EZRA 3
3
Nagsimba na Usab Sila Didto sa Templo
1Sa dihang miabot ang ikapito nga bulan, ug ang mga kaliwat sa Israel diha sa mga siyudad, ang katawhan nagtigom ingon nga usa ka tawo didto sa Jerusalem. 2#Ex. 27:1. Unya mitindog si Jesua nga anak ni Josadak ug ang iyang kaubang mga pari ug si Zerubabel nga anak ni Sealtiel ingon man ang iyang mga kadugo, ug ilang gitukod ang halaran sa Dios sa Israel, aron halaran kini ug mga halad nga sunogon ingon nga nasulat kini diha sa Balaod ni Moises, ang tawo sa Dios. 3#Num. 28:1-8. Ilang gipahimutang ang halaran sa dapit niini kay ang kahadlok miabot kanila tungod sa mga katawhan sa mga kayutaan ug sila naghalad ug mga halad nga sunogon ibabaw niini ngadto sa Ginoo, mga halad nga sunogon sa buntag ug sa gabii. 4#Num. 29:12-38. Ug ilang gihimo ang Kasaulogan sa mga Balongbalong ingon nga kini nasulat ug gihalad ang matag adlaw nga mga halad nga sunogon nga inihap sumala sa tulumanon, sumala sa gikinahanglan sa matag adlaw. 5#Num. 28:11–29:39. Ug sa human niini, ang magpadayon nga halad nga sunogon, ang mga halad sa bag-ong subang sa bulan ug sa tanang gitakda nga kasaulogan sa Ginoo ug ang mga halad sa matag usa nga naghimo sa kinabubut-on nga halad ngadto sa Ginoo. 6Sukad sa unang adlaw sa ikapito nga bulan misugod sila sa paghalad sa mga halad nga sunogon alang sa Ginoo. Apan ang patukoranan sa Templo sa Ginoo wala pa ikapahimutang.
Gisugdan ang Pagtukod Pag-usab sa Templo
7Unya mihatag sila ug salapi sa mga tigsapsap sa bato ug sa mga panday, ug pagkaon ug ilimnon ug lana ngadto sa mga Sidonhanon ug sa mga Tirohanon aron sa pagdala ug mga cedro nga kahoy gikan sa Lebanon ngadto sa dagat sa Jopa sumala sa pagtugot kanila ni Ciro nga hari sa Persia.
8Sa ikaduhang tuig sa ilang pag-abot sa balay sa Dios didto sa Jerusalem, sa ikaduhang bulan, si Zerubabel nga anak ni Sealtiel ug si Jesua nga anak ni Josadak nagsugod uban sa ilang mga kaigsoonan, mga pari ug mga Levihanon ug ang tanan nga mga miabot sa Jerusalem gikan sa pagkabinihag. Gitudlo nila ang mga Levihanon, sukad sa 20 ka tuig ang panuigon ug pataas aron sa pagdumala sa buluhaton sa balay sa Ginoo. 9Unya si Jesua uban sa iyang mga anak nga lalaki ug sa iyang mga kadugo, ug si Kadmiel ug ang iyang mga anak nga lalaki, ang mga kaliwat ni Juda, nagdumala sa mga mamumuo diha sa balay sa Dios uban sa mga anak ni Henadad ug sa mga Levihanon ug sa ilang mga anak ug mga kadugo.
10 #
1 Cron. 25:1. Ug sa diha nga ang mga nagtukod mipahiluna sa patukoranan sa Templo sa Ginoo, ang mga pari nga nagsul-ob sa ilang mga bisti miduol nga may mga trumpeta, ug ang mga Levihanon, ang mga kaliwat ni Asaf, may mga piyangpiyang, aron sa pagdayeg sa Ginoo sumala sa sugo ni David nga hari sa Israel. 11#1 Cron. 16:34; 2 Cron. 5:13; 7:3; Sal. 100:5; 106:1; 118:1; 136:1; Jer. 33:11.Nagtubagtubag sila sa pag-awit, nagdayeg ug naghatag ug mga pasalamat ngadto sa Ginoo,
“Kay siya maayo,
kay ang iyang gugmang walay paglubad
nagpadayon hangtod sa kahangtoran
ngadto sa Israel.”
Ug ang tibuok katawhan misinggit sa kusog nga tingog, sa dihang nagdayeg sila sa Ginoo, tungod kay napahimutang na man ang sukaranan sa balay sa Ginoo. 12Apan daghan sa mga pari ug mga Levihanon ug mga pangulo sa mga panimalay sa mga katigulangan, mga tawo nga tigulang nga nakakita sa unang balay, mihilak pag-ayo sa dihang nakita nila nga ang patukoranan niining balaya napahimutang na. Apan daghan ang misinggit sa kalipay, 13nga tungod niana ang katawhan wala na makaila sa kalainan sa kasaba sa pagsinggit sa kalipay gikan sa kasaba sa paghilak sa katawhan kay ang katawhan naninggit sa usa ka kusog nga tingog ug ang kasaba nadungog sa layo.
Currently Selected:
EZRA 3: ABCEB
Highlight
Share
Copy
Want to have your highlights saved across all your devices? Sign up or sign in
©Philippine Bible Society, 2011
