Cakirok 16

Hagar kodi Isimayil

1Onyo Saray, cipa Abram oyido k'onywol nyithindho. To oyido nitie gi ŋeca ma Jamisir m'ilwoŋo ni Hagar. 2Aka Saray owaco ri Abram ni, “Neni pama, Rwoth ocieran nywol. Raŋo ikibedi gi ŋeca paran? Nyalo bedo ni anyalo limo nyithindho luwo i go.” Aka Abram oyere gi gima Saray owaco. 3Ameno rumacen ma Abram bedo i Kanan ma oro apar, Saray, cipa Abram okwanyo Hagar Jamisir ŋeca pere, aka omiyo Abram paka cege. 4Abram onindo gi Hagar, aka ogamo iye. Munyo Hagar oniaŋ nike yac, ocako noro to cayo Saray.

5Aka Saray owaco ri Abram ni, “Obedo komo perin ka Hagar cayan. An won aŋat'amiyin ŋeca paran; aka cuka go niaŋ ni ogamo iye, oŋiyan gi cay. Weyi Rwoth wothum banja i dier an kodin!”

6To Abram owaco ri Saray ni, “Neni, ŋeca perin nitie i meni perin, tim gi go gim'imito.” Kenyo Saray otero Hagar gi gero to Hagar ringo.

7Malaika pa Rwoth onwaŋo Hagar cegin gi waŋ pi ma mol i thim i yo ma kidho Sur. 8Aka owaco ni, “Hagar ŋeca pa Saray, iwok yukune aka ikidho kune?”

Hagar odwoko ni, “Aringo kwoŋ dhakodwoŋ paran.”

9Malaika pa Rwoth owaco rigo ni, “Gik bongi dhakodwoŋ perin, aka ibedi ŋeca pere. 10Abino miyin nyikwayin kweth m'ongoye ŋata bino nyalo kwano jo. 11Neni, ikidho nywolo wodin, aka ilacwoko nyinge ni Isimayil;#16:11 Isimayil Were winjo rupiri Rwoth owinjo ywak perin i teko. 12To wodin bino bedo paka punda madudi. Go bino gwenyirok gi kisi nyatoro, aka kisi nyatoro bino gwenyirok gi go. Go bino bedo bor gi wade pere.”

13Ameno Hagar olwoŋo Rwoth m'oluwo gi go ni, “Were ma Neno.” Ato go owaco ni, “Adieri aneno Were aka fodi doko akwo rumacen ma neno go!” 14Riameno waŋ pi no olwoŋi ni Berlahayroi#16:14 Berlahayroi Waŋ pi pa ŋata neno aka kwo manitie i dier Kades gi Bered.

15Hagar onywolo ri Abram wode, aka Abram ocwoko nyinge ni Isimayil. 16Abram oyido jaoro piero aboro g'aucel i hongo no.

Currently Selected:

Cakirok 16: DHOPE

Highlight

Copy