MGA TAGA-EFESO 5

Ang Pagkinabuhi Diha sa Kahayag

1Busa sundog kamo sa Dios, ingon nga mga pinalanggang anak. 2#Ex. 29:18; Sal. 40:6. Ug pagkinabuhi kamo diha sa gugma ingon nga si Cristo nahigugma kanato ug alang kanato, mitugyan sa iyang kaugalingon ingon nga humot nga halad ug halad nga inihaw ngadto sa Dios.

3Apan ang salawayong pakighilawas ug ang tanang kahugaw o kahakog, kinahanglan nga dili gani mahisgotan diha kaninyo kay dili man kini angay sa mga balaan, 4bisan ang binastos o sulting binuang o sulting law-ay, mga butang nga dili angay; apan mga pasalamat hinuon. 5Kay nasayod kamo niini, nga ang tanang makihilawason o hugaw o hakog, nga sa ato pa, tigsimba ug mga diosdios, walay mapanunod sa gingharian ni Cristo ug sa Dios.

6Ayaw kamo pailad ni bisan kinsa pinaagi sa mga sulti nga walay kapuslanan, kay tungod niining mga butanga ang kapungot sa Dios moabot diha sa mga tawong masupilon. 7Busa ayaw kamo pagpakig-ambit kanila, 8kay bisan tuod kangitngit kamo kaniadto, karon kahayag na kamo tungod sa Ginoo. Pagkinabuhi kamo ingon nga mga anak sa kahayag, 9kay ang bunga sa kahayag makita diha sa tanang maayo ug matarong ug matuod, 10magpakita kon unsay kahimut-an sa Ginoo. 11Ug ayaw kamo pag-ambit sa mga dili mabungahong buhat sa kangitngit, hinuon kinahanglang ibutyag ninyo kini. 12Kay makauulaw man gani bisan ang paghisgot sa mga butang nga gibuhat nila sa tago; 13apan ang tanang butang nga nabutyag pinaagi sa kahayag nadayag 14kay ang tanang nadayag kahayag. Busa kini giingon:

“Pagmata, ikaw nga natulog,

ug bangon gikan sa mga patay,

ug dan-agan ikaw ni Cristo.”

15Busa, pagbantay kamo pag-ayo sa inyong pagkinabuhi, dili ingon nga mga walay kaalam kondili ingon nga mga maalamon, 16#Col. 4:5. magpahimulos sa panahon kay ang mga adlaw karon daotan man. 17Busa ayaw kamo pagpakabuang, kondili sabta hinuon ninyo kon unsa ang kabubut-on sa Ginoo. 18Ug ayaw kamo paghubog sa bino, kay kana maoy pagpatuyang; hinuon magpapuno kamo sa Espiritu. 19Pagsinultihay kamo ginamit ang mga salmo ug mga alawiton ug mga awit nga espirituhanon, mag-awit ug magtugtog nga magdayeg sa Ginoo uban sa bug-os ninyong kasingkasing. 20#Col. 3:16-17. Sa tanang higayon magpasalamat kamo ngadto sa Dios nga Amahan tungod sa tanang mga butang, diha sa ngalan sa atong Ginoong Jesu-Cristo.

Mahitungod sa Bana ug Asawa

21Magpasakop kamo nga masinugtanon sa usa ug usa ingon nga nagtahod kang Cristo.

22 # Col. 3:18; 1 Ped. 3:1. Kamong mga asawa, kinahanglang magpasakop kamo nga masinugtanon sa inyong kaugalingong mga bana sama ngadto sa Ginoo. 23Kay ang bana mao ang ulo sa asawa, sama usab nga si Cristo ulo sa iglesia, siya mao ang manluluwas sa lawas. 24Sama nga ang iglesia masinugtanong nagpasakop kang Cristo, sa ingon usab niana ang mga asawa kinahanglang magpasakop nga masinugtanon sa ilang mga bana sa tanang paagi.

25 # Col. 3:19; 1 Ped. 3:7. Kamong mga bana, higugmaa ninyo ang inyong mga asawa, sama nga si Cristo nahigugma sa iglesia ug mitugyan sa iyang kaugalingon alang kaniya, 26aron iyang balaanon siya sa mahinloan na niya siya pinaagi sa paghugas kaniya ug tubig pinaagi sa pulong, 27aron nga sa iyang atubangan ang iglesia ikahalad diha sa iyang katahom, walay buling o kunot o bisan unsa nga sama niini, aron siya mahimong balaan ug dili masaway. 28Sa ingon usab niini, ang mga bana kinahanglang mahigugma sa ilang kaugalingong asawa ingon nga ilang kaugalingong lawas. Ang nahigugma sa iyang asawa nahigugma sa iyang kaugalingon. 29Kay wala gayoy tawo nga nagdumot sa iyang kaugalingong lawas, kondili magpakaon hinuon niini ug mag-amoma niini sama sa gibuhat ni Cristo alang sa iglesia, 30kay mga bahin man kita sa iyang lawas. 31#Gen. 2:24. “Tungod niining maong hinungdan, ang lalaki mobiya sa iyang amahan ug inahan ug makig-usa siya sa iyang asawa, ug silang duha mahimong usa ka unod.” 32Kini usa ka dakong misteryo, apan ako nagsulti mahitungod kang Cristo ug sa iglesia. 33Hinuon, alang sa matag usa ka lalaki diha kaninyo, kinahanglang mahigugma gayod sa iyang asawa sama sa iyang kaugalingon ug ang asawa kinahanglang magtahod sa iyang bana.

Currently Selected:

MGA TAGA-EFESO 5: ABCEB

Highlight

Copy