JUAN 18

Ang Pagtugyan ug Pagdakop kang Jesus

(Mat. 26:47-56; Mar. 14:43-59; Luc. 22:47-53)

1Sa nakasulti na si Jesus niini, miadto siya uban sa iyang mga tinun-an tabok sa walog sa Kidron, ug niini didtoy usa ka tanaman diin misulod siya ug ang iyang mga tinun-an. 2Ug si Judas, nga nagbudhi kaniya, nakatultol usab sa maong dapit kay kanunay man si Jesus makigtigom didto uban sa iyang mga tinun-an. 3Unya sa nakadala na si Judas ug usa ka panon nga mga sundalo ug pipila ka mga tinugyanan sa mga pangulong pari ug sa mga Pariseo, siya miadto didto nga sangkap sa mga parol ug mga sulo ug mga hinagiban. 4Ug si Jesus nga nahibalo na sa tanang mahitabo kaniya, misugat ug miingon kanila, “Kinsay inyong gipangita?” 5Sila mitubag kaniya, “Si Jesus nga taga-Nazaret.” Si Jesus miingon kanila, “Ako mao siya.” Si Judas, nga mao ang nagbudhi kaniya, nagtindog uban kanila. 6Sa pag-ingon ni Jesus kanila, “Ako mao siya,” sila nanibog ug nangatumba sa yuta. 7Nangutana siya pag-usab kanila, “Kinsa bay inyong gipangita?” Ug sila mitubag, “Si Jesus nga taga-Nazaret.” 8Si Jesus mitubag kanila, “Giingnan na kamo nako nga ako mao siya. Ug kon ako man ang inyong gipangita, palakta kining mga tawhana.” 9Kini aron matuman ang pulong nga iyang gisulti, “Sa mga gitugyan kanako, wala ako kawad-i bisan ug usa.” 10Unya si Simon Pedro nga nagdala ug espada, milanit niini ug gitigbas ang ulipon sa labawng pangulong pari ug naputlan kini sa tuo niyang dalunggan. Ang ngalan sa ulipon mao si Malco. 11#Mat. 26:39; Mar. 14:36; Luc. 22:42. Ug si Jesus miingon kang Pedro, “Iuli sa sakoban kanang imong espada. Dili ba diay nako imnon ang kupa nga gihatag kanako sa Amahan?”

Si Jesus Gidala sa Atubangan ni Anas

(Mat. 26:57-58; Mar. 14:53-54; Luc. 22:54)

12Unya si Jesus gidakop sa panon sa mga sundalo ug sa ilang kapitan ug sa mga tinugyanan sa mga Judio ug gigapos nila siya. 13Ug ila unang gidala siya ngadto kang Anas kay kini siya mao man ang ugangan ni Caifas nga mao ang labawng pari niadtong tuiga. 14#Juan 11:49-50.Si Caifas mao ang mihatag ug tambag ngadto sa mga Judio nga maayo nga usa lamang ka tawo ang mamatay alang sa katawhan.

Si Jesus Gilimod ni Pedro

(Mat. 26:69-70; Mar. 14:66-68; Luc. 22:55-57)

15Unya si Simon Pedro misunod kang Jesus, ingon man ang lain pang tinun-an. Ug kining maong tinun-an nailhan sa labawng pangulong pari busa siya misulod uban kang Jesus ngadto sa hawanan sa balay sa labawng pangulong pari; 16samtang si Pedro nagtindog didto sa gawas sa pultahan. Unya kadtong tinun-an nga kaila sa labawng pangulong pari miadto sa gawas ug misulti sa babaye nga maoy nagbantay sa pultahan ug gipasulod si Pedro. 17Ug ang babaye nga maoy nagbantay sa pultahan miingon kang Pedro, “Dili ba usa usab ikaw sa mga tinun-an niining tawhana?” Siya miingon, “Dili!” 18Unya ang mga ulipon ug ang mga tinugyanan naghaling ug kalayo sa uling kay tugnaw man ug sila nagbarog ug nagpainit sa ilang kaugalingon. Ug si Pedro usab uban kanila, nagtindog ug nagpainit sa iyang kaugalingon.

Si Jesus Giusisa sa Labawng Pangulong Pari

(Mat. 26:59-66; Mar. 14:55-64; Luc. 22:66-71)

19Unya ang labawng pangulong pari nangutana mahitungod sa iyang mga tinun-an ug sa iyang pagtulun-an. 20Si Jesus mitubag kaniya, “Nagsulti ako sa dayag ngadto sa kalibotan. Kanunay akong nagtudlo sulod sa mga sinagoga ug sa Templo diin adto magtigoman ang tanang mga Judio. Wala akoy gisulti sa tago. 21Nganong mangutana pa man ikaw kanako? Pangutan-a ang mga nakadungog kanako kon unsa ang akong gisulti kanila. Sila nahibalo kon unsay akong gisulti.” 22Ug sa pagsulti niya niini, usa sa mga tinugyanan nga nagtindog sa duol misagpa kang Jesus ug miingon kaniya, “Mao ba kanay tinubagan nimo sa labawng pangulong pari?” 23Si Jesus mitubag kaniya, “Kon daotan man ang akong gisulti, pamatud-i ang pagkadaotan niini, apan kon maayo ang akong gisulti, nganong gisagpa man nimo ako?” 24Busa si Anas mipadala kaniya nga ginapos ngadto kang Caifas, ang labawng pangulong pari.

Si Jesus Gilimod na Usab ni Pedro

(Mat. 26:71-75; Mar. 14:69-72; Luc. 22:58-62)

25Niadtong tungora si Simon Pedro nagtindog ug nagpainit sa iyang kaugalingon. Ug sila nangutana kaniya, “Dili ba ikaw usa usab sa iyang mga tinun-an?” Kini gilimod niya ug siya miingon, “Dili!” 26Usa sa mga ulipon sa labawng pangulong pari nga kadugo sa giputlan ni Pedro ug dalunggan nangutana kaniya, “Wala ba ako makakita kanimo didto sa tanaman uban kaniya?” 27Gilimod na usab kini ni Pedro ug dihadiha mituktugaok ang manok.

Si Jesus sa Atubangan ni Pilato

(Mat. 27:1-2, 11-14; Mar. 15:1-5; Luc. 23:1-5)

28Unya ilang gidala si Jesus gikan sa balay ni Caifas ngadto sa palasyo sa gobernador. Sayo kadto sa kabuntagon ug sila wala mosulod sa palasyo aron dili sila mahugawan ug aron makakaon sila sa Kasaulogan sa Pagsaylo. 29Busa si Pilato migula ngadto kanila ug miingon, “Unsa ba ang sumbong nga inyong ipasaka batok niining tawhana?” 30Sila mitubag ug miingon kaniya, “Kon kining tawhana dili pa tigbuhat ug daotan, wala unta namo siya itugyan kanimo.” 31Ug si Pilato miingon kanila, “Dad-a ninyo siya ug hukmi siya pinasubay sa inyong balaod.” Ang mga Judio miingon kaniya, “Wala itugot kanamo sa balaod ang pagpatay ug tawo.” 32#Juan 3:14; 12:32.Kini aron matuman ang pulong nga gisulti ni Jesus nga nagpasabot sa paagi sa kamatayon nga iyang kamatyan.

33Busa si Pilato misulod pag-usab sa palasyo ug iyang gitawag si Jesus ug giingnan siya, “Ikaw ba ang Hari sa mga Judio?” 34Si Jesus mitubag kaniya, “Nagsulti ba ikaw niini gikan sa imong kaugalingon o gisultihan ba ikaw sa uban mahitungod kanako?” 35Si Pilato mitubag, “Judio ba ako? Ang imong nasod ug ang mga pangulong pari mao ang nagtugyan kanimo nganhi kanako. Unsa ba diay ang imong nabuhat?” 36Si Jesus mitubag, “Ang akong gingharian dili gikan niining kalibotana. Kon ang akong gingharian gikan pa niining kalibotana, makig-away unta ang akong mga alagad aron dili ako ikatugyan ngadto sa mga Judio. Apan ang akong gingharian dili gikan niining kalibotana.” 37Ug si Pilato miingon kaniya, “Busa ikaw hari diay?” Si Jesus mitubag kaniya, “Ikaw nagsulti nga ako hari. Ug alang niini ako natawo, ug alang niini ako mianhi sa kalibotan aron sa pagpadayag sa kamatuoran. Ang tanan nga iya sa kamatuoran namati sa akong tingog.” 38Si Pilato nangutana kaniya, “Unsa man ang kamatuoran?”

Si Jesus Gihukman nga Patyon

(Mat. 27:15-31; Mar. 15:6-20; Luc. 23:13-25)

Human siya makasulti niini, si Pilato migula pag-usab ngadto sa mga Judio ug miingon kanila, “Wala akoy nakita nga sala diha kaniya. 39Apan aduna man kamoy batasan nga sa matag Kasaulogan sa Pagsaylo ako magbuhi ug usa ka binilanggo alang kaninyo. Buot ba kamo nga buhian nako kaninyo ang Hari sa mga Judio?” 40Ug sila naninggit pag-usab nga miingon, “Dili kanang tawhana, kondili si Barabas!” Apan kini si Barabas usa ka tulisan.

Currently Selected:

JUAN 18: ABCEB

Highlight

Copy