Yohana 6
6
Yesu pidho ji gana abic
(Mat 14:13-21; Mar 6:30-44; Luk 9:10-17)
1Rumacen, Yesu ogik to cewere i wakawaka ma Galili (kosa ma Tiberia). 2Lwak ji madwoŋ oluwo go, rupiri oyido joneno ranyuth m'otimo kwoŋ botho jotwo. 3Yesu oidho tendere, to bedo piny gi jofonjirok pere. 4Ndelo pa Joyuda madwoŋ ma kalima ma Kadho, onwaŋo orikere. 5Munyo Yesu oŋiyo kor gi korin to neno ni lwak ji madwoŋ onwaŋo bino bonge, openjo Filipo ni, “Wanyalo nyewo kune cemo manyalo pidho ji me je?” 6(Openjo ama nyaka ma temo Filipo, rupiri go won oyido otieko ŋeyo gima go kidho timo.) 7Filipo odwoko ni, “Kada pesa ma romo misara ma dwe aucel je kinyal nyewo mugat ma romo dhano je bilo ye kad'abila won.” 8Jafonjirok pere man, Andereya, omin Simon Petero owaco ni, 9“Jayac moro ee ka man gi mugat abic ma bel kodi rec ario. To me bende dikony aŋo ri lwak ji me je?” 10Yesu owaco rijo ni, “Waci ri ji jowobedi piny.” (Lum oyido omore kenyo.) Ameno ji je jobedo piny. Oyido cwo romo cegin gana abic. 11Gikenyo Yesu okwanyo mugat, oketho Were walwa, to poko ji m'onwaŋo jobedo piny. Apaka bende otimo gi rec, aka ji je jolimo paka joyenyo. 12Munyo ji je joyeŋ, go owaco ri jofonjirok pere ni, “Coki win ŋinjeŋinje m'odoŋ; wakiri wawey gimoro wonyekere kada mathin.” 13Gikenyo jocoko gimoro je, to jopoŋo aditin apar g'ario ma mugat ma bel ma jom'ocemo joweyo.
14Munyo ji joneno gir'aura ma Yesu otimo, jowaco ni, “Adieri me obedo jatuci wac Were m'oyido ripo bino i piny!” 15Munyo Yesu oŋeyo nike oyido jomito bino loko go kere gi mbaka, go oeye kenyo to kidho pondo wi got kakende.
Yesu wotho wi pi
(Mat 14:22-33; Mar 6:45-52)
16Munyo piny oyutho, jofonjirok pere joloro yu wakawaka to 17jodonjo i ye, to jocewere jogik yu Kapernaum. Piny oyutho kiri mafodi Yesu k'odwoko bongi jo. 18I hongo no asur madwoŋ oyido kudho aka miyo pi ule marac. 19Jofonjirok oyido jotieko cewirok ma romo mayiro adek kosa aŋwen to joneno Yesu munyo wotho wi pi kareno bino cegin gi ye; to lworo mako jo. 20To Yesu waco rijo ni, “Wikiri wilwor, kole me an.” 21Gikenyo to jorwako go i ye gi kisangala, to piyo piyo no jotundo kam'othwo kam'onwaŋo jokidh'iye.
Ji jorango Yesu
22Yawere mere lwak ji m'onwaŋo odoŋ loka wakawaka ma koca joniaŋ nike ye acel kende am'onwaŋo odoŋ kenyo. Aka oyido bende joŋeyo nike Yesu k'odonjo i ye kodi jofonjirok pere, to jokadho kendi gin. 23Onyo ye moro m'owok Tiberia, jotundo thengi pi cegin kodi kama lwak ji ceŋino jocam'iye mugat, munyo Rwoth otieko miyo silwany. 24Munyo lwak ji no joneno ni Yesu ongoye kenyo kodi jofonjirok pere, jodonjo i ye no to jokidho yu Kapernaum rango go.
Yesu obedo mugat ma kelo kwo
25Munyo ji jonwaŋo Yesu yu loka, jowaco rigo ni, “Jafonji, ibino ka i hongo mene?” 26Yesu odwoko ni, “Adieri awaco riwin, wirangan rupiri ceŋino wicamo mugat wiyeŋ wijoje, to makiweno ni wineno ranyuth ma gir'aura. 27Wikiri witiy ri cemo ma nyekere piyo; to tiyi win ri cemo ma yindira to kelo kwo makirum. Me a cemo ma Wod Dhano bino miyo win, rupiri Were Baba won otieko ketho kwoŋ go ranyuth ma ridho wac no.” 28Gikenyo jopenjo go ni, “Watim aŋo ŋey watim tic pa Were?” 29Yesu odwoko ni, “Me a tic ma Were mito ni witim: Yey win ŋata go ooro.” 30Jodwoko ni, “Ranyuth aŋo ma gir'aura ma inotimi aka nyaka wanyal neno to wayeyin? Aŋo m'ilatimo ye won? 31#Wok 16:4,15; Zab 78:24Kwarere mawan cango jocamo mana i thim paka ndiko waco ni, ‘Omiyo jo mugat ma wok i polo acama.’ ” 32Yesu owaco rijo ni, “Adieri awaco riwin, Musa ama k'omiyo win mugat ma wok i polo. To Baba won ama miyo win mugat mar'adieri ma wok i polo. 33Rupiri mugat ma Were miyo obedo ŋata loro piny wok i polo aka miyo piny kwo.” 34Gikenyo jokwayo go ni, “Jadwoŋ, onyo miy wan mugat no wok konon.” 35Yesu owaco rijo ni, “Abedo mugat ma kelo kwo. Ŋata bino bongan kilawinjo kec, aka ŋata yeyan kilawinjo riyo.”
36“Aka atieko kiri waco riwin ni witieko nenan, to je fodi wikiyeyan. 37Moro je ma Baba miyan bino bongan. Ak'oriem woko nyatoro je m'obin bongan. 38Kole abino i piny wok i polo timo gima ŋat'ooran yenyo, makiweno gim'awon ayenyo. 39Me a gima ŋat'ooran yenyo ni atim: Nike ji je ma go omiyan kiri joworweny kad'acel, to nike acerino jo i kwo i ndelo ma rumacen. 40Ato me obedo mito pa Baba, nike nyatoro je m'onen Wode to yeyo go wobedi gi kwo makirum; aka abino cerino go i ndelo ma rumacen.”
41Joyuda jocako kiŋunyaŋunya kwoŋ go rupiri owaco ni, “Abedo mugat ma wok i polo.” 42Gikenyo jowaco ni, “Me won ki Yesu wod pa Yozefu, aka waŋeyo kiri bamere gi min? To raŋo ma go pama kethere waco ni oloro piny wok i polo?” 43Yesu odwoko ni, “Weyi win kiŋunyaŋunya wiwegi kendi win. 44Ongoye ŋata nyalo bino bongan kwanyo woko ka Baba m'ooran oywayo go bongan; aka abino cerino go i ndelo ma rumacen. 45#Isa 54:13Kole ondiki i kitawo pa jotuci wac Were ni, ‘Were bino fonjo ji je.’ Moro je ma winjo Baba aka fonjere bonge bino bongan. 46Me kinyuthi ni nitie moro m'otieko neno Baba, kwanyo woko ŋat'owok bongi Were kende ama otieko neno go.”
47“Adieri awaco riwin, ŋata yeyo je nitie gi kwo makirum. 48Abedo mugat ma kelo kwo. 49Kole kwarere mewin jocamo mana i thim, to jotho. 50To ee mugat ma wok i polo ma ka nyatoro ocamo kilatho. 51Abedo mugat ma kelo kwo m'obino i piny wok i polo. Ŋat'ocam mugat me bino kwo cil gi cil. Aka mugat m'abino miyo win meno a delkwoŋan, m'abino miyo aka nyaka piny wolimi kwo.”
52Gime oero piem ri Joyuda wegi kendi gin. Jopenjo ni, “Ŋatin nyalo nedi miyo wan delkwoŋe ni wacam?” 53Yesu owaco rijo ni, “Adieri awaco riwin ni ka wikicamo delkwoŋ Wod Dhano to wimadho remo pere wik'obedi gi kwo i win. 54Ŋata camo delkwoŋan aka madho remo paran nitie gi kwo makirum, aka abino cerino go i ndelo ma rumacen. 55Kole delkwoŋan meno cemo adieri aka remo paran bende gir'amadha adieri. 56Ŋata camo delkwoŋan aka madho remo paran bedo i an aka abedo i go. 57Baba makwo ooran, aka akwo kwoŋbedo go. Meno bende apaka ŋata caman bino limo kwo wok kwoŋan. 58Am'omiyo me obedo mugat m'obino wok i polo; kicale kodi mugat ma kwarere win jocamo to jotho. Ŋata camo mugat me bino kwo cil gi cil.” 59Yesu owaco gime munyo fonjo i kitipa pa jom'oyeyo pa Joyuda ma Kapernaum.
Wac ma kwo makirum
60Jofonjirok pere mathoth jowinjo gime to jowaco ni, “Kole Fonji me tek swa. Onyo ŋata nyalo yeyo?” 61Munyo, Yesu oŋeyo ni jofonjirok pere oyido joŋunyaŋunya kwoŋ gime, openjo jo ni, “Gime ŋedho cuny win? 62To kosa bedi winen Wod Dhano munyo gik malo kama yado go oyido nitie iye con! 63Cuny pa Were ama miyo go kwo; delkwoŋe won bukony. Wac m'atieko waco obedo cuny kodi kwo. 64Ama je nyaka joman kwoŋ win jokiyey.” (Ato Yesu oyido oŋeyo wok i cakirok joma jok'oyeyo kwoŋ go kodi ŋata d'ocamo rigo sereko.) 65Aka omedo waco ni, “Me am'omiyo awaco riwin nike ongoye ŋata nyalo bino bongan kwanyo woko ka Baba am'omiyo go onyalo timo ameno.”
66Wok i hongo me, jomathoth m'oyido joluwo go jowire to joweyo ameno luwo go. 67Ameno Yesu openjo japar g'ario ni, “To win, wibende wimito weyan?” 68#Mat 16:16; Mar 8:29; Luk 9:20Simon Petero odwoko go ni, “Rwoth, onyo wanokidhi riwan bongi ŋa man? Kole iŋat'initie ye gi wac ma kwo makirum. 69Aka onyo wayeyo odoko waŋeyo nike in ibedo Maleŋ m'owok bongi Were.” 70Yesu odwoko ni, “Akiyero win apar g'ario? To ŋat'acel kwoŋ win obedo jwogi!” 71Go oyido luwo kwoŋ Yuda, wod pa Simon Iskariot. Rupiri Yuda, kad'onwaŋo obedo acel kwoŋ japar g'ario, go am'oyido kidho camo ri Yesu sereko.
Currently Selected:
Yohana 6: DHOPE
Highlight
Share
Copy
Want to have your highlights saved across all your devices? Sign up or sign in
Dhopadhola DC Bible © Bible Society of Uganda, 2018.