Cakirok 18
18
Were ciko Abraham wode
1Rwoth omenyere ri Abraham kama go oyido obed'iye i tiendi olwa pa Mamire. Abraham oyido obedo i dhiot ma wema pere i lietho ma ndelo. 2#Ebu 13:2Otiŋo waŋe malo aka oneno cwo adek jocungo i nyime. Tekin go neno jo, oringo wok i dhiot ma wema kidho jolo jo, aka obwonere to kule piny 3to waco ni, “Rwoth paran, k'inen anwaŋo wor ruwaŋin, ikir'ikali ŋeca perin. 4Weyi wokel nyaka pi mathi ilwoki tiendin, aka iywomere i tiendi yath me, 5k'aomo ye cemo moro, ŋey wodwoki rin meni aka nyaka imedere gi woth perin paka itieko bino bongi ŋeca perin.”
Jodwoko ni, “Tim paka iwaco.”
6Abraham oredo i wema aka owaco ri Sara ni, “Kwany piyo kutiya ma moko perin maber, aka itedi mugat.” 7Aka Abraham doko oyombere i kigo dhok pere, okwanyo rwath macwe, aka omiyo ŋeca pere m'oredo yiko. 8Kenyo go okwanyo mo dhiaŋ, cak, gi rwath m'oyido oyiki, aka oketho ruwaŋ jo; aka go ocungo cegin gi jo munyo jocemo.
9Kenyo jopenjo go ni, “Nikune dhako perin Sara?”
Abraham odwoko ni, “Go nitie i wema.”
10 #
Rom 9:9
Kenyo Rwoth owaco ni, “Abino dwoko bongin i oro ma bino i hongo paka ama, kareno Sara dhako perin nitie gi nyathi majayac.”
Sara oyido winjo i dhiot wema yuŋey go 11Onyo Abraham gi Sara oyido jotieko ti, aka Sara oyido otieko weyo neno dwe. 12Ameno Sara onyero ka waco ama: Pama atieko ti, aka cworan bende oti, fodi bende anyalo winjo cwe ma bedo gi cworan!
13Kenyo Rwoth openjo Abraham ni, “Raŋo Sara onyero to waco ni, ‘Bende anonywol nyathi majayac!’ 14#Luk 1:37Nitie gimatek ri Rwoth? I hongo m'oyerere abino dwoko bongin i oro ma bino, aka Sara bino bedo gi nyathi majayac.”
15To rupiri Sara oyido lworo omako, okwedere ka waco ni, “Akinyero.”
Rwoth odwoko ni, “Be, inyero.”
Abraham ywak gi Rwoth ni wobothi Sodom
16Kenyo cwo no joay, aka joŋiyo yu Sodom, to Abraham bende kadho gi jo kwaŋo jo i yo pajo. 17To Rwoth waco ni, “Akibino kano kwoŋ Abraham gim'acegin timo, 18rupiri aneno ni go bino lokirok nono madwoŋ aka manitie meni, aka nonin je ma piny jobino limo silwany luwo i go. 19Atieko yero go ni wogwok nyithindho pere gi nyikwaye luwo yo pa Rwoth ka jotimo tiro, ŋey Rwoth wokel rigo gim'otieko ciko.”
20Kenyo Rwoth owaco ri Abraham ni, “Rupiri iasa ywak gi Sodom kodi Gomora, aka reco pajo dwoŋ, 21abino loro neno k'inen jotimo paka iywaki gi jo; aka ka be, abino ŋeyo.”
22Kenyo cwo ario jowire wok kenyo, aka jokidho yu Sodom; to Abraham medere cungo ruwaŋ Rwoth 23Kenyo Abraham ocore cegin to penjo Rwoth ni, “Inorey adieri jom'otire kanyacel gi jokidakana? 24To k'obedi ji piero abic ma jotire i tindi madwoŋ, inorey tindi madwoŋ gibe? Ik'owey tindi madwoŋ ro ji piero abic ma jotire ma jonitie i iye? 25Wobedi bor kodin timo nger gino, neko jom'otire kanyacel gi jokidakana, aka jom'otire jolimi gir'acula kanyacel gi jokidakana! Gino wobedi bor kodin! Jathum banja ma piny gibe k'otimi gim'otire!”
26To Rwoth waco ni, “K'anonwaŋ ji piero abic ma jotire i Sodom, akibino reyo woko tindi madwoŋ gibe ro jo.”
27Abraham odwoko ni, “Mondo cwaki ran ro miseni paran medo luwo kodin Rwoth, an ma bedo fukefuke gi buru. 28To poyo kwoŋ ji piero abic ma jotire no, orem ji abic, inorey woko tindi madwoŋ gibe ro ji abic ma jongoye no?”
Rwoth odwoko ni, “Akibino reyo woko k'anonwaŋ ji piero aŋwen g'abic ma jotire.”
29Doko Abraham oluwo gi Rwoth to waco ni, “To k'inonwaŋ ji piero aŋwen ma jotire kenyo?”
To Rwoth dwoko ni, “Ro ji piero aŋwen no, akibino timo.”
30Kenyo Abraham owaco ni, “Weyi Rwoth wokiri womaki kodan nge, t'alaluwo. To k'inonwaŋ ji piero adek ma jotire kenyo?”
Rwoth odwoko ni, “Akibino timo k'anonwaŋ ji piero adek.”
31Abraham owaco ni, “Mondo cwaki ran ro miseni paran ma medo luwo kodin Rwoth. To k'inonwaŋ ji piero ario kenyo?”
Rwoth odwoko ni, “Ro ji piero ario no, akibino reyo woko Sodom.”
32Kenyo Abraham owaco ni, “Weyi Rwoth wokiri womaki nge, t'alaluwo doko macowe. To k'inonwaŋ ji apar kenyo?”
Rwoth odwoko ni, “Ro ji apar no akibino reyo woko.” 33Munyo Rwoth otieko luwo gi Abraham, to kadho rigo, to Abraham dok peco pere.
Currently Selected:
Cakirok 18: DHOPE
Highlight
Share
Copy
Want to have your highlights saved across all your devices? Sign up or sign in
Dhopadhola DC Bible © Bible Society of Uganda, 2018.
