JEREMIAS 22
22
Ang Gisulti ni Jeremias Ngadto sa Harianong Banay sa Juda
1Mao kini ang giingon sa Ginoo, “Lakaw ngadto sa balay sa hari sa Juda, ug isulti didto kining pulonga, 2ug ingna, ‘Pamatia ang pulong sa Ginoo, O Hari sa Juda nga naglingkod sa trono ni David, ikaw ug ang imong mga alagad, ug ang imong katawhan nga mosulod niini nga mga ganghaan. 3Mao kini ang giingon sa Ginoo: Buhata ninyo ang hustisya ug ang pagkamatarong, ug luwasa siya nga gitulis gikan sa kamot sa nagdaogdaog. Ayaw pagbuhat ug kasaypanan o kapintas ngadto sa langyaw, sa wala nay amahan ug sa biyuda o magpaagas ug dugo sa walay sala niining dapita. 4Kay kon kamo magtuman gayod niining pulonga, aduna unyay mosulod sa mga ganghaan niining balaya nga mga hari nga maglingkod sa trono ni David, nga magsakay sa mga karwahi ug sa mga kabayo, sila ug ang ilang mga alagad ug ang ilang katawhan. 5Apan kon kamo dili motuman niining pulonga, ako manumpa sa akong kaugalingon, nag-ingon ang Ginoo, nga kining balaya mahimong biniyaan. 6Kay mao kini ang giingon sa Ginoo mahitungod sa balay sa hari sa Juda:
“ ‘Ikaw sama sa Gilead alang kanako,
sama sa kinatumyan sa Lebanon,
apan himoon ko gayod ikaw nga kamingawan,
siyudad#22:6 siyudad: Sa Hebreo, mga siyudad. nga walay magpuyo.
7Mag-andam ako ug mga tiglaglag batok kanimo,
ang matag usa uban ang iyang mga hinagiban;
ug sila magputol sa mga pinili nimong sedro
ug isalibay kini ngadto sa kalayo.
8“ ‘Ug daghang mga nasod nga moagi niining siyudara, ug ang matag tawo moingon sa iyang isigkatawo, “Nganong gibuhat man sa Ginoo ang ingon niini nganhi niining dakong siyudad?” 9Unya sila motubag, “Tungod kay sila misalikway sa kasabotan sa Ginoo nga ilang Dios ug nagsimba sa laing mga dios ug nag-alagad kanila.” ’ ”
Ang Gisulti ni Jeremias Mahitungod Kang Jehoahas
10Ayaw kamo paghilak tungod sa namatay,
o magbakho tungod kaniya;
kondili panghilak kamo sa hilabihan tungod kaniya nga mibiya,
kay siya dili na mobalik aron sa
pagtan-aw sa iyang yutang natawhan.
11Kay mao kini ang giingon sa Ginoo mahitungod kang Jehoahas#22:11 Jehoahas o Sallum. nga anak nga lalaki ni Josias, hari sa Juda, nga naghari puli kang Josias nga iyang amahan, ug nga mibiya niining dapita, “Siya dili na mobalik pag-usab, 12apan sa dapit diin siya gidala nga binihag, adto siya mamatay ug dili na siya makakita pag-usab niining yutaa.”
Ang Gisulti ni Jeremias Mahitungod kang Jehoiakim
13“Alaot kadtong nagtukod sa iyang balay sa paagi nga dili matarong,
ug sa iyang mga lawak sa itaas sa paagi nga dili makataronganon;
nga naghimo sa iyang isigkatawo nga mag-alagad nga walay bayad
ug dili mohatag kaniya sa iyang suhol;
14nga nag-ingon, ‘Ako magbuhat ug dako nga balay
nga may dagkong lawak sa itaas,’
ug magbutang ug mga bintana niini,
may kisami nga cedro
ug pintalan kini ug lutong pula.
15Nagtuo ka ba nga ikaw hari
tungod kay ikaw nagpalabaw pinaagi sa sedro?
Dili ba nga ang imong amahan nagkaon
ug nag-inom ug nagbuhat ug hustisya ug pagkamatarong?
Unya kadto maayo alang kaniya.
16Siya naghukom sa katungod sa mga kabos ug nanginahanglan;
unya kadto maayo.
Dili ba kini maoy pag-ila kanako?
nag-ingon ang Ginoo.
17Apan ikaw adunay mga mata ug kasingkasing
alang lamang sa pagpanikas,
sa pagpaagas ug dugo sa walay sala,
ug sa pagdaogdaog ug sa kapintas.”
18Busa mao kini ang giingon sa Ginoo mahitungod kang Jehoiakim nga anak ni Josias, hari sa Juda:
“Sila dili magbangutan tungod kaniya nga mag-ingon,
‘Ah, akong igsoon nga lalaki!’ o ‘Ah, igsoon nga babaye!’
Sila dili magbangutan tungod kaniya nga mag-ingon,
‘Ah, agalon!’ o ‘Ah, ang iyang kahalangdon!’
19Uban sa paglubong sa usa ka asno, ilubong siya,
guyoron ug isalibay hangtod sa unahan sa ganghaan sa Jerusalem.”
Ang Gisulti ni Jeremias Mahitungod sa Dangatan sa Jerusalem
20“Tungas ngadto sa Lebanon, ug singgit
ug ipatugbaw ang imong tingog sa Basan;
singgit gikan sa Abarim,
kay ang tanan nimong mga hinigugma nangalaglag.
21Misulti ako kanimo diha sa imong pagkamauswagon,
apan ikaw nag-ingon, ‘Dili ako mamati.’
Kini mao ang imong pamaagi sukad sa imong pagkabatan-on
nga wala ikaw magtuman sa akong tingog.
22Ang hangin mag-abog sa tanan nimong mga tigbantay sa karnero,
ug ang imong mga hinigugma bihagon;
busa maulawan ikaw ug malibog
tungod sa tanan nimong pagkadaotan.
23O lumulupyo sa Lebanon,
nga nagsalag diha sa mga cedro,
pagkamakakaluoy nimo sa dihang modangat kanimo ang mga kasakit,
ang kasakit nga sama sa usa ka babaye nga nagbati!”
Ang Silot sa Dios Kang Conias
24“Ingon nga ako buhi, nag-ingon ang Ginoo, bisan ug si Conias#22:24 Conias: o Jehoiakin. nga anak ni Jehoiakim nga hari sa Juda maoy singsing nga timaan nga ania sa akong tuong kamot, husloon ko ikaw; 25ug ihatag ko ikaw ngadto sa kamot niadtong nagtinguha sa imong kinabuhi, ngadto sa kamot niadtong imong gikahadlokan, bisan ngadto sa kamot ni Nabucodonosor nga hari sa Babilonia ug ngadto sa kamot sa mga Caldeanhon. 26Ilabog ko ikaw ug ang imong inahan nga nanganak kanimo ngadto sa laing yuta, diin kamo wala mangatawo didto, ug adto kamo mangamatay. 27Apan ngadto sa yuta nga ilang gipangandoy nga ilang paulian, dili sila makapauli didto.”
28Kining tawhana nga si Conias usa ba ka tinamay nga nabuak nga sudlanan,
usa ba ka sudlanan nga walay nagtagad?
Ngano man nga gihinginlan siya ug ang iyang mga anak,
ug gisalibay ngadto sa yuta nga wala nila mailhi?
29O yuta, yuta, yuta,
pamatia ang pulong sa Ginoo!
30Mao kini ang giingon sa Ginoo:
“Isulat kining tawhana ingon nga walay anak,
usa ka tawo nga dili mouswag sa iyang mga adlaw;
kay walay usa sa iyang kaliwat nga mouswag
diha sa paglingkod sa trono ni David,
ug sa pagmando pag-usab diha sa Juda.”
Currently Selected:
JEREMIAS 22: ABCEB
Highlight
Share
Copy
Want to have your highlights saved across all your devices? Sign up or sign in
©Philippine Bible Society, 2011
