MATEO 19

Pagtulun-an Mahitungod sa Pakigbulag

(Mar. 10:1-12; Luc. 16:18)

1Unya sa dihang nahuman si Jesus sa pagsulti niining tanan, mibiya siya sa Galilea ug miadto sa Judea dapit sa kayutaan nga tabok sa Jordan. 2Unya misunod kaniya ang dagkong mga panon sa katawhan ug didto giayo niya sila.

3Ug dihay mga Pariseo nga miduol aron sa pagsulay kaniya nga nag-ingon, “Uyon ba sa Balaod alang sa usa ka tawo#19:3 alang sa usa ka tawo: Wala kini sa ubang karaang sinulat. ang pagbulag niya sa iyang asawa sa bisan unsang hinungdan?” 4#Gen. 1:27; 5:2. Siya mitubag nga nag-ingon, “Wala ba kamo makabasa nga ang nagbuhat kanila sa sinugdan nagbuhat kanila nga lalaki ug babaye, 5#Gen. 2:24. ug miingon, ‘Tungod niini biyaan sa lalaki ang iyang amahan ug inahan ug makigtipon sa iyang asawa, ug silang duha mahimong usa?’#19:5 usa: Sa Grego, usa ka unod. 6Sa ingon niini dili na sila duha kondili usa ka unod. Busa, unsay gihiusa sa Dios, ayaw ipabulag sa tawo.” 7#Deut. 24:1-4; Mat. 5:31. Sila miingon kaniya, “Nganong nagsugo man si Moises sa paghatag ug sulat sa pakigbulag ug sa pagbulag kaniya?” 8Siya miingon kanila, “Tungod sa kagahi ninyo ug kasingkasing, gitugotan na lang kamo niya sa pagbulag sa inyong asawa, apan sa sinugdan dili kini ingon niana. 9#Mat. 5:32; 1 Cor. 7:10-11. Ug sultihan ko kamo, si bisan kinsa nga mobulag sa iyang asawa, nga dili tungod sa pagluib,#19:9 pagluib: Ang ubang karaang sinulat nagdugang human niini ug, nagtukmod kaniya sa pagpanapaw. ug unya mangasawa siya ug lain, siya nakapanapaw.”#19:9 Ang ubang karaang sinulat nagdugang ug, ug ang mangasawa sa usa ka babayeng binulagan, nakapanapaw.

10Unya ang iyang mga tinun-an miingon kaniya, “Kon mao kanay kahimtang sa lalaki uban sa iyang asawa, maayo pa nga dili magminyo.” 11Apan siya miingon kanila, “Dili ang tanang tawo makadawat niining sultiha kondili sila lamang nga gihatagan sa katakos sa paghimo niini. 12Kay adunay mga yunoko nang daan sukad pa sa ilang pagkahimugso ug adunay mga yunoko nga gihimong yunoko sa mga tawo ug adunay nahimong yunoko sa ilang kaugalingong kabubut-on tungod sa gingharian sa langit. Ang makahimo pagdawat niini, padawata niini.”

Gipanalanginan ni Jesus ang Gagmayng mga Bata

(Mar. 10:13-16; Luc. 18:15-17)

13Unya dihay gagmayng mga bata nga gidala ngadto kaniya aron iyang tapin-an sila sa iyang kamot ug iampo. Gibadlong sa mga tinun-an ang mga tawo, 14apan si Jesus miingon, “Paduola kanako ang gagmayng kabataan ug ayaw ninyo sila pugngi kay ang gingharian sa langit ila sa mga sama kanila.” 15Ug iyang gitapin-an sila sa iyang mga kamot ug unya milakaw.

Ang Batan-ong Dato

(Mar. 10:17-31; Luc. 18:18-30)

16Ug unya, dihay miduol kaniya nga nag-ingon, “Magtutudlo, unsa ang maayo nakong buhaton aron makaangkon ako ug kinabuhing dayon?” 17Ug siya miingon kaniya, “Nganong mangutana man ikaw kanako mahitungod sa maayo? Usa lamang ang maayo. Kon buot kang mosulod sa kinabuhi, tumana ang kasugoan.” 18#Ex. 20:13; Deut. 5:17; Ex. 20:14; Deut. 5:18; Ex. 20:15; Deut. 5:19; Ex. 20:16; Deut. 5:20. Siya miingon kaniya, “Unsang sugoa?” Ug si Jesus miingon, “Ayaw pagpatay, Ayaw panapaw, Ayaw pangawat, Ayaw pagsaksi ug bakak, 19#Ex. 20:12; Deut. 5:16; Lev. 19:18. Pasidunggi ang imong amahan ug inahan, ug Higugmaa ang imong silingan sama sa imong kaugalingon.” 20Ang batan-on miingon kaniya, “Kanang tanan akong gituman, unsa pa may akong kulang?” 21Si Jesus miingon kaniya, “Kon buot kang mahingpit, lakaw, ibaligya ang imong kabtangan ug ang halin ihatag sa mga kabos ug makabaton ikaw ug bahandi didto sa langit; unya balik ug sunod kanako.” 22Apan sa pagkadungog sa batan-on niining pulonga, milakaw siya nga masulob-on kay daghan man siya ug katigayonan.

23Unya si Jesus miingon sa iyang mga tinun-an, “Sa pagkatinuod, sultihan ko kamo, nga lisod sa usa ka dato ang pagsulod sa gingharian sa langit. 24Ug sultihan ko pa gayod kamo, sayon pa sa kamilyo ang paglusot sa lungag sa dagom kay sa usa ka dato sa pagsulod sa gingharian sa Dios.” 25Sa pagkadungog sa mga tinun-an niini, natingala sila pag-ayo ug miingon, “Busa kinsa na man diay ang maluwas?” 26Si Jesus mitan-aw kanila ug miingon, “Sa tawo, dili kini mahimo apan sa Dios ang tanan mahimo.” 27Unya si Pedro mitubag nga nag-ingon, “Tan-awa, gibiyaan namo ang tanan ug misunod kami kanimo. Unsa man diay ang among mapaabot?” 28#Mat. 25:31; Luc. 22:30. Si Jesus miingon kanila, “Sa pagkatinuod, sultihan ko kamo nga sa bag-ong kalibotan, sa diha nga ang Anak sa Tawo molingkod na sa iyang mahimayaong trono, kamo nga nagsunod kanako molingkod usab sa napulo ug duha ka trono ug inyong hukman ang napulo ug duha ka banay sa Israel. 29Ug ang tanan nga nagbiya sa mga balay o mga igsoong lalaki o mga igsoong babaye o amahan o inahan o mga anak o kayutaan tungod sa akong ngalan, makadawat ug usa ka gatos ka pilo, ug makapanunod sa kinabuhing dayon. 30#Mat. 20:16; Luc. 13:30. Apan daghan ang nag-una nga unya maulahi ug ang naulahi mag-una.

Currently Selected:

MATEO 19: ABCEB

Highlight

Copy