MARCOS 6

Si Jesus Gisalikway Didto sa Nazaret

(Mat. 13:53-58; Luc. 4:16-30)

1Si Jesus mibiya gikan didto ug miadto sa iyang kaugalingong lungsod ug ang iyang mga tinun-an mikuyog kaniya. 2Ug sa pag-abot sa adlaw nga igpapahulay, siya misugod sa pagpanudlo sulod sa sinagoga. Daghan ang nakadungog kaniya ug nahibulong nga nag-ingon, “Diin ba niya kuhaa kining mga butanga? Ug unsa bang kaalama ang gihatag kaniya, ug ang mga milagro nga nahimo pinaagi sa iyang mga kamot? 3Dili ba siya mao man ang panday, nga anak ni Maria ug igsoon nila ni Santiago ug ni Jose ug ni Judas ug ni Simon? Ug dili ba ang iyang mga igsoong babaye ania man uban kanato?” Ug nasuko sila kaniya. 4#Juan 4:44. Unya si Jesus miingon kanila, “Ang propeta dungganan gayod gawas lamang sa iyang kaugalingong lungsod ug sa iyang kaugalingong kadugo ug sa iyang kaugalingong panimalay.” 5Ug didto wala siya makahimo ug mga milagro gawas sa pagtapion sa iyang mga kamot sa pipila ka masakiton ug iyang gipang-ayo sila. 6Ug nahibulong siya tungod sa ilang pagkawalay pagtuo.

Ug miadto siya libot sa mga kabalangayan ug nanudlo.

Gipadala ni Jesus ang Napulo ug Duha

(Mat. 10:5-15; Luc. 9:1-6)

7Ang napulo ug duha iyang gitawag ngadto kaniya ug gisugdan niya ang pagpadala kanila nga tinagurha, ug gihatagan niya sila ug kagahom batok sa mga hugaw nga espiritu. 8#Luc. 10:4-11. Gitugon niya sila sa dili pagdala ug bisan unsa alang sa ilang panaw, gawas sa sungkod, walay pan, walay bag, walay salapi sa ilang mga bakos, 9gawas sa pagsul-ob ug sandalyas, apan dili magsul-ob ug duha ka bisti. 10Ug siya miingon kanila, “Asa gani kamong balaya modayon, pabilin kamo didto hangtod sa inyong pagbiya sa maong dapit. 11#Buh. 13:51. Kon sa bisan diing dapit kamo dili dawaton ug dili pamation, inigbiya ninyo, itaktak ang mga abog nga anaa sa inyong mga tiil ingon nga pasidaan batok kanila.” 12Busa nanglakaw sila ug nagwali nga kinahanglang maghinulsol ang mga tawo. 13#San. 5:14. Gipanghinginlan nila ang daghang mga demonyo, ug gihidhiran nila ug lana ang daghang mga masakiton ug gipang-ayo sila.

Ang Pagkamatay ni Juan nga Tigbautismo

(Mat. 14:1-12; Luc. 9:7-9)

14 # Mat. 16:14; Mar. 8:28; Luc. 9:19. Unya si Hari Herodes nakadungog niini, kay ang ngalan ni Jesus nabantog na man. Ug dihay mga nag-ingon, “Si Juan nga Tigbautismo gibanhaw gikan sa mga patay ug mao kanay hinungdan nga kining mga gahoma naglihok diha kaniya.” 15Apan ang uban nag-ingon, “Kini mao si Elias.” Ug ang uban nag-ingon, “Siya usa ka propeta, sama sa propeta sa kakaraanan.” 16Apan sa pagkadungog niini ni Herodes, siya miingon, “Si Juan nga akong gipapunggotan ug ulo nabanhaw.” 17Kay si Herodes mismo nagsugo sa pagdakop kang Juan ug nagpagaid kaniya sa bilanggoan tungod kang Herodias nga iyang gipangasawa bisan kini asawa ni Felipe nga iyang igsoon. 18#Luc. 3:19-20. Kay si Juan miingon man kang Herodes, “Dili uyon sa balaod ang pag-angkon nimo sa asawa sa imong igsoon.” 19Ug si Herodias nasilag kang Juan ug buot unta niyang patyon siya. Apan wala siya makahimo niini, 20tungod kay si Herodes nahadlok man kang Juan, kay nahibaloan man niya nga siya matarong ug balaan nga pagkatawo, ug gipanalipdan niya siya. Ug sa iyang pagkadungog kang Juan, siya nalibog pag-ayo#6:20 nalibog pag-ayo: Sa ubang karaang sinulat, daghan ug gibuhat. apan iyang gikalipay ang pagpamati kang Juan. 21Apan miabot ang higayon sa diha nga si Herodes, sa kasumatan sa iyang adlawng natawhan, naghimo ug kombira alang sa iyang mga pangulong kawani ug sa mga pangulo sa kasundalohan ug sa mga kadagkoan sa Galilea. 22Sa diha nga ang babayeng anak ni Herodias#6:22 ang babayeng anak ni Herodias: Sa ubang karaang sinulat, ang iyang anak nga babaye nga si Herodias. misulod ug misayaw, nakapahimuot siya kang Herodes ug sa iyang mga dinapit ug ang hari miingon sa dalaga, “Pangayo kanako sa bisan unsa nga buot nimo ug ihatag ko kini kanimo.” 23Ug nanumpa si Herodes kaniya, “Bisan unsay imong pangayoon kanako, ihatag ko kini kanimo bisan pa ang katunga sa akong gingharian.” 24Unya ang dalaga migula ug nangutana sa iyang inahan, “Unsa bay akong pangayoon?” Ug siya mitubag, “Ang ulo ni Juan nga Tigbautismo.” 25Dihadiha midali siya sa pagsulod ngadto sa atubangan sa hari ug kaniya mihangyo siya nga nag-ingon, “Buot nako nga karon dayon ihatag nimo kanako ang ulo ni Juan nga Tigbautismo, sinulod sa bandihado.” 26Ang hari nasubo gayod pag-ayo apan tungod sa iyang mga panumpa ug sa iyang mga dinapit, dili niya buot balibaran ang dalaga. 27Dihadiha gisugo sa hari ang usa ka sundalo sa mga bantay sa pagdala sa ulo ni Juan. Ug ang sundalo misulod ug gipunggotan si Juan sa ulo didto sa sulod sa bilanggoan 28ug gidala ang ulo nga gibutang diha sa bandihado ug gihatag kini sa dalaga ug kini gihatag usab sa dalaga ngadto sa iyang inahan. 29Sa pagkadungog niini sa mga tinun-an ni Juan, nangadto sila ug gikuha nila ang iyang lawas ug gipahiluna kini sa usa ka lubnganan.

Gipakaon ni Jesus ang Lima ka Libo ka Tawo

(Mat. 14:13-21; Luc. 9:10-17; Juan 6:1-14)

30Unya ang mga apostoles mibalik ngadto kang Jesus ug gisugilon kaniya ang tanan nga ilang nahimo ug gipanudlo. 31Ug siya miingon kanila, “Pangadto kamo nga kamokamo ra sa usa ka dapit nga awaaw, ug pamahulay kamo sa makadiyot.” Kay daghan man ang nangabot ug namiya, ug wala na silay higayon sa pagpangaon. 32Ug sakay sa sakayan nangadto sila sa usa ka dapit nga awaaw nga silasila ra. 33Apan daghan ang nakakita kanila sa ilang paggikan ug nakaila kanila, ug kini sila midali pagpanagan paingon sa maong dapit gikan sa tanang kalungsoran, ug miabot sila didto nga una pa kanila. 34#Num. 27:17; 1 Hari 22:17; 2 Cron. 18:16; Ezek. 34:5; Mat. 9:36. Sa pagkawas ni Jesus, nakita niya ang usa ka dakong panon sa mga tawo ug siya naluoy kanila kay sila sama man sa mga karnero nga walay tigbantay, ug siya misugod sa pagtudlo kanila ug daghang mga butang. 35Ug sa pagkahapon na kaayo, miduol kaniya ang iyang mga tinun-an ug miingon, “Awaaw kining dapita ug karon hapon na kaayo. 36Palakta na sila ngadto sa silingang mga dapit ug kabalangayan aron makapamalit sila ug makaon.” 37Apan siya mitubag kanila, “Kamoy maghatag kanila ug makaon.” Ug sila miingon kaniya, “Mangadto ba kami sa pagpalit ug balig duha ka gatos ka denario#6:37 DENARIO: Mobili balig usa ka adlawng suhol sa yanong mamumuo. nga pan, ug among ipakaon kanila?” 38Ug siya miingon kanila, “Pila ba ka buok ang inyong pan? Adtoa ug susiha ninyo.” Ug sa nasayran na nila, sila miingon, “Lima, ug duha ka buok isda.” 39Unya gisugo niya silang tanan sa pagpanglingkod nga magpundokpundok diha sa lunhawng mga balili. 40Sa tinag-100 ug tinag-50 sila nagpundokpundok ug nanglingkod. 41Ug sa nagkupot siya sa lima ka pan ug duha ka isda, miyahat siya sa langit ug nagpasalamat. Ug gipikaspikas niya ang mga pan ug gihatag ngadto sa iyang mga tinun-an aron idulot ngadto sa katawhan ug iyang gibahinbahin ang duha ka isda alang kanilang tanan. 42Ug nangaon silang tanan ug nangabusog. 43Ug ilang nahipos ang napulo ug duha ka bukag nga puno sa mga tipik sa pan ug sa isda. 44Ang mga nangaon sa pan mga lima ka libo ka lalaki.

Si Jesus Milakaw sa Ibabaw sa Tubig

(Mat. 14:22-27; Juan 6:15-21)

45Unya gipasakay dayon niya sa sakayan ang mga tinun-an ug gipauna kaniya ngadto sa pikas nga daplin, sa Betsaida, samtang gipapauli niya ang panon sa katawhan. 46Ug sa nakapanamilit na siya kanila, miadto siya sa bungtod aron mag-ampo. 47Sa pagkakilomkilom na, ang sakayan didto na sa tunga sa lanaw, ug siya mao rang usa niadtong dapita. 48Nakita niya sila nga naglisod sa pagbugsay, kay sungsongon man ang hangin. Ug sa mga ikaupat nga hugna sa kagabhion,#6:48 HUGNA SA KAGABHION: Ang mga Romanhon nagbahin sa kagabhion sa upat ka hugna. Ang mga Judio nagbahin niini sa tulo. Tan-awa sa Lucas 12:38. miadto siya kanila nga naglakaw ibabaw sa tubig ug tuyo unta niya ang pagsaylo kanila. 49Apan sa ilang pagkakita kaniya nga naglakaw ibabaw sa tubig, nagtuo sila nga siya usa ka multo ug sila naniyagit, 50kay silang tanan nakakita man kaniya ug nangalisang sila. Apan dihadiha misulti siya kanila ug miingon, “Ayaw kamo ug kahadlok, ako kini! Salig lamang kamo.” 51Unya siya misakay sa sakayan uban kanila, ug ang hangin milurang. Ug nahibulong gayod sila pag-ayo 52kay wala man sila makasabot mahitungod sa pan, hinuon ang ilang mga kasingkasing nagmagahi.

Giayo ni Jesus ang mga Masakiton Didto sa Genesaret

(Mat. 14:34-36)

53Sa dihang nakatabok na sila, miabot sila sa yuta sa Genesaret ug midunggo sa baybayon. 54Ug sa pagkawas na nila sa sakayan, dihadiha sa pagkaila sa mga tawo kaniya, 55nanagan sila libot sa tanang dapit niadtong yutaa ug gisugdan nila sa pagdala ang mga masakiton nga diha sa mga higdaanan ngadto sa bisan diing dapit, diin atua siya sumala sa ilang madunggan. 56Bisan diin siya moadto, sa mga kabalangayan, sa mga siyudad o sa kaumahan, gipahimutang nila ang mga masakiton diha sa mga taboan, ug nagpakiluoy sila kaniya nga pahikapon unta sila bisan na lang sa sidsid sa iyang bisti. Ug nangaayo ang tanang nakahikap niini.

Currently Selected:

MARCOS 6: ABCEB

Highlight

Copy