MARCOS 10
10
Ang Gitudlo ni Jesus Mahitungod sa Panagbulag
1Si Jesus mibiya didto ug miadto sa kayutaan sa Judea ug sa tabok sa Jordan, ug didto gipundokan na usab siya sa mga panon sa katawhan ug ingon sa iyang nabatasan, gitudloan na usab niya sila. 2Unya dihay mga Pariseo nga miduol kaniya, ug aron sa pagsulay kaniya nangutana sila kaniya, “Uyon ba sa balaod alang sa usa ka lalaki ang pagbulag sa iyang asawa?” 3Siya mitubag kanila, “Unsa may gisugo ni Moises kaninyo?” 4#Deut. 24:1-4; Mat. 5:31. Sila miingon, “Si Moises mitugot sa lalaki sa paghimo ug sulat sa pakigbulag, ug sa pagbulag kaniya.” 5Apan si Jesus miingon kanila, “Tungod sa kagahi ninyo ug kasingkasing, nagsulat siya kaninyo sa maong sugo. 6#Gen. 1:27; 5:2. Apan sukad sa sinugdan sa kabuhatan, ‘Ang Dios nagbuhat kanila nga lalaki ug babaye.’ 7#Gen. 2:24. ‘Tungod niini, ang lalaki mobiya sa iyang amahan ug inahan ug motipon sa iyang asawa,#10:7 ug motipon sa iyang asawa: Ang ubang karaang sinulat wala niini. 8ug ang duha mahimong usa ka unod.’ Sa ingon niana, dili na sila duha kondili usa ka unod. 9Busa unsa ang gihiusa sa Dios, ayaw ipabulag sa tawo.”
10Unya diha sa sulod sa balay gipangutana na usab siya sa mga tinun-an mahitungod niini. 11#Mat. 5:32; 1 Cor. 7:10-11. Ug siya miingon kanila, “Si bisan kinsa nga mobulag sa iyang asawa ug unya mangasawa ug lain, nakapanapaw siya batok sa iyang unang asawa, 12ug kon siya mao ang mobulag sa iyang bana ug unya mamana ug lain, nakapanapaw siya.”
Gipanalanginan ni Jesus ang Gagmayng mga Bata
(Mat. 19:13-15; Luc. 18:18-30)
13Unya dihay gagmayng mga bata nga ilang gidala kaniya aron unta iyang hikapon apan gibadlong sila sa mga tinun-an. 14Apan sa pagkakita ni Jesus niini, nasuko siya ug miingon kanila, “Paduola kanako ang gagmayng kabataan, ug ayaw ninyo sila pugngi kay ang gingharian sa Dios ila sa mga sama kanila. 15#Mat. 18:3. Sa pagkatinuod, sultihan ko kamo nga si bisan kinsa nga dili modawat sa gingharian sa Dios sama sa pagdawat sa usa ka gagmayng bata, dili gayod siya makasulod niini.” 16Ug gikugos niya sila ug gipanalanginan samtang gipandongan niya sila sa iyang mga kamot.
Ang Dato ug Batan-ong Pangulo
(Mat. 19:16-30; Luc. 18:18-30)
17Sa paggula niya diha sa dalan, dihay tawo nga midagan ngadto kaniya ug miluhod sa iyang atubangan ug nangutana kaniya, “Maayong Magtutudlo, unsa bay akong buhaton aron ako makapanunod sa kinabuhing dayon?” 18Si Jesus miingon kaniya, “Nganong gitawag man nimo ako nga maayo? Walay bisan usa nga maayo gawas sa Dios lamang. 19#Ex. 20:13; Deut. 5:17; Ex. 20:14; Deut. 5:18; Ex. 20:15; Deut. 5:19; Ex. 20:16; Deut. 5:20; Ex. 20:12; Deut. 5:16. Nahibalo ikaw sa kasugoan: ‘Ayaw panapaw, Ayaw pangawat, Ayaw pagsaksi ug bakak, Ayaw panikas, Tahora ang imong amahan ug inahan.’ ” 20Ug siya miingon kang Jesus, “Magtutudlo, kanang tanan akong gituman sukad pa sa akong pagkabatan-on.” 21Ug si Jesus nga nagsud-ong kaniya, nahigugma kaniya ug miingon kaniya, “Kulang ikaw ug usa ka butang. Lakaw, ibaligya ang imong katigayonan ug panghatag ngadto sa mga kabos ug makabaton ikaw ug bahandi didto sa langit, ug unya balik dinhi ug sunod kanako.” 22Ang tawo naminghoy tungod sa maong pulong, ug milakaw siya nga masulob-on kay siya aduna may dakong katigayonan.
23Samtang milibot pagtan-aw si Jesus, miingon siya sa iyang mga tinun-an, “Pagkalisod gayod alang sa mga adunay bahandi sa pagsulod sa gingharian sa Dios!” 24Ug ang mga tinun-an nahibulong sa iyang mga pulong. Apan si Jesus misulti kanila pag-usab nga nag-ingon, “Mga anak, pagkalisod gayod#10:24 Ang ubang karaang sinulat nagdugang dinhi ug alang niadtong nagsalig sa bahandi. sa pagsulod sa gingharian sa Dios! 25Sayon pa sa kamilyo ang paglusot sa lungag sa dagom kay sa usa ka dato ang pagsulod sa gingharian sa Dios.” 26Ug hilabihan gayod ang ilang katingala ug sila miingon sa usa ug usa, “Unya kinsa na man lang diay ang maluwas?” 27Ug si Jesus misud-ong kanila ug miingon, “Sa mga tawo dili gayod kini mahimo, apan sa Dios mahimo, kay sa Dios mahimo man ang tanan.” 28Si Pedro misugod sa pag-ingon kaniya, “Tan-awa, amo nang gibiyaan ang tanan ug misunod kami kanimo.” 29Si Jesus miingon, “Sa pagkatinuod, sultihan ko kamo, nga walay bisan usa nga nagbiya ug balay o mga igsoong lalaki o mga igsoong babaye o inahan o amahan o mga anak o kayutaan tungod kanako ug tungod sa Maayong Balita 30nga dili makadawat ug usa ka gatos ka pilo dinhi niining kinabuhia karon sa mga balay ug mga igsoong lalaki ug mga igsoong babaye ug mga inahan ug mga anak ug mga kayutaan uban sa mga paglutos ug unya sa kapanahonan nga umaabot, kinabuhing dayon. 31#Mat. 20:16; Luc. 13:30. Apan daghan niadtong nag-una maulahi ug kadtong naulahi mag-una.”
Sa Ikatulo Gipasidaan ni Jesus ang Iyang Kamatayon
(Mat. 20:17-19; Luc. 18:31-34)
32Ug didto sila sa dalan, nagtungas paingon sa Jerusalem ug si Jesus nag-una kanila, ug nahibulong sila ug ang mga nagsunod nangahadlok. Ug sa nalain na usab niya ang napulo ug duha, gisugdan niya sila sa pagsugilon mahitungod sa mahitabo kaniya. 33Siya miingon, “Tan-awa, nagtungas kita karon padulong sa Jerusalem ug ang Anak sa Tawo itugyan ngadto sa mga pangulong pari ug sa mga eskriba, ug siya hukman nila sa kamatayon ug itugyan ngadto sa mga Gentil, 34ug siya ilang bugalbugalan ug latigohon ug patyon, apan siya mabanhaw human sa tulo ka adlaw.”
Ang Hangyo ni Santiago ug ni Juan
(Mat. 20:20-28)
35Ug miduol kaniya si Santiago ug si Juan nga mga anak ni Zebedeo, nga nag-ingon, “Magtutudlo, gusto unta namo nga imong buhaton kanamo ang bisan unsa nga among pangayoon kanimo.” 36Ug siya miingon kanila, “Kay unsa bay gusto ninyong buhaton nako kaninyo?” 37Unya mitubag sila kaniya, “Itugot nga manglingkod kami, ang usa anha sa imong tuo ug ang usa anha sa imong wala didto unya sa imong himaya.” 38#Luc. 12:50. Apan si Jesus miingon kanila, “Wala kamo mahibalo sa inyong gipangayo. Makahimo ba kamo sa pag-inom sa kupa nga akong giimnan, o sa pagpabautismo sa bautismo nga gibautismo kanako?” 39Sila mitubag kaniya, “Makahimo kami.” Ug si Jesus miingon kanila, “Sa kupa nga akong giimnan moinom kamo, ug sa bautismo nga gibautismo kanako bautismohan kamo, 40apan ang paglingkod dapit sa akong tuo o sa akong wala, dili akoa ang pagtugot, kini alang lamang kanila nga gitagan-an niini.” 41Ug sa dihang nakadungog niini ang napulo, misugod sila sa pagkasuko batok kang Santiago ug kang Juan. 42Ug gitawag sila ni Jesus ngadto kaniya ug miingon siya kanila, “Kamo nasayod nga ang mga giila nga mga pangulo sa mga Gentil nagharihari ibabaw kanila, ug ang ilang mga kadagkoan nagmando kanila. 43#Luc. 22:25-26. Apan dili kini angayng mahitabo kaninyo, kondili, kadtong buot mahimong dako diha kaninyo, kinahanglan nga mahimong inyong alagad, 44#Mat. 23:11; Mar. 9:35; Luc. 22:26. ug kadtong buot mohawod kaninyo, kinahanglan nga mahimong ulipon sa tanan. 45Kay ang Anak sa Tawo wala moanhi aron alagaran kondili aron sa pag-alagad ug sa paghatag sa iyang kinabuhi ingon nga lukat alang sa daghan.”
Giayo ni Jesus si Bartimeo nga Buta
(Mat. 20:29-34; Luc. 18:35-43)
46Unya miabot sila sa Jerico ug sa dihang mibiya na siya sa Jerico kauban sa iyang mga tinun-an ug sa usa ka dakong panon sa katawhan, naglingkod didto sa daplin sa dalan ang usa ka makililimos nga buta nga si Bartimeo, anak ni Timeo. 47Sa pagkadungog niya nga kadto mao diay si Jesus nga Nazaretnon, misugod siya sa pagsinggit ug nag-ingon, “Jesus, Anak ni David, kaluy-i ako!” 48Ug daghan ang mibadlong kaniya sa paghilom, apan misamot hinuon siya sa pagsinggit, “Anak ni David, kaluy-i intawon ako!” 49Unya si Jesus mihunong ug miingon, “Tawga siya.” Ug ilang gitawag ang buta ug giingnan siya, “Ayaw kahadlok, tindog, gitawag ikaw niya.” 50Giwakli niya ang iyang kupo ug midali pagtindog ug miduol siya kang Jesus. 51Ug si Jesus miingon kaniya, “Unsa may buot nimo nga buhaton nako alang kanimo?” Ug mitubag kaniya ang buta, “Magtutudlo, makakita na unta ako.” 52Si Jesus miingon kaniya, “Lakaw! Ang imong pagtuo nakapaayo kanimo.” Ug dihadiha nakakita na siya ug mikuyog siya kang Jesus diha sa dalan.
Currently Selected:
MARCOS 10: ABCEB
Highlight
Share
Copy
Want to have your highlights saved across all your devices? Sign up or sign in
©Philippine Bible Society, 2011
