MGA BUHAT 7

Ang Panalipod ni Esteban

1Unya ang labawng pangulong pari nangutana kaniya, “Tinuod ba kini?” 2Ug si Esteban miingon,

“Mga igsoon ug mga amahan, pamati kamo. Ang Dios sa himaya mipakita ngadto sa atong amahan nga si Abraham sa didto pa siya sa Mesopotamia, sa wala pa siya magpuyo sa Haran, 3#Gen. 12:1. ug miingon kaniya, ‘Biyai ang imong yuta ug ang imong kadugo ug adto sa yuta nga akong ipakita kanimo.’ 4#Gen. 11:31; Gen. 12:4. Unya siya mibiya sa yuta sa mga Caldeanhon ug mipuyo sa Haran. Ug human mamatay ang iyang amahan, ang Dios midala kaniya gikan didto paingon niining yutaa nga inyo karong gipuy-an. 5#Gen. 12:7; 13:15; 15:18; 17:8. Apan wala niya siya hatagi ug panulundon dinhi bisan na lang ug igong katumban sa tiil, apan nagsaad nga ihatag kini ngadto kaniya ingon nga iyaha ug ngadto sa iyang kaliwatan nga mosunod kaniya, bisan pa ug wala siyay anak. 6#Gen. 15:13-14. Ug ang Dios misulti niini, nga ang iyang kaliwatan mahimong langyaw sa yuta nga ila sa laing mga tawo nga mag-ulipon kanila ug magdaogdaog kanila sulod sa upat ka gatos ka tuig. 7#Ex. 3:12. ‘Apan akong hukman ang nasod nga ilang alagaran,’ nag-ingon ang Dios, ‘ug human niana sila mamiya gikan didto ug magsimba kanako dinhi niining dapita.’ 8#Gen. 17:10-14; Gen. 21:2-4; Gen. 25:26; Gen. 29:31–35:18. Busa gihatag sa Dios kaniya ang kasabotan mahitungod sa pagtuli. Ug si Abraham nahimong amahan kang Isaac, ug kini iyang gituli sa ikawalo nga adlaw; ug si Isaac nahimong amahan kang Jacob ug si Jacob sa napulo ug duha ka patriarka.

9 # Gen. 37:11; Gen. 37:28; Gen. 39:2, 21. “Ug ang mga patriarka nga nasina kang Jose, mibaligya kaniya ngadto sa Ehipto; apan ang Dios uban kaniya, 10#Gen. 41:39-41. ug miluwas kaniya gikan sa tanan niyang mga kasakitan, ug naghatag kaniyag grasya ug kaalam sa atubangan sa Paraon nga hari sa Ehipto nga mihimo kaniya nga gobernador sa Ehipto ug sa tibuok niyang panimalay. 11#Gen. 42:1-2. Unya miabot ang gutom ug ang dakong kasakit sa tibuok Ehipto ug Canaan, ug ang atong mga katigulangan wala makakaplag ug pagkaon. 12Apan sa pagkadungog ni Jacob nga may trigo didto sa Ehipto, gipaadto niya didto ang atong mga katigulangan sa unang higayon. 13#Gen. 45:1; Gen. 45:16. Ug sa ikaduhang pag-adto, si Jose mipaila sa iyang mga igsoon, ug ang banay ni Jose nailhan sa Paraon. 14#Gen. 45:9-10, 17-18; Gen. 46:27 (LXX). Unya gipaadtoan ug gipatawag ni Jose ang iyang amahan nga si Jacob ug ang tanan niyang kadugo 75 ka tawo. 15#Gen. 46:1-7; Gen. 49:33. Busa si Jacob milugsong ngadto sa Ehipto. Ug didto namatay siya ug ang atong mga katigulangan 16#Gen. 23:3-16; 33:19; 50:7-13; Jos. 24:32. ug sila gidala pagbalik ngadto sa Sekem ug gibutang sa lubnganan nga gibayran ni Abraham ug plata gikan sa mga anak ni Hamor sa Sekem.

17“Sa nagkaduol na ang panahon nga tumanon sa Dios ang iyang gisaad kang Abraham, ang mga tawo miuswag ug midaghan didto sa Ehipto 18#Ex. 1:7-8. hangtod nga mitungha ang laing hari sa Ehipto nga wala makaila kang Jose. 19#Ex. 1:10-11; Ex. 1:22. Kini nga hari, sa iyang pagpanglimbong sa atong kaliwat, mipugos sa atong mga katigulangan sa pagbiya sa ilang gagmayng mga bata didto sa gawas aron kini dili mabuhi. 20#Ex. 2:2. Sa maong panahon natawo si Moises ug siya matahom gayod sa atubangan sa Dios. Sulod sa tulo ka bulan siya gipadako didto sa balay sa iyang amahan. 21#Ex. 2:3-10. Ug sa gibiyaan na siya sa gawas, ang babayeng anak sa Paraon misagop kaniya ug mipadako kaniya ingon nga iyang kaugalingong anak. 22Ug si Moises gitudloan sa tanang kaalam sa mga Ehiptohanon ug siya gamhanan sa iyang mga pulong ug mga buhat.

23 # Ex. 2:11-15. “Sa nagpanuigon na siya ug 40 ka tuig, misantop sa iyang kasingkasing ang pagduaw sa iyang kaigsoonan nga mga kaliwat ni Israel. 24Ug sa iyang pagkakita sa usa kanila nga gidagmalan, siya milaban sa gidaogdaog ug nanimalos alang kaniya pinaagi sa pagpuspos sa Ehiptohanon. 25Siya nagdahom nga ang iyang kaigsoonan nakasabot nga ang Dios naghatag kanila ug kaluwasan pinaagi sa iyang kamot, apan wala sila makasabot. 26Ug sa pagkasunod adlaw naabtan niya sila nga nag-away ug iya untang ulion sila. Siya miingon, ‘Mga tawo, managsoon ra kamo. Nganong nag-away man kamo?’ 27Apan siya giwakli sa tawo nga nagdagmal sa iyang kauban ug giingnan, ‘Kinsa bay naghimo kanimo nga among pangulo ug maghuhukom? 28Buot ka bang mopatay kanako sama sa imong pagpatay sa Ehiptohanon kagahapon?’ 29#Ex. 18:3-4. Ug niining tubaga si Moises mipalayo ug nahimong langyaw sa yuta sa Midian diin nahimo siyang amahan sa duha ka anak nga lalaki.

30“Unya sa dihang milabay ang 40 ka tuig, mipakita kaniya ang usa ka anghel didto sa kamingawan sa Bukid sa Sinai, diha sa nagdilaab nga sampinit. 31Sa pagkakita ni Moises niini nahibulong siya sa talan-awon ug sa pagduol niya aron sa pagtan-aw, nabati niya ang tingog sa Ginoo nga nag-ingon, 32‘Ako mao ang Dios sa imong mga katigulangan, ang Dios ni Abraham ug ni Isaac ug ni Jacob.’ Ug si Moises mikurog ug wala na mangahas sa pagtan-aw. 33Ug ang Ginoo miingon kaniya, ‘Huboa ang sandalyas sa imong mga tiil kay ang dapit nga imong gitindogan yuta nga balaan. 34#Ex. 3:1-10. Nakita gayod nako nga gidaogdaog ang akong katawhan nga didto sa Ehipto ug nadungog nako ang ilang mga pag-agulo ug ako nanaog aron sa pagluwas kanila. Ug karon duol ngari, paadtoon ko ikaw sa Ehipto.’

35 # Ex. 2:14. “Kining maong Moises nga ilang gisalikway ug giingnan, ‘Kinsa bay naghimo kanimo nga among pangulo ug maghuhukom?’ gipaanhi sa Dios ingon nga pangulo ug manluluwas pinaagi sa kamot sa anghel nga mipakita kaniya didto sa sampinit. 36#Ex. 7:3; Ex. 14:21; Num. 14:33. Iyang gipagula sila ug nagbuhat siya ug mga kahibulongan ug mga ilhanan didto sa Ehipto ug sa Dagat nga Pula ug sa kamingawan sulod sa 40 ka tuig. 37#Deut. 18:15, 18. Kini mao ang Moises nga miingon sa mga Israelinhon, ‘Usa ka propeta gikan sa inyong kaigsoonan patindogon sa Dios alang kaninyo, sama sa iyang pagpatindog kanako.’ 38#Ex. 19:1–20:17; Deut. 5:1-33. Mao kini siya ang didto sa pundok sa kamingawan uban sa anghel nga misulti kaniya didto sa Bukid sa Sinai ug uban sa atong mga katigulangan, ug siya nakadawat sa buhing mga pulong aron ihatag kanato. 39Ang atong mga katigulangan nagdumili sa pagtuman kaniya, hinuon ilang gisalikway siya, ug diha sa ilang mga kasingkasing sila namalik ngadto sa Ehipto, 40#Ex. 32:1. nga nag-ingon kang Aaron, ‘Buhati kami ug mga dios nga maoy mag-una sa among paglakaw kay mahitungod niining Moises nga nagpagula kanamo sa yuta sa Ehipto, wala kami mahibalo kon naunsa siya.’ 41#Ex. 32:2-6. Ug niadtong mga adlawa nagbuhat sila ug nating baka, ug ang maong larawan ilang gihalaran ug mga halad nga inihaw ug naghudyaka tungod sa mga hinimo sa ilang mga kamot. 42Apan ang Dios mitalikod kanila ug mitugyan kanila ngadto sa pagsimba sa mga bituon sa kalangitan, sumala sa nasulat sa basahon sa mga propeta nga nag-ingon:

‘Gihalaran ba ako ninyo ug mga inihaw ug mga halad

sulod sa 40 ka tuig didto sa kamingawan, O balay ni Israel?

43 # Amos 5:25-27 (LXX). Ug maoy inyong gidaladala ang tolda ni Moloc

ug ang bituon sa dios nga si Repan,

ang mga larawan nga inyong gibuhat aron simbahon.

Busa papahawaon ko gayod kamo ngadto

sa unahan pa sa Babilonia.’

44 # Ex. 25:9, 40. “Ang tolda sa pagpamatuod nabatonan sa atong mga katigulangan sa didto pa sila sa kamingawan sumala sa sugo sa Dios nga gisulti kang Moses, sa pagbuhat niini sumala sa sumbanan nga iyang nakita. 45#Jos. 3:14-17. Unya gidala kini sa atong mga katigulangan uban kang Josue sa dihang giilog nila ang yuta sa kanasoran nga gihinginlan sa Dios atubangan sa atong mga katigulangan. Ug nagpabilin ang tolda hangtod sa panahon ni David, 46#2 Sam. 7:1-16; 1 Cron. 17:1-14. nga nakakita ug kahimuot sa atubangan sa Dios ug naghangyo nga tugotan siya sa pagpangita ug puluy-anan alang sa Dios ni Jacob. 47#1 Hari 6:1-38; 2 Cron. 3:1-17. Apan si Solomon mao ang nagtukod ug balay alang kaniya. 48Apan ang Labing Halangdon wala magpuyo sa mga balay nga hinimo sa mga kamot; sumala sa giingon sa propeta,

49‘Ang langit maoy akong trono,

ug ang yuta maoy tumbanan sa akong mga tiil.

Unsang balaya ang inyong tukoron alang kanako, nag-ingon ang Ginoo,

o unsa ang dapit nga akong pahulayanan?

50 # Isa. 66:1-2. Dili ba ang akong kamot maoy nagbuhat niining tanang mga butang?’

51 # Isa. 63:10. “Kamong mga tikig ug liog ug mga gahi ug kasingkasing ug mga dalunggan, kanunay gayod kamong mosupak sa Espiritu Santo. Ingon sa gibuhat sa inyong mga katigulangan, mao usab ang inyong gibuhat. 52Kinsa ba sa mga propeta ang wala lutosa sa inyong mga katigulangan? Ug ilang gipamatay ang mga nagpropesiya mahitungod sa pag-anhi sa Matarong nga inyo karong gibudhian ug gipatay, 53kamo nga mao ang nakadawat sa Balaod nga gihatag kaninyo pinaagi sa mga anghel, apan wala ninyo tumana kini.”

Ang Pagbato kang Esteban

54Unya sa ilang pagkadungog niining mga butanga, sila nangasuko ug nagpakagot sa ilang mga ngipon batok kang Esteban. 55Apan si Esteban nga puno sa Espiritu Santo, mitutok sa langit ug nakita niya ang himaya sa Dios ug si Jesus nga nagtindog sa tuo sa Dios. 56Ug siya miingon, “Tan-awa, nakita nako ang mga langit nga naabli ug ang Anak sa Tawo nga nagtindog sa tuo sa Dios.” 57Apan sila naninggit sa kusog nga tingog, sinampongan ang ilang mga dalunggan ug nagdungan sa pagduol kaniya. 58Unya ila siyang giguyod sa gawas sa siyudad ug gibato. Ug ang mga saksi nangitsa sa ilang mga bisti ngadto sa tiilan sa usa ka batan-ong lalaki nga ginganlan ug Saulo. 59Ug samtang gibato nila si Esteban, siya nag-ampo nga nag-ingon, “Ginoong Jesus, dawata ang akong espiritu.” 60Ug siya miluhod ug misinggit sa kusog nga tingog, “Ginoo, ayaw paningla kining salaa diha kanila.” Ug sa nakasulti na siya niini, siya namatay.#7:60 namatay: Sa Grego: nahikatulog.

Currently Selected:

MGA BUHAT 7: ABCEB

Highlight

Copy