DANIEL 7

MGA PANAN-AWON NI DANIEL

Ang Panan-awon ni Daniel sa Upat ka Mananap

1Sa unang tuig ni Belsasar nga hari sa Babilonia si Daniel adunay damgo ug mga panan-awon sa iyang ulo samtang naghigda siya sa iyang higdaanan. Unya iyang gisulat ang damgo ug gisugilon ang kinatibuk-an sa maong butang. 2Si Daniel miingon, “Akong nakita sa akong panan-awon sa pagkagabii ug dihay upat ka hangin sa langit nga mikutaw sa dakong dagat, 3#Pin. 13:1; 17:8. ug migula gikan sa dagat ang upat ka dagkong mananap nga lahi sa usa ug usa. 4Ang una sama sa usa ka liyon, ug adunay mga pako sa agila. Unya samtang nagtan-aw ako, ang mga pako niini nangaibot ug kini gialsa gikan sa yuta ug gipatindog sa duha ka tiil sama sa usa ka tawo ug ang panghunahuna sa tawo gihatag niini. 5Unya, dihay laing mananap, ang ikaduha, sama sa usa ka oso. Kini gipatindog sa usa ka kilid, ug kini adunay tulo ka gusok diha sa iyang baba taliwala sa iyang mga ngipon, ug kini giingnan, ‘Tindog, panukob ug daghang unod.’ 6#Pin. 13:2. Human niini, ako mitan-aw ug nakita nako ang lain nga sama sa usa ka leopardo, nga adunay upat ka pako sa langgam sa likod niini, ug ang mananap adunay upat usab ka ulo ug ang paggahom gihatag kaniya. 7#Pin. 12:3; 13:1. Human niini, nakita nako diha sa mga panan-awon sa pagkagabii nga dihay ikaupat nga mananap, makalilisang ug bangis ug hilabihan ka kusgan, ug kini may dagkong mga ngipon nga puthaw. Kini milamoy ug mikuniskunis ug miyatak sa salin pinaagi sa iyang mga tiil. Kini lahi sa tanang mananap nga una kaniya, ug kini adunay napulo ka sungay. 8#Pin. 13:5-6. Akong gisud-ong ang mga sungay, ug dihay migula gikan kanila nga laing sungay nga gamay, nga sa atubangan niining tulo sa unang mga sungay giibot hangtod sa mga gamot, ug niining sungaya dihay mga mata nga sama sa mga mata sa tawo, ug usa ka baba nga nagsulti ug dagkong mga butang.

Ang Panan-awon Mahitungod Kaniya nga Buhi Kanunay

9 # Pin. 20:4; Pin. 1:14. Samtang ako nagsud-ong,

ang mga trono gibutang,

ug ang usa sa kakaraanan milingkod;

ang iyang mga bisti puti kaayo

ug ang buhok sa iyang ulo sama sa lunsay nga balhibo sa karnero;

ang iyang trono nagdilaab nga siga,

ang mga ligid niini nagsiga nga kalayo.

10 # Pin. 5:11; Pin. 20:12. Ang sapa nga kalayo mibul-og

ug mibaha gikan sa iyang atubangan;

libo ka libo ang nag-alagad kaniya,

ug napulo ka libo ka napulo ka libo nagtindog sa iyang atubangan;

ang hukmanan milingkod sa paghukom

ug ang mga basahon gibukhad.

11Niadtong taknaa ako mitan-aw tungod sa tingog sa dagkong mga pulong nga gisulti sa sungay. Ug samtang ako nagtan-aw, gipatay ang mananap ug ang iyang lawas gilaglag ug gitugyan aron sunogon sa kalayo. 12Mahitungod sa nahibilin nga mga mananap, ang ilang paghari gikuha apan ang ilang mga kinabuhi gilugwayan ug usa ka higayon ug usa ka panahon.

13 # Mat. 24:30; 26:64; Mar. 13:26; 14:62; Luc. 21:27; Pin. 1:7, 13; 14:4. Nakita nako diha sa mga panan-awon sa kagabhion,

ug uban sa mga panganod sa langit

may usa nga miabot nga sama sa anak sa tawo

ug siya miadto kaniya nga gikan sa kakaraanan

ug gidala sa iyang atubangan.

14 # Pin. 11:15. Ug gihatag kaniya ang paggahom,

ug himaya ug gingharian

aron ang tanang mga katawhan, mga nasod, ug mga pinulongan

mag-alagad kaniya;

ang iyang paggahom walay kataposan,

paggahom nga dili molabay,

ug ang iyang gingharian dili mapukan.

Gipasabot ang mga Panan-awon

15Mahitungod kanako, si Daniel, ang akong espiritu nabalaka sulod kanako ug ang mga panan-awon sa akong ulo nakapalisang kanako. 16Ako miduol sa usa kanila nga nagtindog didto ug nangutana kaniya sa kamatuoran mahitungod niining tanan. Busa gisuginlan niya ako ug gitug-anan sa hubad sa maong mga butang. 17“Kining upat ka dagkong mga mananap mao ang upat ka hari nga mobarog dinhi sa yuta. 18#Pin. 22:5. Apan ang mga balaan sa Labing Halangdon makadawat sa gingharian ug makabaton sa gingharian hangtod sa kahangtoran, hangtod gayod sa kahangtoran.”

19Unya nagtinguha ako nga masayod sa kamatuoran mahitungad sa ikaupat nga mananap nga lahi sa tanan, hilabihan ka makalilisang, nga ang mga ngipon puthaw ug ang mga kuko bronsi nga naglamoy ug nagdugmok ug nagyatak sa nahibilin pinaagi sa mga tiil niini 20ug mahitungod sa napulo ka sungay nga diha sa iyang ulo ug sa lain nga sungay nga migula ug sa atubangan niini may tulo nga napukan, ang sungay nga may mga mata ug usa ka baba nga nagsulti ug dagkong mga butang, ug nga daw dako pa kay sa iyang mga kauban. 21#Pin. 13:7. Samtang ako nagtan-aw, kining sungay nakiggubat batok sa mga balaan ug mipatigbabaw kanila 22#Pin. 20:4. hangtod nga ang gikan sa kakaraanan miabot ug ang hukom gihatag alang sa mga balaan sa Labing Halangdon ug miabot ang panahon nga ang mga balaan nakadawat sa gingharian.

23Sa ingon niana siya miingon, “Ang ikaupat nga mananap

mao ang ikaupat nga gingharian sa yuta,

nga lahi gikan sa tanang mga gingharian

ug molamoy kini sa tibuok yuta,

ug magyatak niini,

ug magdugmok niini.

24 # Pin. 17:12. Mahitungod sa napulo ka sungay,

gikan niining ginghariana

motindog ang napulo ka hari

ug adunay lain nga motindog sunod kanila.

Siya lahi sa una ug buntogon niya ang tulo ka hari.

25 # Pin. 12:14; 13:5-6. Siya magsulti ug mga pulong batok sa Labing Halangdon,

ug magluya sa mga balaan sa Labing Halangdon,

ug maghunahuna sa pag-usab sa mga panahon ug sa balaod;

ug sila ihatag sa iyang kamot sa usa ka higayon

duha ka higayon ug sa katunga sa usa ka higayon.

26Apan ang hukmanan molingkod sa paghukom,

ug ang iyang paggahom kuhaon

aron hutdon ug laglagon hangtod sa kataposan.

27Ug ang gingharian ug ang paggahom

ug ang pagkagamhanan sa mga gingharian ilalom sa tibuok nga langit,

ihatag ngadto sa katawhan sa mga balaan sa Labing Halangdon;

ang ilang gingharian walay kataposan nga gingharian,

ug ang tanan nga ginsakpan mag-alagad ug motuman kanila.”#Pin. 20:4; Pin. 22:5.

28Dinhi natapos ang maong butang. Mahitungod kanako, si Daniel, ang akong mga hunahuna nakapakuyaw pag-ayo kanako, ug nangluspad ang akong nawong; apan akong gitagoan ang maong butang sulod sa akong hunahuna.

Currently Selected:

DANIEL 7: ABCEB

Highlight

Copy