1 MGA TAGA-TESALONICA 4
4
Kinabuhi nga Nagpahimuot sa Dios
1Sa kataposan, mga igsoon, kami naghangyo ug nagdasig kaninyo diha sa Ginoong Jesus, sama nga kamo nakakat-on man gikan kanamo unsaon sa pagkinabuhi ug sa pagpahimuot sa Dios, sumala sa inyo nang gibuhat karon, nga unta molabaw pa gayod ang inyong pagbuhat niini. 2Kay kamo nahibalo na unsa ang mga pahimangno nga among gihatag kaninyo pinaagi sa Ginoong Jesus. 3Kay mao kini ang kabubut-on sa Dios, ang inyong pagkabalaan: nga kamo maglikay sa salawayong pakighilawas, 4nga ang matag usa kaninyo mahibalo unsaon sa pagpangasawa#4:4 pagpangasawa: o pagpugong sa iyang kaugalingong lawas. diha sa pagkabalaan ug kadungganan, 5dili diha sa tinguha sa kaulag sama sa mga Gentil nga wala makaila sa Dios, 6nga walay bisan kinsa nga maglapas ug mamintaha sa iyang igsoon sa bisan unsang butang. Kay ang Ginoo mao ang tigpanimalos mahitungod niining tanan sumala sa among hugot nga gipasidaan ug gipamatud-an kaninyo. 7Kay ang Dios wala magtawag kanato alang sa kahugawan, kondili sa pagkabalaan. 8Busa bisan kinsa nga mosalikway niini, wala magsalikway sa tawo kondili sa Dios nga naghatag usab sa iyang Espiritu Santo nganha kaninyo.
9Apan mahitungod sa gugma nga inigsoon, kamo dili na kinahanglan nga sulatan pa, kay kamo natudloan na man sa Dios sa paghigugma sa usa ug usa 10ug gihimo gayod ninyo kini ngadto sa tanang kaigsoonan sa tibuok Macedonia. Apan kami nagdasig kaninyo, mga igsoon, sa pagpalabaw pa gayod, 11sa pagtinguha sa pagpuyo nga malinawon, sa pagbuhat sa inyong kaugalingong mga buluhaton ug sa pagbudlay ginamit ang inyong mga kamot, sumala sa among pahimangno kaninyo, 12aron kamo magkinabuhi nga takos ngadto sa mga tagagawas, aron wala kamoy panginahanglan.
Ang Pagbalik sa Ginoo
13Apan dili kami buot, mga igsoon, nga kamo dili mahibalo mahitungod sa mga nangamatay,#4:13 nangamatay: Sa Grego, nahikatulog. aron dili kamo magsubo ingon sa uban nga walay paglaom. 14Kay kon kita nagtuo nga si Cristo namatay ug nabanhaw, mao usab sila nga mga nangamatay,#4:14 nangamatay: Sa Grego, nahikatulog. dad-on ra unya sa Dios pinaagi kang Jesus uban kaniya. 15#1 Cor. 15:51-52. Kay kini among ipahayag kaninyo sumala sa pulong sa Ginoo, nga kitang mga buhi nga nagpabilin pa hangtod sa pag-abot sa Ginoo, dili mag-una kanila nga mga nangamatay.#4:15 nangamatay: Sa Grego, nahikatulog. 16Kay ang Ginoo gayod mao ang manaog gikan sa langit uban sa pagmando, ug uban sa tingog sa pangulong anghel, ug uban sa tingog sa trumpeta sa Dios. Ug unya ang mga nangamatay diha kang Cristo mouna sa pagpamangon. 17Ug kita nga mga buhi pa nga nahibilin, sakgawon unya ngadto sa mga panganod uban kanila sa pagsugat sa Ginoo diha sa kahanginan. Ug sa ingon niini kita makig-uban na kanunay sa Ginoo. 18Busa lipaya ninyo ang usa ug usa pinaagi niining mga pulonga.
Currently Selected:
1 MGA TAGA-TESALONICA 4: ABCEB
Highlight
Share
Copy
Want to have your highlights saved across all your devices? Sign up or sign in
©Philippine Bible Society, 2011
