Luka 24
24
Cerino pa Yesu
(Mat 28:1-10; Mar 16:1-8; Yoh 20:1-10)
1Odikin maŋic i ndelo ma cako tic, mon no jokidho i kaliel munyo jotiŋo gigipiny maŋwe kur ma joyiko no. 2Jonwaŋo tele m'oyido oum gine dhok kaliel oŋil woko, 3to jodonj'iye; to jok'onwaŋo delkwoŋ Yesu. 4Munyo fodi jocungo kenyo gi dhier kwoŋ gim'otimere, gikenyo no won cwo ario ma jorukere i nangin ma minyin jocungo kabuti jo. 5Mon no joriewere piny, munyo lworo omako jo, aka cwo no jopenjo rijo ni, “Raŋo ma wirango ŋata kwo kwoŋ jom'otho? 6Go ongoye ka; otieko cerino. Poyi win gima go owaco riwin munyo fodi nitie gi win i Galili ni 7ibino ketho Wod Dhano i cingi ji mareco, jowoguri go kwoŋ musalaba to icerino go i ndelo mar'adek.” 8Mon no jopoyo wac pere no, 9jodwoko wok i kaliel, to jowaco gigipiny me je ri jofonjirok apar g'acel kodi joman je. 10Mon no oyido obedo Maria Magadalina, Yoana kodi Maria min Yakobo; jono, kodi mon man ma jobedo bothi jo, jotero wac me ri jomoor. 11To jomoor joparo ni gima mon no jowaco oyido sisiri, to jokwero yeyo wac no. 12Petero oay oringo yu kaliel; oluŋere to neno nangin ma kaliel kende m'ongoye gimoro man. Gikenyo go odok peco munyo dhier kwoŋ gim'otimere.
Woth ma kidho yu loka ma Emao
(Mar 16:12-13)
13I ndelo no won, jario kwoŋ jofonjirok pere oyido jokidho yu loka m'ilwoŋo ni Emao, cegin ma yiro abirio wok Yerusalem, 14aka onwaŋo joluwo kwoŋ gigipiny je m'otimere. 15Munyo fodi joluwo aka jopiemo, Yesu won gipi ocore cegin to wotho gi jo. 16Joneno go, to jok'onyalo ŋeyo go. 17Yesu openjo jo ni, “Wiliesa malomalo kwoŋ aŋo me?” To jocungo ma joliŋaliŋa munyo jonigi rem madit. 18Gikenyo ŋat'acel kwoŋ jo, ma nyinge Kilopas, openjo go ni, “Iŋat'ibedo wendo i Yerusalem ka m'ikuya gim'otieko timirok i ndelo manok me?” 19Go openjo jo ni, “Gigipiny aŋo?” Jodwoko ni, “Gim'otimere kwoŋ Yesu Janazareth. Ŋati me oyido jatuci wac Were, aka Were kodi ji je jotero go paka ŋata nigi meni i wac kodi i tim. 20To jotel mawan mapa jocway ri Were i wi migam kodi rwodhe, jotero go ni wothum rigo banja ma tho, to joguro go kwoŋ musalaba. 21Aka onwaŋo wageno nike go ama bino botho Isiraili! Medo kwoŋ meno je, konon ndelo mar'adek cuka gino timere. 22Aka mon moro ma kweth mawan jomiyo wan dhier madwoŋ. Nende jokidho i kaliel odikin worwor, 23to jok'onwaŋo delkwoŋe. Jodwoko munyo jowaco ni jomalaika moro jomenyere rijo ma jowaco nike go kwo. 24Jowoti wan megi bende jokidho i kaliel aka jonwaŋo ni obedo adieri paka mon no jowaco rijo won, to jok'oneno rigin go won.”
25Gikenyo Yesu owaco rijo ni, “A ji mamiŋ, aka wiboli i yeyo g'icuny win gimoro je ma jotuci wac Were jowaco! 26Wiparo ni onwaŋo kiripi ni Kristo wokutho wocandere i yo no aka nyaka wodonji i dwoŋ pere?” 27Yesu otito rijo gima Ndiko Maleŋ oluwo kwoŋe cako kwoŋ kitawin pa Musa tundo i ndiko pa jotuci wac Were je.
28Gikenyo munyo jotundo cegin gi loka m'onwaŋo jokidh'iye, Yesu otimo pa ŋata fodi medere gi woth pere; 29to jojuko go munyo jowaco ni, “Rwayi gi wan; kole piny oyutho aka onyo lokere macol.” Riameno Yesu odonjo to bedo gi jo. 30Munyo obedo dhower gi jo, okwanyo mugat to miyo silwany; gikenyo to turo mugat no to miyo jo. 31Gikenyo waŋ jo oyawere to nyaka joŋeyo go; to go leny woko i waŋ jo ni many. 32To wegi jocako penjirok ni, “Onwaŋo kicale pa cuny wan waŋ munyo go luwo gi wan i royo aka tito riwan Ndiko Maleŋ?”
33Joay mayot to jogik Yerusalem, kama jonwaŋ'iye jofonjirok apar g'acel jocokere kanyacel kodi joman 34aka onwaŋo jowaco ni, “Rwoth bende ocerino won, aka Simon otieko neno go!” 35Gikenyo jario no bende jotito rijo gim'otimere i royo, kodi paka joniaŋ kwoŋ Rwoth munyo oturo mugat.
Yesu menyere ri jofonjirok pere
(Mat 28:16-20; Mar 16:14-18; Yoh 20:19-23; Tim 1:6-8)
36Munyo fodi jowaco rijo gime, jopoyo ka Rwoth won gipi ocungo i dier jo to waco rijo ni, “Siem wobedi gi win.” 37Lworo opoŋ kwoŋ jo gi bwok, rupiri oyido joparo nike onwaŋo joneno tipo dhano moro. 38To go owaco rijo ni, “Raŋo ma wibwok aka kiganagana bino i paro mewin? 39Neni win cingan kodi tiendan kole me an won. Mulan win, aka wibino neno, kole yamo ongoye gi riŋo gi cokin, paka wineno an gine.” 40Owaco gime to nyutho jo cinge gi tiende. 41Munyo fodi jok'onyalo yeyo ro kisangala kodi dhier m'oyido oasere rijo; go openjo jo ni, “Winitie gi gir'acama moro ka?” 42Jomiyo go rec m'otedi, 43ma go ojolo to camo ruwaŋ jo.
44Gikenyo owaco rijo ni, “Me gigipiny ma yado amaro waco riwin munyo fodi anitie gi win, ni gimoro je m'ondiki kwoŋan i Cik pa Musa, i ndiko pa jotuci wac Were, kodi i Zabuli onwaŋo ripo timirok.” 45Aka oyawo paro pajo ma niaŋ kwoŋ Ndiko Maleŋ, 46to waco rijo ni, “Me a gim'ondiki ni Kristo ripo kutho candirok t'icerino go kwoŋ jom'otho i ceŋ mar'adek, 47aka mikwenda ma ŋuto kodi ma cwako reco wotiti ri nonin je, cako Yerusalem. 48Wibedo jokony i gigipiny me. 49#Tim 1:4Aka abino dhiro riwin gima Baba ociko; to wiripo kuro i tindi cuka meni ma wok i polo olori riwin.”
Itero Yesu i polo
(Mar 16:19-20; Tim 1:9-11)
50 #
Tim 1:9-11
Gikenyo okwanyo jo to tero jo yu Bethania kama go oriey'iye cinge to miyo jo silwany. 51Munyo go miyo jo silwany, oeye bongi jo t'itero go i polo. 52Jolamo Yesu to jogik Yerusalem ma kisangala opoŋ i cuny jo. 53To jocowo hongo pajo je i Ot pa Were munyo jopako Were.
Currently Selected:
Luka 24: DHOPE
Highlight
Share
Copy
Want to have your highlights saved across all your devices? Sign up or sign in
Dhopadhola DC Bible © Bible Society of Uganda, 2018.