MGA TAGA-FILIPOS 4
4
Mga Pahimangno
1Busa, akong mga igsoon, hinigugma ug hinandom, akong kalipay ug purongpurong, barog kamo nga lig-on diha sa Ginoo, akong mga hinigugma.
2Akong gihangyo si Euodia ug si Sintique nga magkauyon diha sa Ginoo. 3Naghangyo usab ako kaninyo akong matuod nga kaubang magbubuhat, tabangi ang maong mga babaye nga naghago uban kanako diha sa Maayong Balita uban kang Clemente ug sa uban nakong mga kaubang magbubuhat nga ang mga ngalan anaa sa basahon sa kinabuhi.
4Paglipay kamo kanunay diha sa Ginoo; usbon nako pag-ingon, paglipay kamo. 5Ang inyong pagkamapailobon ipaila ninyo sa tanang mga tawo. Ang Ginoo duol na. 6Ayaw kamo kabalaka mahitungod sa bisan unsang butang, apan sa tanang butang ipahibalo ninyo sa Dios ang inyong mga hangyo pinaagi sa pag-ampo ug sa pagpangamuyo uban ang pagpasalamat. 7Ug ang kalinaw sa Dios nga milapaw sa tanang pagpanabot, magbantay sa inyong mga kasingkasing ug sa inyong mga hunahuna diha kang Cristo Jesus.
8Sa kataposan, mga igsoon, bisan unsang butang nga matuod, bisan unsang butang nga dungganan, bisan unsang butang nga matarong, bisan unsang butang nga putli, bisan unsang butang nga matahom, bisan unsang butang nga maayo ug dungog, kon aduna may labing maayo, kon aduna may pagdayeg, hunahunaa ninyo kining mga butanga. 9Buhata ninyo ang inyong nakat-onan ug nadawat ug nadungog ug nakita kanako ug ang Dios sa kalinaw mag-uban kaninyo.
Pasalamat ni Pablo sa Gasa
10Nalipay ako pag-ayo diha sa Ginoo nga karon sa kataposan gibuhi ninyo ang inyong kahangawa alang kanako. Tinuod nahangawa kamo kanako apan wala lamang kamoy higayon sa pagpakita niini. 11Wala ko kini isulti tungod sa akong kawalad-on, kay ako nakakat-on man sa pagpahaom sa akong kaugalingon sa bisan unsang kahimtang nga akong nahimutangan. 12Nasayod ako unsa ang kakabos ug unsa ang kabuhong, sa bisan unsa ug sa tanang pagkabutang, nasinati nako ang pagkabusog ug ang pagkagutom, ang kabuhong ug ang kawalad-on. 13Mahimo nako ang tanang butang diha kaniya nga naglig-on kanako.
14Hinuon maayo ang inyong gihimo sa inyong pagpakig-ambit sa akong kaguol. 15#2 Cor. 11:9. Kamong mga taga-Filipos nasayod nga sa pagsugod sa pagsangyaw sa Maayong Balita, sa paggikan nako sa Macedonia, walay iglesia nga nakig-ambit kanako diha sa paghatag ug sa pagdawat gawas kaninyo lamang, 16#Buh. 17:1. kay bisan gani didto sa Tesalonica, nagpadala man kamo kanako sa akong mga gikinahanglan sa makausa ug makaduha. 17Dili nga nagtinguha ako sa gasa kondili nagtinguha sa bunga nga nadugang sa inyong kaayohan. 18#Ex. 29:18. Apan ania na kanako ang tanang butang ug naghingapin pa gani. Nasangkapan na ako kay akong nadawat gikan kang Epafrodito ang mga butang gikan kaninyo, humot nga halad, usa ka halad nga inihaw nga hinangponon ug makapahimuot sa Dios. 19Ug ang akong Dios magsangkap sa tanan ninyong kinahanglanon sumala sa iyang kadato, sa himaya diha kang Cristo Jesus. 20Ngadto sa atong Dios ug Amahan ang himaya hangtod sa kahangtoran. Amen.
Mga Pangumosta
21Ipangumosta ako sa tanang balaan diha kang Cristo Jesus. Ang mga igsoon nga ania uban kanako nangumosta kaninyo. 22Ang tanang balaan ilabi na sa mga sakop sa panimalay ni Cesar, nangumosta kaninyo.
23Ang grasya sa Ginoong Jesu-Cristo mag-uban sa inyong espiritu.
Currently Selected:
MGA TAGA-FILIPOS 4: ABCEB
Highlight
Share
Copy
Want to have your highlights saved across all your devices? Sign up or sign in
©Philippine Bible Society, 2011
