JEREMIAS 1
1
1Ang mga pulong ni Jeremias nga anak ni Hilkias, sa mga pari nga didto sa Anatot sa yuta ni Benjamin, 2#2 Hari 22:3–23:27; 2 Cron. 34:8–35:19. nga diha kaniya midangat ang pulong sa Ginoo sa mga adlaw ni Josias nga anak ni Amon, hari sa Juda, sa ikanapulo ug tulo nga tuig sa iyang paghari. 3#2 Hari 23:36–24:7; 2 Cron. 36:5-8; 2 Hari 24:18–25:21. Midangat usab kini sa mga adlaw ni Jehoiakim nga anak ni Josias, hari sa Juda, hangtod sa kataposan sa ikanapulo ug usa nga tuig ni Zedekias nga anak ni Josias, hari sa Juda, hangtod sa pagkabihag sa Jerusalem sa ikalima nga bulan.
Ang Pagtawag Kang Jeremias
4Unya ang pulong sa Ginoo midangat kanako nga nag-ingon,
5“Sa wala pa nako ikaw buhata diha sa taguangkan nakaila na ako kanimo,
ug sa wala pa ikaw mahimugso gigahin ko na ikaw;
gipili ko ikaw nga propeta ngadto sa kanasoran.”
6Unya miingon ako, “Ah, Ginoong Dios! Tan-awa, dili ako mahibalong mosulti, kay usa lamang ako ka batan-on.” 7Apan ang Ginoo miingon kanako,
“Ayaw pag-ingon, ‘Ako usa lamang ka batan-on’;
kay ngadto sa tanan nga akong paadtoan kanimo moadto ikaw,
ug bisan unsa nga akong isugo kanimo isulti nimo.
8Ayaw kahadlok kanila
kay ako mag-uban kanimo aron sa pagluwas kanimo, nag-ingon ang Ginoo.”
9Unya ang Ginoo mituy-od sa iyang kamot ug mihikap sa akong baba, ug ang Ginoo miingon kanako,
“Ania, ako nagbutang sa akong mga pulong diha sa imong baba.
10Tan-awa, ako nagpahiluna kanimo niining adlawa ibabaw sa kanasoran ug ibabaw sa mga gingharian,
sa paglangkat ug sa paggun-ob,
sa paglaglag ug sa pagpukan,
sa pagtukod ug sa pagtanom.”
Duha ka Panan-awon
11Ang pulong sa Ginoo midangat kanako nga nag-ingon, “Jeremias, unsay imong nakita?” Ug ako miingon, “Nakita nako ang usa ka sungkod nga almendras.” 12Unya ang Ginoo miingon kanako, “Ikaw nakakita pag-ayo; kay ako nagbantay#1:12 NAGBANAY: Ang pulong niini sa Hebreo sama pamation sa Hebreo nga pulong sa almendras. sa akong pulong sa pagbuhat niini.”
13Ang pulong sa Ginoo midangat kanako sa ikaduhang higayon nga nag-ingon, “Unsay imong nakita?” Ug ako miingon, “Nakita nako ang kulon nga nagbukal nga nagtakilid gikan sa amihanan.” 14Unya ang Ginoo miingon kanako, “Gikan sa amihanan ang daotan mogula ibabaw sa tanang mga nagpuyo sa yuta. 15Kay, tan-awa, ako magtawag sa tanang mga banay sa mga gingharian sa amihanan, nag-ingon ang Ginoo. Ug sila mangabot, ug ang matag usa magpahiluna sa iyang trono diha sa agianan sa mga ganghaan sa Jerusalem, batok sa tanang mga paril nga naglibot niini, ug batok sa tanang mga siyudad sa Juda. 16Ug akong ibungat ang akong mga paghukom batok kanila, tungod sa tanan nilang kadaotan sa pagbiya kanako. Nagsunog sila ug insenso ngadto sa laing mga dios ug nagsimba sa mga buhat sa ilang kaugalingong mga kamot. 17Apan ikaw, pangandam,#1:17 pangandam: Sa Hebreo, baksi ang imong hawak. tindog ug sultihi sila sa tanang gisugo nako kanimo. Ayaw kalisang kanila, aron dili ko ikaw lisangon sa ilang atubangan. 18Ug ako nagbuhat kanimo niining adlawa ug usa ka kinutaan nga siyudad, usa ka haliging puthaw ug bronsi nga mga paril batok sa tibuok nga yuta, batok sa mga hari sa Juda, batok sa mga pangulo niini, sa mga pari niini ug sa mga katawhan sa yuta. 19Ug sila makig-away batok kanimo, apan sila dili modaog batok kanimo, kay ako mag-uban kanimo sa pagluwas kanimo, nag-ingon ang Ginoo.”
Currently Selected:
JEREMIAS 1: ABCEB
Highlight
Share
Copy
Want to have your highlights saved across all your devices? Sign up or sign in
©Philippine Bible Society, 2011
