HOSEA 5
5
1Pamatia kini, O mga pari!
Tagda, O balay sa Israel!
Paminawa, O balay sa hari!
Kay ang paghukom mahitungod kaninyo;
kay kamo nahimong lit-ag sa Mispa,
ug pukot nga gibukhad didto sa Tabor.
2Ug ilang gipalaloman ang gahong sa Sitim,
apan akong silotan silang tanan.
Si Hosea Nagpasidaan Batok sa Pagsimba ug mga Diosdios
3Ako nakaila kang Ephraim,
ug ang Israel wala matago kanako;
kay karon, O Ephraim, ikaw nagmakihilawason,
ang Israel nahugawan.
4Ang ilang mga binuhatan wala magtugot kanila
sa pagbalik ngadto sa ilang Dios
Kay ang espiritu sa pagkamakihilawason anaa sa sulod nila,
ug sila wala makaila sa Ginoo.
5Ug ang pagpagarbo sa Israel nagpamatuod sa iyang atubangan,
ang Efraim#5:5 ang Efraim: Sa Hebreo, ang Israel ug ang Efraim. mahisukamod sa iyang kasal-anan,
ang Juda usab mahisukamod uban kanila.
6Uban sa ilang mga panon ug sa ilang kahayopan sila mangadto
aron sa pagpangita sa Ginoo,
apan dili nila makit-an siya;
siya nagpalayo gikan kanila.
7Sila nagmaluibon sa Ginoo
kay sila nanganak ug mga anak sa gawas.
Karon lamyon sila sa bag-ong subang sa bulan uban sa ilang kaumahan.
Gubat Tali sa Juda ug Israel
8Patingoga ninyo ang budyong sa Gibea,
ang trumpeta sa Rama.
Patingoga ang pasidaan diha sa Bet-aven,
pagkurog, O Benjamin!
9Ang Ephraim mahimong kamingawan
sa adlaw sa pagsilot;
diha sa mga banay sa Israel
akong gipahayag ang matuod gayod.
10Ang mga pangulo sa Juda mahisama kanila
nga nag-irog sa utlanan sa yuta;
nganha kanila akong ibubo ang akong
kaligutgot sama sa tubig.
11Ang Ephraim gidaogdaog, nadugmok sa paghukom,
kay siya nakahukom sa pagsunod sa kakawangan.#5:11 kakawangan: Sa Hebreo, sugo.
12Busa ako sama sa anunugba alang sa Ephraim,
ug sama sa agay-ay alang sa balay sa Juda.
13Sa pagkakita sa Ephraim sa iyang sakit,
ug sa Juda sa iyang samad,
miadto ang Ephraim sa Asiria
ug nagpadala ngadto sa gamhanang hari.
Apan siya dili makahimo sa pag-ayo kaninyo,
o sa pag-ayo sa inyong samad.
14Kay ako mahisama sa liyon alang sa Ephraim,
ug sama sa batan-ong liyon alang sa balay sa Juda.
Ako gayod mokuniskunis ug mobiya,
ako mobihag ug walay bisan kinsa nga makaluwas.
15Ako mobalik pag-usab sa akong dapit,
hangtod nga sila moila sa ilang kalapasan ug mangita sa akong nawong,
ug sa ilang kasakit sila mangita kanako.
Currently Selected:
HOSEA 5: ABCEB
Highlight
Share
Copy
Want to have your highlights saved across all your devices? Sign up or sign in
©Philippine Bible Society, 2011
