MGA PANULTIHON 6
6
Dugang nga mga Pasidaan
1Anak ko, kon ikaw nahimong garantiya alang sa imong isigkatawo,
nakahatag sa imong saad alang sa usa ka langyaw;
2ikaw nalaang sa gibungat sa imong mga ngabil,#6:2 gibungat…ngabil: Sa Hebreo, mga pulong sa imong baba.
nadakpan diha sa mga pulong sa imong baba;
3buhata kini, anak ko, ug luwasa ang imong kaugalingon,
kay ikaw nahiadto sa gahom sa imong isigkatawo:
lakaw, pagdali,#6:3 pagdali o pagpaubos. ug pagpakiluoy sa imong isigkatawo.
4Ayaw hatagi ug katulog ang imong mga mata
o paghinanok ang imong mga tabontabon;
5luwasa ang imong kaugalingon sama sa usa ka lagsaw gikan sa mangangayam,#6:5 mangangayam: sa Hebreo, kamot.
sama sa usa ka langgam gikan sa kamot sa mangangayam sa langgam.
6Adto sa hulmigas, ikaw nga tapolan;
palandonga ang iyang mga pamaagi, ug pagmaalamon.
7Bisan walay labaw,
pangulo o tigmando,
8nag-andam siya sa iyang pagkaon panahon sa ting-init,
ug nagtigom sa iyang pagkaon panahon ting-ani.
9Hangtod kanus-a ba ikaw maghigda diha, O tapolan?
Kanus-a man ikaw mobangon gikan sa imong pagkatulog?
10 #
Pan. 24:33-34. Diyotay nga pagkatulog, diyotay nga paghinanok,
diyotay nga pagkiyugpos sa mga kamot aron sa pagpahulay,
11ug ang pagkakabos modangat kanimo sama sa usa ka latagaw,
ug ang kawalad-on sama sa usa ka tawo nga may hinagiban.
12Ang tawo nga walay hinungdan, tawo nga daotan,
magsuroysuroy nga daotan ang gipanulti,
13nagpangidhat sa iyang mga mata, mosinyas pinaagi sa iyang mga tiil,
magtudlo pinaagi sa iyang mga tudlo,
14uban sa daotan nga kasingkasing naglaraw ug daotan,
kanunayng nagpugas ug kasamok;
15busa ang katalagman modangat dayon kaniya;
sa kalit maguba siya nga dili na gayod maayo.
16Adunay unom ka butang nga gidumtan sa Ginoo,
pito ang dulumtanan niya:
17mapahitas-ong mga mata, bakakon nga dila,
ug mga kamot nga nag-ula ug dugo nga walay sala,
18kasingkasing nga naglaraw ug daotan,
mga tiil nga tulin nga modagan ngadto sa daotan,
19usa ka bakakon nga saksi nga nagsulti ug mga bakak,
ug usa ka tawo nga nagpugas ug kasamok diha sa mga kaigsoonan.
20Anak ko, tumana ang sugo sa imong amahan,
ug ayaw isalikway ang gitudlo sa imong inahan.
21Ibugkos kini kanunay sa imong kasingkasing;
ihigot kini sa imong liog.
22Sa diha nga ikaw maglakaw, kini magtultol kanimo;
sa diha nga ikaw matulog, kini magbantay kanimo;
ug sa diha nga ikaw magmata, kini makigsulti kanimo.
23Kay ang sugo maoy usa ka lampara, ug ang pagtudlo usa ka suga,
ug ang mga pagbadlong aron sa pagpanton maoy dalan sa kinabuhi,
24sa pagpalikay kanimo gikan sa daotang babaye,
gikan sa danglog nga dila sa usa ka asawa sa laing tawo.
25Ayaw tinguhaa ang iyang kaanyag diha sa imong kasingkasing,
ug ayaw pagpabihag kaniya pinaagi sa mga tabontabon sa iyang mga mata;
26kay ang usa ka babaye nga nagbaligya sa iyang dungog mahimong suholan ug usa ka buok pan#6:26 Sa Hebreo, kay tungod sa usa ka babayeng nagbaligya sa iyang dungog ngadto sa usa ka buok pan.
apan ang babayeng mananapaw#6:26 babayeng mananapaw: Sa Hebreo, asawa sa usa ka lalaki. mangita sa bililhon nga kinabuhi sa usa ka tawo.
27Makadala ba ug kalayo ang usa ka tawo diha sa iyang sabakan
ug ang iyang mga bisti dili masunog?
28O makalakaw ba ang usa ka tawo ibabaw sa init nga mga baga
ug ang iyang mga tiil dili mapaso?
29Mao usab siya nga mosulod ngadto sa asawa sa iyang silingan;
walay usa nga manghilabot kaniya nga dili silotan.
30Ang mga tawo dili magtamay#6:30 Ang…magtamay: o Dili ba nga ang mga tawo magtamay. sa usa ka kawatan kon siya mangawat
aron sa pagtagbaw sa iyang kaugalingon sa diha nga siya gigutom.
31Apan kon siya madakpan, mobayad siya ug pito ka pilo;
ihatag niya ang tanan niyang kabtangan sa iyang balay.
32Siya nga nakapanapaw walay salabotan;
siya nga nagbuhat niini naglaglag sa iyang kaugalingon.
33Mga samad ug kaulawan maoy iyang makuha,
ug ang iyang kaulawan dili na gayod mapapas.
34Kay ang pangabubho maghimo sa usa ka tawo nga masuk-anon,
ug dili siya maluoy sa dihang siya manimalos.
35Dili siya modawat ug bisan unsang bayad,
o malukmay bisan pa ug daghanon nimo ang mga gasa.
Currently Selected:
MGA PANULTIHON 6: ABCEB
Highlight
Share
Copy
Want to have your highlights saved across all your devices? Sign up or sign in
©Philippine Bible Society, 2011
