MATEO 21

Ang Madaogong Pagsulod sa Jerusalem

(Mar. 11:1-11; Luc. 19:28-40; Juan 12:12-19)

1Ug sa dihang duol na sila sa Jerusalem ug miabot na sa Betfage, sa Bungtod sa mga Olibo, si Jesus nagsugo ug duha ka tinun-an 2ug giingnan sila, “Lakaw kamo nianang balangay sa atbang ug didto makita dayon ninyo ang usa ka asno nga gihigot, ug ang usa ka nati uban niini. Hubari ninyo sila ug dad-a dinhi kanako. 3Ug kon adunay mosulti ug bisan unsa kaninyo, ingna lang siya, ‘Ang Ginoo nagkinahanglan kanila,’ unya iya dayong ipadala sila.” 4Nahitabo kini aron matuman ang gisulti pinaagi sa propeta nga nag-ingon,

5 # Zac. 9:9. “Suginli ninyo ang babayeng anak sa Zion,

tan-awa, ang imong hari moanha kanimo,

malumo ug nagkabayo sa asno,

ug sa iyang nati, ang laki nga anak sa asno.”

6Ug ang mga tinun-an milakaw ug gibuhat nila ang gisugo ni Jesus kanila. 7Ilang gidala ang asno ug ang nati ug kini ilang gihapinan sa ilang mga bisti ug mikabayo siya niini. 8Ug ang dakong panon sa mga tawo namukhad sa ilang mga bisti diha sa dalan ug ang uban namutol ug mga sanga sa mga kahoy ug gihanig kini sa dalan. 9#Sal. 118:25-26. Ug ang mga panon sa katawhan nga nag-una ug nagsunod kaniya naninggit nga nag-ingon, “Hosanna,#21:9 HOSANNA: Hebreo nga pulong nga sa ato pa, Luwasa kami, nga nahimong singgit sa pagdayeg. sa Anak ni David! Dalaygon ang mianhi sa ngalan sa Ginoo! Hosanna sa kahitas-an!” 10Ug sa pagsulod na niya sa Jerusalem, naukay ang tibuok siyudad nga nag-ingon, “Kinsa ba kini siya?” 11Ug ang mga panon sa katawhan miingon, “Mao kini ang propeta nga si Jesus gikan sa Nazaret sa Galilea.”

Miadto si Jesus sa Templo

(Mar. 11:15-19; Luc. 19:45-48; Juan 2:13-22)

12Unya si Jesus misulod sa Templo ug iyang gihinginlan ang tanang namaligya ug namalit diha sa Templo ug iyang gipanglimbuwad ang mga lamisa sa mga tigpangilis ug salapi ug ang mga lingkoranan sa mga namaligya ug salampati. 13#Isa. 56:7; Jer. 7:11. Ug miingon siya kanila, “Nasulat, ‘Ang akong balay tawgon nga balay ampoanan,’ apan gihimo ninyo kini nga langob sa mga tulisan.”

14Ug didto sa Templo miduol kaniya ang mga buta ug mga bakol, ug giayo niya sila. 15Apan sa diha nga ang mga pangulong pari ug ang mga eskriba nakakita sa mga kahibulongang butang nga iyang gibuhat ug sa mga kabataan nga nanghugyaw sulod sa Templo nga nag-ingon, “Hosanna, Anak ni David!” sila nangasuko. 16#Sal. 8:2 (LXX). Ug sila miingon kaniya, “Nakabati ka ba sa ilang giingon?” Ug si Jesus miingon, “Oo, ug wala ba kamo makabasa niini,

‘Gikan sa baba sa mga gagmayng bata ug sa mga masuso

gihingpit nimo ang pagdayeg’?”

17Ug gibiyaan niya sila ug migula siya sa siyudad paingon sa Betania ug nagpabilin siya didto.

Gitunglo ni Jesus ang Kahoyng Igera

(Mar. 11:12-14, 20-26)

18Sayo sa pagkabuntag, sa pagbalik niya sa siyudad, gigutom siya. 19Ug sa pagkakita niya sa usa ka kahoyng igera diha sa daplin sa dalan, giduol niya kini, ug wala siyay nakaplagan niini gawas sa mga dahon lamang. Ug giingnan niya kini, “Sukad karon dili ka na gayod makapamunga pag-usab.” Ug ang kahoyng igera nalaya dayon. 20Sa pagkakita niini sa mga tinun-an, sila nahibulong ug miingon, “Giunsa ba sa kahoyng igera pagkalaya dayon?” 21#Mat. 17:20; 1 Cor. 13:2. Si Jesus mitubag nga nag-ingon kanila, “Sa pagkatinuod, sultihan ko kamo, kon aduna kamoy pagtuo ug dili magduhaduha, makahimo kamo dili lamang sa nahimo ngadto sa kahoyng igera, kondili bisan pag moingon kamo niining bukira, ‘Maalsa ka ug matambog ngadto sa lawod,’ kini mahimo. 22Ug ang tanang butang nga inyong pangayoon pinaagi sa pag-ampo madawat ninyo kon aduna kamoy pagtuo.”

Pangutana Mahitungod sa Kagahom ni Jesus

(Mar. 11:27-33; Luc. 20:1-8)

23Unya sa pagsulod niya sa Templo, ang kadagkoan sa mga pari ug ang mga pangulo sa lungsod miduol kaniya samtang nagtudlo siya ug miingon sila kaniya, “Pinaagi sa unsang kagahom nga gihimo nimo kining mga butanga ug kinsa may naghatag kanimo sa maong kagahom?” 24Sa pagtubag, si Jesus miingon kanila, “Aduna usab akoy ipangutana kaninyo ug kon inyo akong tug-anan niini, tug-anan ko usab kamo sa unsang kagahom nga gihimo nako kining mga butanga. 25Ang pagpamautismo ni Juan, diin man kini gikan? Gikan sa langit o gikan sa mga tawo?” Ug gitimbangtimbang nila kini diha sa ilang kaugalingon nga nag-ingon, “Kon moingon kita, ‘Gikan sa langit,’ moingon siya kanato, ‘Nganong wala man lagi ninyo siya tuohi’? 26Ug kon moingon kita, ‘Gikan sa tawo,’ nahadlok kita sa katawhan kay ang tanan miila man nga si Juan propeta.” 27Busa gitubag nila si Jesus, “Wala kami mahibalo.” Ug siya miingon kanila, “Dili ko usab kamo tug-anan sa unsang kagahom nga gihimo nako kining mga butanga.

Ang Sambingay Mahitungod sa Duha ka Anak nga Lalaki

28“Unsay inyong hunahuna niini? Usa ka tawo may duha ka anak nga lalaki ug miadto siya sa usa ug miingon kaniya, ‘Anak, lakaw ug pagbuhat didto sa parasan karon.’ 29Ug siya mitubag, ‘Dili ako.’ Apan sa ulahi nagbasol siya ug miadto. 30Ug ang tawo miadto sa ikaduha niyang anak ug gisultihan sa mao gihapon ug kini mitubag kaniya, ‘Moadto ako, Tay.’ Apan wala siya moadto. 31Hain man niining duha ang nagtuman sa kabubut-on sa iyang amahan?” Sila miingon, “Ang nauna.” Ug si Jesus miingon kanila, “Sa pagkatinuod, sultihan ko kamo, ang mga tigpaningil ug buhis ug ang mga babayeng nagbaligya sa dungog mosulod sa gingharian sa Dios una pa kay kaninyo. 32#Luc. 3:12; 7:29-30. Kay si Juan mianhi kaninyo ug nagtultol sa dalan sa pagkamatarong ug wala kamo motuo kaniya apan ang mga tigpaningil ug buhis ug ang mga babayeng nagbaligya sa dungog mituo kaniya. Ug bisan sa pagkakita ninyo niini, wala gihapon kamo maghinulsol sa kaulahian ug wala motuo kaniya.

Ang Sambingay Mahitungod sa mga Saop sa Parasan

(Mar. 12:1-12; Luc. 20:9-19)

33 # Isa. 5:1-2. “Paminawa ninyo ang lain pang sambingay. May usa ka tawong yutaan nga nagtanom ug parasan ug kini iyang gilibotan ug paril, gibuhatan ug pigsanan sa ubas ug usa ka lantawanan. Gipasaopan niya kini ug unya milangyaw siya ngadto sa laing dapit. 34Ug sa nagsingabot na ang tingpamupo, gipaadto niya ang iyang mga ulipon ngadto sa mga saop aron sa pagdawat sa abot niini. 35Apan ang iyang mga ulipon gidakop sa mga saop ug ilang gibunalan ang usa ug ilang gipatay ang usa ug ang usa ilang gibato. 36Unya nagpadala na usab siya ug laing mga ulipon nga daghan pa kay sa una, ug kini ila gihapong gibuhatan sa ingon. 37Sa kataposan, iyang gipaadto ang iyang anak ngadto kanila. Miingon siya, ‘Motahod sila sa akong anak.’ 38Apan sa pagkakita sa mga saop sa anak, sila miingon sa ilang kaugalingon, ‘Mao kini ang manununod. Tana, patyon nato siya aron maato ang iyang panulondon.’ 39Ug gidakop nila siya ug gidala ngadto sa gawas sa parasan ug gipatay. 40Busa inig-abot sa tag-iya sa parasan, unsa may buhaton niya sa maong mga saop?” 41Sila miingon kaniya, “Patyon gayod niya ang maong mga daotang tawo ug ang parasan iyang pasaopan sa laing mga saop nga mohatag sa abot sa panahon sa tingpamupo.”

42 # Sal. 118:22-23. Unya si Jesus miingon kanila, “Wala ba kamo makabasa niini diha sa kasulatan,

‘Ang bato nga gisalikway sa mga tigtukod

nahimong ulohang bato nga patukoranan;

buhat kini sa Ginoo

ug makapahibulong gayod kini sa atong mga mata’?

43Busa sultihan ko kamo nga ang gingharian sa Dios kuhaon gikan kaninyo ug ihatag ngadto sa usa ka nasod nga namunga sa mga bunga niini. [44Ang mahulog sa ibabaw niining batoha mabuak, apan ang mapusdakan niining batoha mapulpog.”]#21:44 Ang ubang karaang sinulat wala niining bersikuloha.

45Ug sa pagkadungog sa mga pangulong pari ug sa mga Pariseo sa iyang mga sambingay, nakasabot sila nga nagsulti siya mahitungod kanila. 46Ug sa dihang gisulayan nila ang pagdakop kaniya, nahadlok sila sa katawhan, kay giila man nila siya nga propeta.

Currently Selected:

MATEO 21: ABCEB

Highlight

Copy