MGA PANULTIHON 18
18
1Siya nga dili makighugoyhugoy nangita sa iyang kaugalingong tinguha
sa nagsupak sa tanang maayo nga pagpanghukom.
2Ang usa ka buangbuang walay kalipay diha sa pagpanabot,
apan diha lamang sa pagpahayag sa iyang hunahuna.
3Kon ang pagkadaotan moabot, modangat usab ang pagyubit;
ug uban sa kaulawan modangat ang pagtamay.
4Ang mga pulong sa baba sa usa ka tawo lalom nga katubigan;
ang tuboran sa kaalam usa ka sapa nga nagbul-og.
5Dili maayo ang pagdapig sa tawong daotan,
o ang paghikaw sa hustisya gikan sa matarong.
6Ang mga ngabil sa buangbuang magdala ug panagbingkil,
ug ang iyang baba magpanawag ug pagbunal.
7Ang baba sa usa ka buangbuang maoy iyang kalaglagan,
ug ang iyang mga ngabil maoy lit-ag sa iyang kaugalingon.
8Ang mga pulong sa usa ka tabian sama sa usa ka lamian nga pagkaon;
kini manaog ngadto sa kinasulorang bahin sa lawas.
9Siya nga tapolan sa iyang buhat
igsoon niadtong naglaglag.
10Ang ngalan sa Ginoo maoy usa ka lig-ong tore;
ang matarong modagan ngadto niini ug maluwas.
11Ang bahandi sa usa ka adunahan nga tawo mao ang iyang lig-on nga siyudad,
ug sama sa usa ka habog nga paril diha sa iyang hunahuna.
12Sa dili pa ang pagkalaglag mapahitas-on ang kasingkasing sa tawo,
apan ang pagkamapaubsanon nag-una sa kadungganan.
13Kon ang usa ka tawo motubag sa wala pa siya makadungog,
kini iyang kabuang ug kaulawan.
14Ang espiritu sa usa ka tawo moantos sa balatian,
apan ang usa ka masulub-on nga espiritu, kinsa ang makaantos?
15Ang hunahuna nga may panabot makaangkon ug kahibalo,
ug ang igdulungog sa maalamon mangita sa kahibalo.
16Ang gasa sa usa ka tawo maghimo ug lawak alang kaniya,
ug magdala kaniya sa atubangan sa mga dagkong tawo.
17Siya nga unang magpadayag sa iyang katungod daw matarong,
hangtod nga ang uban moabot ug magsusi kaniya.
18Ang pagripa magtapos sa mga panagbingkil
ug maghukom taliwala sa mga gamhanan nga kabatok.
19Ang igsoon nga nahiubos sama sa usa ka lig-ong siyudad nga lisod sudlon,
apan ang panag-away sama sa mga trangka sa usa ka palasyo.
20Ang usa ka tawo mabusog gikan sa bunga sa iyang baba;
mabusog siya sa abot sa iyang mga ngabil.
21Ang kamatayon ug ang kinabuhi anaa sa gahom sa dila,
ug kadtong mahigugma niini magkaon sa mga bunga niini.
22Siya nga makakaplag ug asawa nakakaplag sa maayong butang,
ug makaangkon ug kahimuot gikan sa Ginoo.
23Ang kabos maggamit sa mga pagpangaliyupo,
apan ang adunahan magtubag nga magsingka.
24Adunay#18:24 adunay: Sa Hebreo: Ang usa ka tawo nga adunay. mga higala nga magpakaaron-ingnon nga mga higala,#18:24 nga mga higala: Sa Hebreo, nga mabungkag.
apan adunay usa ka higala nga magpabilin nga suod pa kay sa usa ka igsoon.
Currently Selected:
MGA PANULTIHON 18: ABCEB
Highlight
Share
Copy
Want to have your highlights saved across all your devices? Sign up or sign in
©Philippine Bible Society, 2011
