti kanila. 10 Human niini, gipadala ni Jesus ang balaan ug kanunayng buhi nga balita sa kaluwasan nga dayon. Gipadala niya kini pinaagi sa iyang mga tinun-an, gikan sa silangan ngadto sa kasadpan.]

Currently Selected:

Marcos 16: MBBCEB99

Highlight

Copy