GENESIS 25

Ang Ubang Kaliwat ni Abraham

1Unya si Abraham nangasawa na usab ug lain, nga ginganlan ug Ketura. 2Ug iyang gipanganak si Zimran, si Joksan, si Medan, si Midian, si Isbak ug si Sua. 3Si Joksan mao ang amahan ni Seba ug ni Dedan. Ang mga kaliwat ni Dedan mao ang mga Asurihanon, Letusihanon ug Leumihanon. 4Ang mga anak ni Midian mao sila si Efa, si Efer, si Hanok, si Abida ug si Eldaa. Silang tanan mao ang mga kaliwat ni Ketura. 5Gihatag ni Abraham ang tanan nga iya ngadto kang Isaac. 6Apan ngadto sa mga anak nga lalaki sa iyang mga puyopuyo, si Abraham mihatag kanila ug mga gasa. Ug sa dihang buhi pa siya gipalakaw niya sila layo kang Isaac nga iyang anak, ngadto sa silangan nga kayutaan.

Ang Pagkamatay ug Paglubong kang Abraham

7Kini mao ang mga adlaw sa mga tuig sa kinabuhi ni Abraham, 175 ka tuig. 8Si Abraham miginhawa sa iyang kataposan ug namatay siya nga tigulang na kaayo, ug hupong sa katuigan ug gitipon ngadto sa iyang katawhan. 9Ug siya gilubong ni Isaac ug ni Ismael nga iyang mga anak didto sa langob sa Macpela, didto sa kapatagan ni Efron nga anak ni Zoar nga Hitihanon, sa silangan sa Mamre, 10ang kapatagan nga gipalit ni Abraham gikan sa mga Hitihanon. Didto gilubong si Abraham uban kang Sarah nga iyang asawa.#Gen. 23:3-16. 11Human sa kamatayon ni Abraham, si Isaac nga iyang anak gipanalanginan sa Dios. Ug mipuyo si Isaac sa Beer-lahai-roi.

Ang mga Kaliwat ni Ismael

12Kini mao ang mga kaliwat ni Ismael, anak ni Abraham kang Hagar nga Ehiptohanon, ang ulipon nga babaye ni Sarah. 13Ug mao kini ang mga ngalan sa mga anak nga lalaki ni Ismael nga ginganlan sumala sa han-ay sa ilang pagkahimugso: si Nebaiot, ang kamagulangan ni Ismael, ug si Kedar, si Abdeel, si Mibsam, 14si Misma, si Duma, si Masa, 15si Hadad, si Tema, si Jetur, si Nafis, ug si Kedema. 16Mao kini ang mga anak nga lalaki ni Ismael ug ang ilang mga ngalan, sumala sa ilang mga lungsod ug sumala sa ilang mga banay, napulo ug duha ka pangulo sumala sa ilang mga panimalay. 17Kini mao ang mga tuig sa kinabuhi ni Ismael, 137 ka tuig. Ug miginhawa siya sa iyang kataposan ug namatay siya ug gitipon sa iyang mga katawhan. 18Sila mipuyo gikan sa Havila hangtod sa Sur nga atbang sa Ehipto, padulong sa Asiria ug nagpuyo siya nga kabatok sa tanan niyang mga kaigsoonan.

Ang Pagkatawo ni Esau ug ni Jacob

19Kini mao ang mga kaliwat ni Isaac nga anak ni Abraham. Si Abraham mao ang amahan ni Isaac. 20Ug si Isaac nagpanuigon ug 40 ka tuig sa pagpangasawa niya kang Rebecca nga anak ni Betuel nga Aramihanon, sa Padan-aram, ug igsoong babaye ni Laban nga Aramhanon. 21Ug nag-ampo si Isaac sa Ginoo alang sa iyang asawa, tungod kay siya dili makaanak ug ang Ginoo mitubag sa iyang pag-ampo ug nagsamkon si Rebecca nga iyang asawa. 22Ug ang mga bata nagdinuotay diha sa sulod niya ug miingon siya, “Kon mao kini, ngano nga mabuhi pa ako?” Ug siya miadto sa pagpangutana sa Ginoo. 23Ug ang Ginoo mitubag kaniya,

“Adunay duha ka nasod sa imong taguangkan,

ug ang duha ka katawhan nga mangatawo gikan kanimo magkabahin,

ang usa kusgan kay sa usa

ug ang magulang mag-alagad sa manghod.”

24Sa dihang miabot na ang mga adlaw aron siya manganak, tan-awa, dihay kaluha sa iyang taguangkan. 25Ug ang una nga migula pulahon ug ang tibuok nga lawas sama sa usa ka bisti nga gisapawan ug balhibo, ug gitawag nila ang iyang ngalan ug Esau.#25:25 ESAU: sa ato pa, sa balhiboon. 26Human niini migula ang iyang igsoon nga lalaki, ug ang iyang kamot mikupot sa tikod ni Esau ug gitawag nila ang iyang ngalan ug Jacob.#25:26 JACOB: sa ato pa, migunit sa tikod. Ug si Isaac nagpanuigon ug 60 ka tuig sa dihang gipanganak na kini sila.

Gibaligya ni Esau ang Iyang Katungod Sa Pagkapanganay

27Sa dihang midako na ang mga bata, si Esau nahimong batid sa pagpangayam, tawo sa kapatagan, apan si Jacob tawo nga hilomon nga anaa kanunay sa sulod sa tolda. 28Si Esau pinangga ni Isaac kay makakaon man siya sa pinangayaman niini, apan pinangga ni Rebecca si Jacob.

29Unya nagluto si Jacob ug sud-an nga sinabawan ug miabot si Esau gikan sa kapatagan ug gigutom pag-ayo. 30Ug si Esau miingon kang Jacob, “Pakan-a ako nianang pulapula nga sinabaw kay gigutom kaayo ako.” Busa ginganlan siya ug Edom. 31Ug si Jacob miingon, “Ibaligya una kanako ang imong katungod sa pagkapanganay.” 32Unya si Esau miingon, “Tan-awa, hapit na ako mamatay, unsay kapuslanan kanako sa akong katungod sa pagkapanganay?” 33#Rom. 9:12; Heb. 12:16. Si Jacob miingon, “Panumpa una kanako.” Ug siya nanumpa kaniya, ug gibaligya niya kang Jacob ang iyang katungod sa pagkapanganay. 34Unya si Esau gihatagan ni Jacob ug pan ug sa linat-an nga mga liso ug siya mikaon ug miinom ug mitindog ug milakaw. Sa ingon niana gisalikway ni Esau ang iyang katungod sa pagkapanganay.

Currently Selected:

GENESIS 25: ABCEB

Highlight

Copy