MGA MAGHUHUKOM 20
20
Ang Israel Nangandam Alang sa Gubat
1Unya ang tanang katawhan sa Israel nanggula, sukad sa Dan hangtod sa Beer-seba, lakip ang yuta sa Gilead, ug ang katilingban nagtigom ingon nga usa ka tawo ngadto sa Ginoo didto sa Mispa. 2Ug ang mga pangulo sa tanang katawhan, sa tanang mga banay sa Israel, nagpakita sa ilang kaugalingon diha sa pundok sa katawhan sa Dios, 400,000 ka tawo nga naglakaw nga nagdala ug espada. 3Niadtong tungora ang mga kaliwat ni Benjamin nakadungog nga ang katawhan sa Israel nangadto sa Mispa. Ug ang katawhan sa Israel miingon, “Suginli kami, sa unsang paagi nga kining kadaotan nahitabo?” 4Ug ang Levihanon, ang bana sa babaye nga gipatay, mitubag ug miingon, “Ako miadto sa Gibea nga iya ni Benjamin, ako ug ang akong puyopuyo, aron sa pagpalabay sa kagabhion. 5Ug ang mga tawo sa Gibea miadto batok kanako ug gilibotan ang balay nianang pagkagabii. Sila buot mopatay kanako, ug ilang gipanamastamasan ang akong puyopuyo ug siya namatay. 6Unya akong gidala ang akong puyopuyo ug gihiwahiwa ug gipadala kini sa tibuok yuta nga panulundon sa Israel kay nagbuhat sila ug kangil-aran ug pagpatuyang dinhi sa Israel. 7Tan-awa, kamong katawhan sa Israel, kamong tanan, ihatag ang inyong tambag ug hunahuna.”
8Unya ang tanang katawhan nanindog ingon nga usa ka tawo nga nag-ingon, “Walay si bisan kinsa kanamo nga moadto sa iyang tolda ug walay usa kanamo nga mopauli sa iyang balay. 9Apan karon mao kini ang atong buhaton sa Gibea, moadto kita batok niini pinaagi ug ripa. 10Ug magdala kita ug napulo ka tawo gikan sa tagsa ka gatos sa tanang mga banay sa Israel ug usa ka gatos gikan sa usa ka libo, ug usa ka libo gikan sa 10,000 aron sa pagdala sa mga balon alang sa katawhan, aron nga sa pag-abot nila makapanimalos sila sa Gibea sa Benjamin sa tanang ngil-ad nga buhat nga ilang gibuhat sa Israel.” 11Busa ang tanang mga tawo sa Israel nagtigom batok sa siyudad, nga naghiusa ingon nga usa ka tawo.
12Unya ang mga banay sa Israel nagsugo ug mga tawo ngadto sa tibuok banay ni Benjamin nga nag-ingon, “Unsa kining kadaotan nga nahitabo diha kaninyo? 13Busa karon, itugyan ang mga tawo, ang mga daotang tawo sa Gibea, aron amo silang patyon ug wagtangon ang daotan sa Israel.” Apan ang mga kaliwat ni Benjamin wala mamati sa tingog sa ilang mga igsoon, ang katawhan sa Israel. 14Ug ang mga kaliwat ni Benjamin nagtigom gikan sa mga siyudad ngadto sa Gibea aron sa paggula sa pagpakig-away batok sa katawhan sa Israel. 15Ug ang mga kaliwat ni Benjamin nagtigom niadtong adlawa gikan sa ilang mga siyudad, 26,000 ka tawo nga nagdala ug espada, gawas sa mga nagpuyo sa Gibea nga nagtigom ug pito ka gatos ka tawo nga pinili. 16Uban niining tibuok katawhan may pito ka gatos ka piniling mga tawo nga pulos walhon. Ang matag usa makalambuyog ug bato ngadto sa usa ka lugas nga buhok ug dili masipyat. 17Ug ang mga tawo sa Israel, walay labot sa kaliwat ni Benjamin, nagtigom ug upat ka gatos ka libo ka tawo nga nagdala ug espada, kining tanan mga tawo nga manggugubat.
Ang Gubat Batok sa mga Kaliwat ni Benjamin
18Ang katawhan sa Israel nangandam ug nangadto sa Betel, ug nagpakisayod sa Dios, “Kinsa kanamo ang mouna pag-adto aron sa pagpakig-away batok sa mga kaliwat ni Benjamin?” Ug ang Ginoo miingon, “Ang Juda mao ang mouna pag-adto.”
19Unya ang katawhan sa Israel namangon pagkabuntag ug nagkampo batok sa Gibea. 20Ug ang katawhan sa Israel nangadto aron sa pagpakig-away batok sa Benjamin. Ug ang katawhan sa Israel nagpahiluna batok kanila didto sa Gibea. 21Ang mga kaliwat ni Benjamin nanggula gikan sa Gibea ug niadtong adlawa mipukan ngadto sa yuta sa 22,000 ka tawo nga mga Israelinhon. 22Apan ang katawhan, ang mga tawo sa Israel, nagmaisogon ug nagpahimutang pag-usab sa samang dapit diin didto sila magpahimutang sa unang adlaw. 23Ug ang katawhan sa Israel nangadto ug nanghilak sa atubangan sa Ginoo hangtod sa pagkagabii ug sila nangutana sa Ginoo, “Makig-away ba kami pag-usab batok sa among kaigsoonan nga mga kaliwat ni Benjamin?” Ug ang Ginoo miingon, “Pangadto kamo batok kanila.”
24Busa ang katawhan sa Israel mipaduol batok sa mga kaliwat ni Benjamin sa ikaduhang adlaw. 25Ug sa ikaduhang adlaw, ang Benjamin migula batok kanila gikan sa Gibea ug gipukan ngadto sa yuta ang 18,000 ka tawo sa katawhan sa Israel. Kini silang tanan mga tawo nga nagdala ug espada. 26Unya ang tanang katawhan sa Israel, ang tibuok nga kasundalohan, nanungas ug nangadto sa Betel ug nanghilak. Nanglingkod sila didto sa atubangan sa Ginoo ug nagpuasa niadtong adlawa hangtod sa pagkagabii ug naghalad ug mga halad nga sunogon ug mga halad sa pakigdait sa atubangan sa Ginoo. 27Ug ang katawhan sa Israel nagpakisayod sa Ginoo (kay ang sudlanan sa kasabotan sa Dios didto niadtong mga adlawa, 28ug si Pinehas nga anak ni Eleasar nga anak ni Aaron nag-alagad niadtong mga adlawa sa atubangan niini), nga nag-ingon, “Moadto pa ba kami sa pagpakig-away batok sa mga kaliwat ni Benjamin nga among kaigsoonan o mohunong ba kami?” Ug ang Ginoo miingon, “Tungas, kay ugma itugyan nako sila nganha sa inyong kamot.”
29Busa ang Israel nagbutang ug mga tawo nga mag-atang libot sa Gibea. 30Ug ang katawhan sa Israel nangadto batok sa mga kaliwat ni Benjamin niadtong ikatulong adlaw ug nagpahiluna batok sa Gibea sama sa ubang panahon. 31Ug ang mga kaliwat ni Benjamin nanggula batok sa katawhan ug nadala ngadto sa gawas sa siyudad ug sama sa ubang panahon nagsugod sila sa pagpanigbas ug sa pagpamatay sa katawhan, didto sa mga dalan nga ang usa niini mitungas padulong sa Betel, ug ang lain padulong sa Gibea, ug sa kapatagan, mga 30 ka tawo sa Israel. 32Unya ang mga kaliwat ni Benjamin miingon, “Sila nangapukan sa atong atubangan sama sa una.” Apan ang katawhan sa Israel miingon, “Manibog kita ug dad-on nato sila gikan sa siyudad ngadto sa mga dalan.” 33Ug ang tanang katawhan sa Israel migawas sa ilang dapit ug nagpahiluna sa ilang kaugalingon didto sa Baal-tamar, ug ang mga tawo sa Israel nga nag-atang nanggula gikan sa ilang dapit sa kasadpang bahin sa Gibea.#20:33 Gibea: Sa Hebreo, Geba. 34Ug may miadto batok sa Gibea, 10,000 ka piniling mga tawo gikan sa tibuok Israel ug ang gubat bangis kaayo. Apan ang mga kaliwat ni Benjamin wala mahibalo nga ang kadaotan duol na kanila. 35Ug gibuntog sa Ginoo ang Benjamin atubangan sa Israel, ug gilaglag sa katawhan sa Israel ang 25,100 ka tawo sa Benjamin niadtong adlawa. Kini silang tanan mga tawo nga nagdala ug espada. 36Busa nakita sa mga kaliwat ni Benjamin nga sila nabuntog.
Giunsa Pagdaog sa mga Israelinhon
Ang katawhan sa Israel mihatag ug lugar sa Benjamin tungod kay sila misalig sa mga tawo nga nag-atang nga ilang gipahimutang batok sa Gibea. 37Ug ang mga tawo nga nag-atang midali ug midasdas sa Gibea, ug sila nangadto ug gipanigbas ang tibuok katawhan sa siyudad pinaagi sa sulab sa espada. 38Karon ang gikasabotan nga ilhanan sa mga tawo sa Israel ug sa mga nag-atang mao nga sa dihang maghimo sila ug usa ka dakong panganod sa aso nga mag-utbo gikan sa siyudad, 39ang mga tawo sa Israel mosumbalik sa pagpakiggubat. Ug ang mga kaliwat ni Benjamin nga misugod sa pagpanigbas ug sa pagpamatay ug mga 30 ka tawo sa Israel, miingon, “Sa walay duhaduha mangapukan sila sa atong atubangan sama sa unang gubat.” 40Apan sa diha nga ang ilhanan misugod na sa pag-utbo gikan sa siyudad pinaagi sa aso, ang mga kaliwat ni Benjamin milingi sa ilang luyo ug nakita ang tibuok nga siyudad nga miulbo sa aso ngadto sa langit. 41Ug ang katawhan sa Israel namalik ug ang katawhan sa Benjamin nangalisang kay ilang nakita nga ang katalagman duol na kanila. 42Busa misibog sila sa atubangan sa katawhan sa Israel ngadto paingon sa kamingawan apan naapsan sila sa gubat ug ang mga nanggula gikan sa mga siyudad mipatay kanila sa ilang taliwala. 43Ilang gilibotan ang mga kaliwat ni Benjamin ug gigukod ug gipangtunoban sila gikan sa Noha#20:43 Noha: Sa Hebreo, sa ilang dapit nga pahulayanan. hangtod sa gilay-on nga atbang sa Gibea padulong sa silangan. 44Napulo ug walo ka libo ka tawo sa Benjamin ang nangapukan, ang tanan kanila mga tawo nga isog. 45Ug mibalik sila ug miadto padulong sa kamingawan ngadto sa bato sa Rimon ug lima ka libo ka tawo ang nangapukan diha sa kadalanan ug gigukod sila hangtod sa Gidom ug duha ka libo ka tawo ang nangamatay. 46Busa ang tanan nga nangapukan sa Benjamin niadtong adlawa 25,000 ka tawo nga nagdala ug espada. Ang tanan kanila mga tawo nga isog. 47Apan unom ka gatos ka tawo ang misibog ug nanagan padulong sa kamingawan ngadto sa bato sa Rimon ug mipuyo didto sa bato sa Rimon sulod sa upat ka bulan. 48Ug ang katawhan sa Israel namalik batok sa mga kaliwat ni Benjamin ug gipanigbas sila pinaagi sa sulab sa espada, mga tawo ug mga mananap ug ang tanan nga ilang makita. Ug ang tanang mga lungsod nga ilang nakita ilang gisunog.
Currently Selected:
MGA MAGHUHUKOM 20: ABCEB
Highlight
Share
Copy
Want to have your highlights saved across all your devices? Sign up or sign in
©Philippine Bible Society, 2011
