MARCOS 1
1
Ang Pagsangyaw ni Juan nga Tigbautismo
(Mat. 3:1-12; Luc. 3:1-9, 15-17; Juan 1:19-28)
1Ang sinugdan sa Maayong Balita mahitungod kang Jesu-Cristo, ang Anak sa Dios.#1:1 Anak sa Dios: Ang ubang karaang sinulat wala niini.
2 #
Mal. 3:1. Ingon sa gisulat ni Isaias nga propeta,
“Tan-awa, ipadala nako ang akong
sinugo nga maoy mag-una kanimo;
siya mao ang mag-andam sa imong dalan,
3 #
Isa. 40:3 (LXX). ang tingog nga nagsinggit diha sa kamingawan,
‘Andama ninyo ang dalan alang sa Ginoo,
tul-ira ninyo ang iyang mga agianan—’ ”
4si Juan nga Tigbautismo mitungha#1:4 nga Tigbautismo mitungha: Sa ubang mga sinulat, mitungha nga nagbautismo. didto sa kamingawan ug nagwali mahitungod sa bautismo sa paghinulsol alang sa kapasayloan sa mga sala. 5Ug nangadto kaniya ang tanang katawhan sa tibuok Judea ug ang katawhan sa Jerusalem. Sila gibautismohan niya didto sa Suba sa Jordan, sa pagsugid sa ilang mga sala. 6#2 Hari 1:8. Si Juan nagsul-ob ug bisti nga balhibo sa kamilyo ug may bakos nga panit diha sa iyang hawak, ug ang iyang kan-onon dulon ug dugos nga ihalas. 7Ug nagwali siya nga nag-ingon, “Sunod kanako moabot ang labaw pang gamhanan kay kanako, nga bisan gani ang pagyuko aron sa paghubad sa higot sa iyang sandalyas dili ako takos. 8Ako nagbautismo kaninyo sa tubig apan siya magbautismo kaninyo sa Espiritu Santo.”
Ang Pagbautismo ug Ang Pagtintal Kang Jesus
(Mat. 3:13-17; Luc. 3:21-22; Mat. 4:1-11; Luc. 7:1-13)
9Niadtong mga adlawa miabot si Jesus gikan sa Nazaret sa Galilea ug siya gibautismohan ni Juan didto sa Jordan. 10Sa iyang paghaw-as gikan sa tubig, dihadiha nakita niya nga nabukas ang kalangitan ug ang Espiritu mikunsad diha kaniya sama sa salampati. 11#Gen. 22:2; Sal. 2:7; Isa. 42:1; Mat. 3:17; 12:18; Mar. 9:7; Luc. 3:22. Ug gikan sa langit nadungog ang usa ka tingog, “Ikaw ang akong Anak nga pinalangga, kanimo nalipay ako.”
12Dihadiha ang Espiritu miabog kaniya ngadto sa kamingawan. 13Sulod sa 40 ka adlaw didto siya sa kamingawan, gitintal ni Satanas, ug siya uban sa mga ihalas nga mananap apan dihay mga anghel nga miatiman kaniya.
Gitawag ni Jesus ang Upat ka Mangingisda
(Mat. 4:12-17; Luc. 4:14-15; Mat. 4:18-22; Luc. 5:1-11)
14Unya human sa pagdakop kang Juan, si Jesus miadto sa Galilea, nagwali sa Maayong Balita gikan sa Dios 15#Mat. 3:2. ug nag-ingon, “Ang panahon miabot na, ug ang gingharian sa Dios ania na. Paghinulsol ug tuo kamo sa Maayong Balita.”
16Samtang naglakaw siya daplin sa Lanaw sa Galilea, nakita niya si Simon ug si Andres nga igsoon ni Simon, nga namukot diha sa lanaw kay mga mangingisda man sila. 17Ug si Jesus miingon kanila, “Sunod kamo kanako ug himoon ko kamong mga mananagat ug tawo.” 18Dihadiha gibiyaan nila ang ilang mga pukot ug misunod kaniya. 19Sa nagpadayon siya paglakaw sa unahan ug diyotay, nakita niya si Santiago nga anak ni Zebedeo ug si Juan nga igsoon ni Santiago nga nag-ayo sa mga pukot diha sa ilang sakayan. 20Ug dihadiha gitawag niya sila, ug gibiyaan nila ang ilang amahan nga si Zebedeo diha sa sakayan kauban sa mga sinuholan ug misunod sila kaniya.
Ang Tawo nga Nasudlan ug Hugaw nga Espiritu
(Luc. 4:31-37)
21Unya nangadto sila sa Capernaum ug dihadiha sa adlaw nga igpapahulay misulod siya sa sinagoga ug nagtudlo. 22#Mat. 7:28-29. Nahibulong sila sa iyang gipanudlo, kay siya nagtudlo man kanila ingon nga may kagahom ug dili sama sa mga eskriba. 23Ug dihadiha, sa ilang sinagoga didtoy tawo nga gisudlan ug usa ka hugaw nga espiritu. 24Misinggit siya nga nag-ingon, “Unsay imong tuyo kanamo, Jesus nga Nazaretnon? Mianhi ba ikaw aron sa paglaglag kanamo? Nakaila ako kon kinsa ikaw, ang Balaan sa Dios.” 25Apan gibadlong siya ni Jesus nga nag-ingon, “Hilom, ug gula gikan kaniya!” 26Ug ang hugaw nga espiritu nga mipalimbaglimbag pag-ayo sa tawo, migula gikan kaniya nga nagsiyagit sa kusog nga tingog. 27Nahibulong silang tanan, nga tungod niana nangutana sila sa usa ug usa nga nag-ingon, “Unsa ba kini? Usa ka bag-ong pagtulun-an! Uban sa kagahom mosugo siya bisan pa sa mga hugaw nga espiritu, ug sila motuman kaniya.” 28Ug ang iyang kabantog mikaylap dayon sa tanang kasikbit nga kayutaan sa Galilea.
Giayo ni Jesus ang Daghang mga Tawo
(Mat. 8:14-17; Luc. 4:38-41)
29Dihadiha sa paggawas nila gikan sa sinagoga, misulod sila sa balay ni Simon ug ni Andres, uban si Santiago ug Juan. 30Ang babayeng ugangan ni Simon naghigda kay gihilantan man, ug gisuginlan dayon nila si Jesus mahitungod kaniya. 31Ug giduol niya siya ug gikuptan ug gipatindog. Ug gihuwasan siya sa hilanat ug mialagad kanila.
32Unya sa pagkakilomkilom, sa pagsalop na sa adlaw, gidala nila ngadto kaniya ang tanang mga masakiton ug ang mga nasudlan ug demonyo. 33Ug ang mga tawo sa tibuok lungsod nagtapok atubangan sa pultahan. 34Giayo niya ang daghang nangasakit sa nagkalainlaing mga balatian. Gipagula niya ang daghang mga demonyo ug wala niya tugoti ang mga demonyo sa pagsulti kay nakaila man sila kaniya.
Nagwali si Jesus Didto sa Galilea
(Luc. 4:42-44)
35Unya sayo sa kaadlawon samtang ngitngit pa, si Jesus mibangon ug miadto sa usa ka dapit nga mingaw, ug didto nag-ampo siya. 36Gipangita siya ni Simon ug sa iyang mga kauban, 37ug sa nakit-an na nila siya, sila miingon kaniya, “Ang tanan nangita kanimo.” 38Siya miingon kanila, “Mangadto kita sa ubang dapit sa mga silingang kalungsoran aron magwali usab ako didto kay mao kanay hinungdan ngano nga mianhi ako.” 39#Mat. 4:23; 9:35. Ug gilibot niya ang tibuok Galilea, nagwali siya sulod sa ilang mga sinagoga ug naghingilin sa mga demonyo.
Gihinloan ni Jesus ang Usa ka Sanlahon
(Mat. 8:1-4; Luc. 5:12-16)
40Unya didtoy usa ka sanlahon nga miduol ug nagpakiluoy kaniya ug samtang nagluhod miingon kaniya, “Kon buot nimo, makahinlo ikaw kanako.” 41Ug puno sa kaluoy, gituyhad ni Jesus ang iyang kamot ug mihikap sa sanlahon ug miingon kaniya, “Buot ako, mahinlo ikaw.” 42Dihadiha nahanaw ang iyang sanla ug nahinlo siya. 43Ug si Jesus mipahimangno kaniya sa higpit gayod, ug mipalakaw dayon kaniya, 44#Lev. 14:1-32. ug miingon kaniya, “Bantayi nga wala ka gayoy isulti kang bisan kinsa apan lakaw, ipakita ang imong kaugalingon ngadto sa pari ug himoa ang halad nga gisugo ni Moises mahitungod sa imong pagkahinlo, ingon nga pagpamatuod ngadto sa katawhan.” 45Apan milakaw siya ug misugod sa pagpanugilon nga walay lipodlipod mahitungod niini ug sa pagsabwag sa balita, nga tungod niana si Jesus dili na makahimo sa dayag nga pagsulod ug lungsod, kondili didto na lamang siya sa mga dapit nga awaaw. Ug ang mga tawo nangadto kaniya gikan sa tanang dapit.
Currently Selected:
MARCOS 1: ABCEB
Highlight
Share
Copy
Want to have your highlights saved across all your devices? Sign up or sign in
©Philippine Bible Society, 2011