ISAIAS 61
61
Luwason ang Israel
1Ang Espiritu sa Ginoong Dios ania kanako,
tungod kay gidihogan ako sa Ginoo
aron sa pagdala sa maayong balita ngadto sa mga sinakit;#61:1 sinakit o kabos.
ako gipaanhi niya aron sa pagbugkos sa mga nadugmok nga kasingkasing,
aron sa pagmantala sa kagawasan sa mga binihag,
ug sa pag-abli sa bilanggoan#61:1 pag-abli sa bilanggoan: Sa Hebreo, pag-abli o pag-abli sa mata! alang sa mga ginapos;
2aron sa pagmantala sa tuig nga gikahumut-an sa Ginoo,
ug sa adlaw sa pagpanimalos sa atong Dios;
sa paghupay niadtong tanan nga nagsubo;
3sa paghatag ngadto sa nagsubo didto sa Zion—
sa paghatag kanila ug purongpurong nga bulak inay abo,
lana sa kalipay inay pagsubo,
bisti sa pagdayeg inay luya nga espiritu;
aron sila tawgon nga mga dagkong kahoy sa pagkamatarong,
ang gitanom sa Ginoo, aron siya himayaon.
4Ilang tukoron ang karaang mga guba,
patindogon nila ang karaang mga nangalumpag;
ayohon nila ang guba nga mga siyudad,
ang mga nangagun-ob sa daghang mga kaliwatan.
5Ang mga langyaw maoy magtindog ug magpasibsib sa inyong mga panon sa karnero,
ang mga dumuduong maoy inyong mga magdadaro ug inyong mga tig-atiman sa parasan;
6apan kamo tawgon nga mga pari sa Ginoo,
ang mga tawo motawag kaninyo nga mga alagad sa atong Dios;
kamo magkaon sa bahandi sa kanasoran,
ug sa ilang kadato kamo maghimaya.
7Inay kaulawan ninyo, kamo makabaton ug duha ka bahin,
ug inay sa pagkawalay dungog, kamo#61:7 kamo: Sa Hebreo, sila. maglipay sa inyong#61:7 inyong: Sa Hebreo, ilang. bahin;
busa sa inyong#61:7 inyong: Sa Hebreo, ilang. yuta kamo#61:7 kamo: Sa Hebreo, sila. makapanag-iya ug duha ka bahin,
ang kalipay nga walay kataposan mainyo.#61:7 mainyo: Sa Hebreo, maila.
8Kay ako, ang Ginoo, nahigugma sa hustisya,
gidumtan nako ang pagpangawat ug ang kasaypanan;#61:8 pagpangawat ug ang kasaypanan: Sa Hebreo, pagpangawat uban ang halad nga sunogon.
ako matinud-anon nga maghatag kanila sa ilang balos,
ug ako maghimo ug walay kataposang kasabotan uban kanila.
9Ang ilang kaliwatan mailhan taliwala sa kanasoran,
ug ang ilang kaliwatan sa taliwala sa mga katawhan;
ang tanan nga makakita kanila moila kanila,
nga sila usa ka katawhan nga gipanalanginan sa Ginoo.
10Ako maglipay pag-ayo diha sa Ginoo,
ang akong kalag magmalipayon diha sa akong Dios;
kay ako gibistihan niya sa mga bisti sa kaluwasan,
ako gisul-oban niya sa kupo sa pagkamatarong,
sama sa pamanhonon nga nagdayandayan sa iyang kaugalingon
sa usa ka purongpurong nga bulak,
ug sama sa pangasaw-onon nga nagdayandayan sa iyang kaugalingon sa iyang mga alahas.
11Kay ingon nga ang yuta nagpagitib sa iyang turok,
ug ingon nga ang tanaman nagpaturok sa mga gitisok niini,
ang Ginoong Dios usab magpaturok sa pagkamatarong ug pagdayeg
sa atubangan sa tanan nga kanasoran.
Currently Selected:
ISAIAS 61: ABCEB
Highlight
Share
Copy
Want to have your highlights saved across all your devices? Sign up or sign in
©Philippine Bible Society, 2011
