2 MGA CRONICAS 29
29
Ang Paghari ni Hesekias sa Juda
1Si Hesekias nagsugod sa paghari sa dihang 25 ka tuig ang iyang panuigon ug siya naghari sulod sa 29 ka tuig didto sa Jerusalem. Ang ngalan sa iyang inahan mao si Abias nga anak ni Zacarias. 2Siya nagbuhat sa matarong diha sa mga mata sa Ginoo, sumala sa tanan nga gibuhat ni David nga iyang amahan.
3Sa unang tuig sa iyang paghari, sa unang bulan, iyang giablihan ang mga pultahan sa balay sa Ginoo, ug giayo kini.
Ang Paghinlo sa Templo
4Iyang gidala sa sulod ang mga pari ug mga Levihanon ug gitigom sila sa hawanan dapit sa silangan, 5ug siya miingon kanila, “Pamati kamo kanako mga Levihanon! Karon balaana ninyo ang inyong kaugalingon ug balaana ang balay sa Ginoo, ang Dios sa inyong mga katigulangan, ug ipagawas ang kahugawan gikan sa balaang dapit. 6Kay ang atong mga katigulangan wala magmatinumanon ug nagbuhat ug daotan diha sa panan-aw sa Ginoo nga atong Dios. Gisalikway nila siya ug gilingiw nila ang ilang mga nawong gikan sa puluy-anan sa Ginoo ug mitalikod. 7Gitakpan usab nila ang mga pultahan sa mga agianan, ug gipamalong ang mga lampara ug wala magsunog ug insenso o maghalad sa mga halad nga sunogon didto sa balaang dapit ngadto sa Dios sa Israel. 8Busa ang kapungot sa Ginoo miabot sa Juda ug sa Jerusalem ug iyang gihimo sila nga kahadlokan, katingad-an ug talamayon, sumala sa nakita sa inyong mga mata. 9Kay ang atong mga katingulangan nangapukan pinaagi sa espada ug ang atong mga anak nga lalaki ug mga anak nga babaye ug ang atong mga asawa anaa sa pagkabihag tungod niini. 10Karon ania sa akong kasingkasing ang paghimo ug usa ka kasabotan uban sa Ginoo, ang Dios sa Israel, aron ang iyang bangis nga kasuko mahanaw gikan kanato. 11Mga anak ko, ayaw kamo pagpasagad karon kay ang Ginoo nagpili kaninyo sa pagtindog sa atubangan niya, aron sa pag-alagad kaniya, ug nga kamo mahimo nga iyang mga alagad ug magsunog sa insenso alang kaniya.”
12Unya ang mga Levihanon nanindog, si Mahat nga anak ni Amasai, si Joel nga anak ni Asarias, sa mga kaliwat sa mga Kohatihanon; ug sa mga anak nga lalaki ni Merari, si Kis nga anak ni Abdi, si Asarias nga anak ni Jehalelel; ug sa mga Gersonhanon, si Joa nga anak ni Zima ug si Eden nga anak ni Joa; 13ug sa mga anak nga lalaki ni Elisafan, si Simri ug si Jeuel; ug sa mga anak nga lalaki ni Asaf, si Zacarias ug si Matanias; 14ug sa mga anak nga lalaki ni Heman, si Jehuel ug si Simei; ug sa mga anak nga lalaki ni Jedutun, si Semaias ug si Uziel. 15Ilang gitigom ang ilang mga kaigsoonan ug gibalaan ang ilang kaugalingon ug sila nanulod sumala sa gisugo sa hari pinaagi sa mga pulong sa Ginoo, aron sa paghinlo sa balay sa Ginoo. 16Ang mga pari misulod ngadto sa kinasulorang dapit sa balay sa Ginoo aron sa paghinlo niini, ug gidala nila sa gawas ang tanang mga kahugawan nga ilang nakita didto sa Templo sa Ginoo, ngadto sa hawanan sa balay sa Ginoo. Ug gikuha kini sa mga Levihanon ug gidala ngadto sa sapa sa Kidron. 17Nagsugod sila sa pagbalaan sa unang adlaw sa unang bulan, ug sa ikawalo nga adlaw sa bulan miadto sila sa agianan sa Ginoo. Unya gibalaan nila ang balay sa Ginoo sulod sa walo ka adlaw, ug sa ikanapulo ug unom nga adlaw sa unang bulan ila kining natapos. 18Unya miadto sila kang Hesekias nga hari ug miingon, “Among gihinloan ang tibuok balay sa Ginoo, ang halaran sa halad nga sunogon uban ang tanang mga kagamitan niini ug ang lamesa alang sa pan nga gihalad ug ang tanang mga kagamitan niini. 19Ang tanang mga kagamitan nga gisalikway ni Hari Ahas sa iyang paghari sa dihang siya wala magmatinumanon, among giandam ug gibalaan, ug tan-awa, anaa kini sa atubangan sa halaran sa Ginoo.”
Gihalad Pag-usab ang Templo
20Unya si Hesekias nga hari mibangon pagsayo ug gitigom ang mga pangulo sa siyudad ug mitungas ngadto sa balay sa Ginoo. 21Sila nagdala ug pito ka torong baka, ug pito ka laking karnero, pito ka nating karnero ug pito ka laking kanding alang sa halad sa sala alang sa gingharian ug sa balaang dapit ug alang sa Juda. Ug iyang gisugo ang mga pari nga mga anak ni Aaron sa paghalad niini ibabaw sa halaran sa Ginoo. 22Busa ilang gipatay ang mga torong baka ug gidawat sa mga pari ang dugo ug gisablig kini ibabaw sa halaran; ilang gipatay ang mga laking karnero ug gisablig ang dugo sa ibabaw sa halaran. Ila usab nga gipatay ang mga nating karnero ug gisablig ang dugo ibabaw sa halaran. 23Unya gidala nila ang mga laking kanding nga halad alang sa sala ngadto sa hari ug sa katilingban ug ilang gibutang ang ilang mga kamot sa ibabaw niini. 24Ug gipatay kini sa mga pari, ug naghimo sila ug usa ka halad alang sa sala pinaagi sa dugo niini ibabaw sa halaran, alang sa kapasayloan sa tibuok Israel. Kay ang hari nagsugo nga ang halad nga sunogon ug ang halad alang sa sala himoon alang sa tibuok Israel.
25Iyang gipahimutang ang mga Levihanon diha sa balay sa Ginoo uban sa mga piyangpiyang, mga alpa, ug mga lira sumala sa sugo ni David ug ni Gad nga propeta sa hari ug ni Natan nga propeta, kay ang sugo gikan sa Ginoo pinaagi sa iyang mga propeta. 26Ang mga Levihanon nagtindog uban sa mga tulunggon ni David ug ang mga pari uban sa mga trumpeta. 27Unya si Hesekias nagsugo sa paghalad sa halad nga sunogon ibabaw sa halaran. Ug sa nasugdan na ang halad nga sunogon, ang awit alang sa Ginoo gisugdan usab ug ang mga trumpeta, dinuyogan sa mga tulunggon ni David nga hari sa Israel. 28Ang tibuok katilingban misimba ug ang mga mag-aawit nag-awit ug ang mga tigpatingog sa trumpeta nagpatingog; kining tanan nagpadayon hangtod nga natapos ang halad nga gisunog. 29Sa natapos na ang paghalad, ang hari ug ang tanan nga diha uban kaniya, miyukbo ug misimba. 30Unya si Hesekias nga hari ug ang mga pangulo misugo sa mga Levihanon sa pag-awit ug pagdayeg alang sa Ginoo uban sa mga pulong ni David ug ni Asaf nga propeta. Ug sila nag-awit sa mga pagdayeg uban sa kalipay ug miyukbo sila ug misimba.
31Unya si Hesekias miingon, “Karon kamo naghalad sa inyong kaugalingon alang sa Ginoo; duol kamo, ug pagdala ug mga halad ug mga halad sa pagpasalamat ngadto sa balay sa Ginoo.” Ug ang katilingban nagdala ug mga halad nga inihaw ug mga halad sa pagpasalamat ug ang tanan nga mahinatagon ug kasingkasing nagdala ug mga halad nga sunogon. 32Ang gidaghanon sa mga halad nga sunogon nga gidala sa katilingban 70 ka torong baka, usa ka gatos ka laking karnero ug duha ka gatos ka nating karnero, kining tanan alang sa usa ka halad nga sunogon alang sa Ginoo. 33Ang mga hinalad unom ka gatos ka baka ug tulo ka libo ka karnero. 34Apan diyotay ra kaayo ang mga pari ug wala makapanit sa tanang mga halad nga sunogon, busa hangtod nga ang ubang mga pari makabalaan sa ilang kaugalingon, ang ilang kaigsoonan nga mga Levihanon mitabang kanila hangtod nga natapos ang buluhaton, kay ang mga Levihanon labaw pang matarong sa kasingkasing sa pagbalaan sa ilang kaugalingon kay sa mga pari. 35Gawas pa sa daghang mga halad nga gisunog, anaa ang tambok sa mga halad sa pakigdait ug dihay mga halad nga ilimnon alang sa halad nga sunogon. Busa ang pagpangalagad sa balay sa Ginoo nahibalik. 36Ug si Hezekias ug ang tanang katawhan nalipay tungod sa gibuhat sa Dios alang sa katawhan kay ang maong butang nahitabo nga dali kaayo.
Currently Selected:
2 MGA CRONICAS 29: ABCEB
Highlight
Share
Copy
Want to have your highlights saved across all your devices? Sign up or sign in
©Philippine Bible Society, 2011