EXODO 5

Si Moises ug si Aaron Nangatubang sa Hari sa Ehipto

1Unya miadto si Moises ug si Aaron sa Paraon ug miingon kaniya, “Mao kini ang giingon ni Yahweh, ang Dios sa Israel, ‘Tugoti sa paglakaw ang akong katawhan aron sila makahimo ug kasaulogan alang kanako didto sa kamingawan.’ ” 2Apan ang Paraon mitubag, “Kinsa ba si Yahweh nga kinahanglang mamati ako sa iyang tingog ug magtugot sa pagpalakaw sa Israel? Wala ako makaila kang Yahweh, dili usab ako motugot sa pagpalakaw sa Israel.” 3Unya sila miingon, “Ang Dios sa mga Hebreo nakigkita kanamo. Tugoti kami sa paglakaw ug tulo ka adlaw nga panaw ngadto sa kamingawan aron kami makahalad ngadto sa Ginoo nga among Dios, basin unya ug silotan kami niya pinaagi sa kamatay ug espada.” 4Apan ang hari sa Ehipto miingon kanila, “Moises ug Aaron, nganong inyo mang kuhaon ang katawhan gikan sa ilang buhat? Balik kamo sa inyong buhat.” 5Ug ang Paraon miingon, “Tan-awa, ang katawhan sa yuta daghan na ug inyo silang pahunongon sa ilang mga buhat!” 6Niadtong adlawa nagsugo ang Paraon sa mga tigdumala sa buhat sa katawhan ug sa ilang mga kapatas, 7“Ayaw na kamo panghatag ug dagami ngadto sa katawhan alang sa pagbuhat ug tisa ingon sa gihimo hangtod karon. Pasagdi sila nga maoy manguha ug dagami alang sa ilang kaugalingon. 8Apan ang gidaghanon sa mga tisa nga ilang gibuhat kaniadto maoy inyong ipahamtang kanila ug ayaw ninyo kini paubsi bisan diyotay kay sila tapolan, ug tungod niana sila nagsinggit, ‘Tugoti kami sa paglakaw aron maghalad sa among Dios.’ 9Pahamtangi ug bug-at pa nga buhat ang mga lalaki aron sila magkalisod niini ug dili magtagad sa mga pulong nga bakak.”

10Busa ang mga tigdumala sa buhat sa katawhan ug ang ilang mga kapatas miadto ug miingon sa katawhan, “Mao kini ang giingon sa Paraon, ‘Ako dili manghatag kaninyo ug dagami. 11Pangadto kamo, panguha ug dagami sa bisan diin nga kamo makakita niini, apan ang inyong buhat dili gayod paubsan.’ ” 12Busa ang katawhan nakatag sa tibuok yuta sa Ehipto aron sa pagkuha ug mga tuod sa trigo ingon nga dagami. 13Ang mga tigdumala sa buhat nagpadali kanila nga nag-ingon, “Humana ninyo ang inyong buhat, ang inadlaw ninyong buhat sama kaniadto nga may dagami kamo.” 14Ug ang mga kapatas sa katawhan sa Israel nga gipahimutang diha kanila sa mga tigdumala sa buhat sa Paraon gipanglatos ug gipangutana, “Nganong wala man ninyo buhata ang tanan ninyong buluhaton sa pagbuhat ug tisa niining adlawa sama kaniadto?”

15Unya ang mga kapatas sa katawhan sa Israel miadto ug nagpakitabang sa Paraon “Nganong nagbuhat man ikaw sa ingon ngadto sa imong mga ulipon? 16Walay dagami nga gihatag sa imong mga ulipon, apan miingon sila kanamo, ‘Pagbuhat kamo ug tisa!’ Tan-awa, ang imong mga ulipon gipanglatos, apan ang sayop anaa sa imong kaugalingong katawhan.” 17Apan siya miingon, “Tapolan kaayo kamo ug mao kana nga moingon kamo, ‘Manglakaw kita ug maghalad ngadto sa Ginoo.’ 18Busa lakaw kamo sa inyong buhat kay walay dagami nga ihatag kaninyo apan kinahanglang maghimo kamo sa gikinahanglang gidaghanon sa mga tisa.” 19Nakita sa mga kapatas sa katawhan sa Israel nga sila anaa sa daotang kahimtang, sa dihang miingon sila, “Ayaw gayod ninyo paubsi bisan diyotay ang gidaghanon sa tisa nga inyong buhaton matag adlaw.” 20Ilang nasugatan si Moises ug si Aaron nga nagtindog sa dalan sa ilang pagpauli gikan sa Paraon. 21Ug ang mga kapatas miingon kanila, “Makita unta sa Ginoo ang inyong gibuhat ug hukman kamo kay gihimo ninyo kami nga dulumtanan sa mga mata sa Paraon ug sa mga mata sa iyang mga sulugoon ug nagbutang ug espada diha sa ilang mga kamot aron sa pagpatay kanamo.”

Si Moises Nagmulo Ngadto sa Ginoo

22Unya si Moises mibalik ngadto sa Ginoo ug miingon, “O Ginoo, ngano man nga imong gilisodlisod kining katawhan? Nganong imo man ako nga gipadala? 23Kay sukad sa akong pag-adto sa Paraon aron sa pagsulti kaniya tungod sa imong ngalan, naghimo siya ug kadaot niining katawhan ug wala gayod nimo luwasa ang imong katawhan.”

Currently Selected:

EXODO 5: ABCEB

Highlight

Copy