1 MGA HARI 17
17
Gitagna ni Elias ang Umaabot nga Hulaw
1 #
San. 5:17. Unya si Elias, ang Tisbihanon, sa Tisbe#17:1 sa Tisbe: Sa Hebreo, uban sa mga nagpuyo. sa Gilead miingon kang Ahab, “Ingon nga buhi ang Ginoo, ang Dios sa Israel, nga sa atubangan ako nagtindog, walay yamog o ulan niining mga tuiga, gawas kon akong ipamulong.” 2Ug ang pulong sa Ginoo, miabot kaniya, nga nag-ingon, 3“Biya dinhi ug lakaw ngadto sa silangan ug tago sa sapa sa Kerit, sa silangan sa Jordan. 4Ug adto ikaw moinom sa sapa, ug ako nagsugo sa mga uwak sa pagpakaon kanimo didto.” 5Busa miadto siya ug naghimo sumala sa pulong sa Ginoo. Miadto siya ug mipuyo duol sa sapa sa Kerit sa silangan sa Jordan. 6Ug ang mga uwak nagdala kaniya ug pan ug karne sa buntag ug hapon ug didto siya miinom sa sapa. 7Apan sa wala madugay, ang sapa nahubsan tungod kay walay ulan sa yuta.
Si Elias ug ang Biyuda sa Zarefat
8Ug ang pulong sa Ginoo, midangat kaniya, 9#Luc. 4:25-26. “Tindog ug lakaw ngadto Zarefat nga sakop sa Sidon ug puyo didto. Ako nagsugo ug usa ka biyuda didto sa pagpakaon kanimo.” 10Busa siya mitindog ug miadto sa Zarefat ug sa pag-abot niya sa ganghaan sa siyudad, dihay usa ka biyuda nga nangahoy ug gitawag niya siya ug giingnan, “Dad-i ako ug diyotay nga tubig sa usa ka sudlanan aron akong imnon.” 11Samtang nagpadulong siya aron sa pagdala niini, gitawag niya siya ug miingon, “Dad-i ako ug usa ka buok pan diha sa imong kamot.” 12Ug siya miingon, “Ingon nga ang Ginoo nga imong Dios buhi, wala akoy naluto. Usa na lang ka kumkom nga harina ang anaa sa tadyaw ug diyotayng lana nga anaa sa tibodtibod. Nangahoy ako aron mouli ug lutoon kini alang kanako ug sa akong anak nga lalaki, aron kan-on namo kini ug mangamatay.” 13Ug si Elias miingon kaniya, “Ayaw kahadlok, lakaw ug buhata ang ingon sa imong gisulti apan buhati una ako ug gamay nga torta ug dad-a nganhi kanako ug pagkahuman paghimo ug alang kanimo ug alang sa imong anak. 14Kay kini mao ang gipamulong sa Ginoo, ang Dios sa Israel, ‘Ang tadyaw sa harina dili mahutdan ug ang tibodtibod sa lana dili mahubsan hangtod sa adlaw nga ang Ginoo magpaulan ibabaw sa yuta.’ ” 15Busa siya milakaw ug gihimo niya ang giingon ni Elias, ug ang biyuda ug siya ug ang tibuok panimalay nangaon sulod sa daghang mga adlaw. 16Ang tadyaw sa harina wala mahutdi o mahubsan ang tibodtibod sa lana, sumala sa pulong sa Ginoo nga iyang gisulti pinaagi kang Elias.
17Human niini, ang anak nga lalaki sa babaye, ang tagbalay, nasakit ug ang iyang sakit grabi kaayo, nga walay gininhawa nga nahibilin kaniya. 18Ug siya miingon kang Elias, “Unsa may inyong nasuk-an kanako, O tawo sa Dios? Mianhi ikaw aron sa pagpahinumdom kanako sa akong sala ug sa pagpatay sa akong anak!” 19Ug siya miingon kaniya, “Ihatag kanako ang imong anak.” Ug gikuha niya kini gikan sa iyang mga bukton ug gidala siya ngadto sa lawak sa itaas, diin siya magpuyo ug gipahigda kini sa iyang kaugalingong higdaanan. 20Ug siya mituaw sa Ginoo, “O Ginoo nga akong Dios, gidad-an mo ba ug katalagman bisan ang biyuda nga akong giabotan pinaagi sa pagpatay sa iyang anak nga lalaki?” 21#2 Hari 4:34-35. Ug gihap-an niya ang bata sa makatulo, ug mituaw sa Ginoo, “O Ginoo, nga akong Dios, himoa nga ang kalag niining bataa mobalik ngadto kaniya.” 22Ug ang Ginoo namati sa tingog ni Elias ug ang kalag sa bata mibalik kaniya ug siya nabuhi. 23Ug gikuha ni Elias ang bata, ug gidala siya sa silong gikan sa lawak sa itaas ngadto sa balay, ug gihatag siya ngadto sa iyang inahan. Ug si Elias miingon, “Tan-awa, ang imong anak nabuhi.” 24Ug ang babaye miingon kang Elias, “Karon ako nahibalo nga ikaw usa ka tawo sa Dios ug ang pulong sa Ginoo, diha sa imong baba matuod.”
Currently Selected:
1 MGA HARI 17: ABCEB
Highlight
Share
Copy
Want to have your highlights saved across all your devices? Sign up or sign in
©Philippine Bible Society, 2011
