NEHEMIAS 8

Gibasa ni Ezra ang Balaod Atubangan sa Katawhan

1Ug ang tanang katawhan nagkahiusa sa pagtigom didto sa hawanan atbang sa Ganghaan sa Tubig ug ilang gisultihan si Ezra nga eskriba sa pagdala sa basahon sa Balaod ni Moises, nga gihatag sa Ginoo ngadto sa Israel. 2Ug gidala ni Ezra nga pari ang Balaod sa atubangan sa katilingban, mga lalaki ug mga babaye ug ang tanan nga makadungog nga may pagpanabot, sa unang adlaw sa ikapito nga bulan. 3Ug siya nagbasa gikan niini nga nag-atubang sa hawanan atubangan sa Ganghaan sa Tubig sukad sa sayo sa buntag hangtod sa kaudtohon, sa atubangan sa mga lalaki ug sa mga babaye, ug niadtong mga makasabot. Ug ang mga dalunggan sa tanang katawhan namati sa basahon sa Balaod. 4Ug si Ezra nga eskriba mitindog ibabaw sa usa ka plataporma nga kahoy nga ilang gipabuhat pagtuyo, ug tupad kaniya nagtindog si Matitias, si Sema, si Anaias, si Urias, si Hilkias ug si Maasias dapit sa iyang tuo. Ug dapit sa iyang wala, si Pedaias ug si Misael, si Malkias ug si Hasum, ug si Has-badana, si Zacarias, ug si Mesulam. 5Ug gibukhad ni Ezra ang basahon diha sa panan-aw sa tibuok katawhan, kay siya naibabaw man sa tibuok katawhan, ug sa nabukhad na niya kini, ang tibuok katawhan nanindog. 6Unya gidayeg ni Ezra ang Ginoo, ang gamhanang Dios, ug ang tibuok katawhan mitubag, “Amen, Amen,” binayaw ang ilang mga kamot ug ilang giduko ang ilang mga ulo ug gisimba ang Ginoo nga ang ilang mga nawong nag-atubang sa yuta. 7Si Jesua usab, si Bani, si Serebias, si Jamin, si Akkub, si Sabetai, si Hodias, si Maasias, si Kelita, si Asarias, si Josabad, si Hanan, si Pelaias, ug ang mga Levihanon, mitabang sa katawhan aron sa pagsabot sa Balaod samtang ang katawhan nagpabilin sa ilang dapit. 8Ug sila mibasa gikan sa basahon, gikan sa Balaod sa Dios sa tin-aw gayod ug ilang gipasabot ang kahulogan nga tungod niana ang katawhan nakasabot sa gibasa.

9Ug si Nehemias nga gobernador ug si Ezra nga pari ug eskriba ug ang mga Levihanon nga nagtudlo sa katawhan miingon sa tanang katawhan, “Kining adlawa balaan alang sa Ginoo nga inyong Dios; ayaw kamo kasubo o paghilak.” Kay ang tanang katawhan nanghilak sa pagkadungog nila sa mga pulong sa balaod. 10Unya siya miingon kanila, “Padayon kamo; kan-a ang tambok ug imna ang tam-is nga bino ug pagpadala ug mga bahin kaniya nga walay giandam kay kining adlawa balaan alang sa atong Ginoo. Ug ayaw kasubo kay ang kalipay sa Ginoo maoy inyong kusog.” 11Busa gipahilom sa mga Levihanon ang tanang katawhan, nga nag-ingon, “Panghilom kamo kay kining adlawa balaan; ayaw kamo kasubo.” 12Ug ang tanang katawhan namauli aron sa pagkaon ug sa pag-inom, ug sa pagpadala ug mga bahin ug sa paghimo ug dagkong kalipay tungod kay sila nakasabot sa mga pulong nga gipahayag ngadto kanila.

Kasaulogan sa mga Balongbalong

13Sa ikaduha nga adlaw ang mga pangulo sa mga panimalay sa mga katigulangan sa tanang katawhan, uban ang mga pari ug ang mga Levihanon, nagkahiusa pag-adto kang Ezra nga eskriba aron sa pagpamati sa mga pulong sa balaod. 14#Lev. 23:33-36, 39-43; Deut. 16:13-15. Ug ila kining nakita nga nasulat diha sa Balaod nga ang Ginoo nagsugo pinaagi kang Moises nga ang katawhan sa Israel kinahanglang magpuyo sa mga balongbalong sa panahon sa kasaulogan sa ikapito nga bulan. 15Ug kinahanglan nga ilang isangyaw ug ipahibalo sa tanan nilang mga lungsod ug sa Jerusalem, “Lakaw kamo ngadto sa kabukiran ug pagdala ug mga sanga sa olibo, ihalas nga olibo, mirtol, palmira ug ubang kahoy nga dahonon aron buhaton nga mga balongbalong sumala sa nasulat.” 16Busa ang katawhan nanglakaw ug nagdala niini ug nagbuhat ug mga payag alang sa ilang kaugalingon, ang matag usa ibabaw sa iyang atop ug sa ilang mga hawanan ug sa mga hawanan sa balay sa Dios, ug sa hawanan dapit sa Ganghaan sa Tubig, ug sa hawanan dapit sa Ganghaan ni Efraim. 17Ug ang tibuok katilingban niadtong nahibalik gikan sa pagkabihag naghimo ug mga balongbalong, ug nagpuyo diha sa mga balongbalong kay sukad sa mga adlaw ni Josue nga anak ni Nun hangtod niadtong adlawa wala magbuhat sa ingon ang katawhan sa Israel. Ug may dako kaayong kalipay. 18Sa matag adlaw sukad sa unang adlaw hangtod sa kataposang adlaw, siya nagbasa gikan sa basahon sa Balaod sa Dios. Ug ilang gituman ang kasaulogan sulod sa pito ka adlaw ug sa ikawalo nga adlaw adunay balaang panagtigom sumala sa tulumanon.

Currently Selected:

NEHEMIAS 8: ABCEB

Highlight

Copy