Cakirok 12

Were lwoŋo Abram

1 # Tim 7:2,3; Ebu 11:8 Onyo Rwoth owaco ri Abram ni, “Weyi piny perin gi wade perin kodi peco pa benin, aka ikadhi i lowo m'akidho nyuthin. 2Abino miyin nyikwayin kweth, aka jobino lokirok piny madwoŋ. Abino miyin silwany t'aloko nyingin madwoŋ, ŋey ibedi jasilwany. 3#Gal 3:8Abino miyo silwany jono ma jomiyin silwany; t'abino kwoŋo jono ma jokwoŋin. Aka wok kwoŋin piny je bino limo silwany.”

4Ameno Abram okadho paka Rwoth owaco rigo; aka okadho gi Loti. Abram oyido jaoro piero abirio g'abic munyo oeye Haran. 5Abram okadho gi cege Saray, Loti wod p'omin, lim pere je m'oyido jotieko coko kodi ŋecin pere; aka joay kadho i piny Kanan.

Munyo jotundo i Kanan, 6Abram owotho i lowo no aka otundo i Kabedo Maleŋ i Sekem i tiendi yath maleŋ m'ilwoŋo ni More. I hongo no Jokanan oyido fodi jobedo i lowo no. 7#Tim 7:5; Gal 3:16Rwoth omenyere ri Abram aka owaco ni, “Ri nyikwayin, Abino miyo lowo me.” Ameno Abram ogeto kenyo ri Rwoth m'omenyere rigo migam. 8Rumacen okidho yupiny ma piny matendere yuwok ceŋ ma tindi madwoŋ Bethel aka ogero wema pere i dier Bethel yupodho ceŋ kodi Ay yuwok ceŋ. Kenyo go ogeto migam to lamo Rwoth. 9Aka Abram omedere ka kidho yupiny ma Kanan.

Abram i Misir

10Onyo kec oyido nitie i Kanan; aka oyido kec swa ma Abram oloro piny i Misir bedo kenyo ma hongo moro. 11Munyo go cegin donjo Misir, owaco ri cege Saray ni, “Aŋeyo paka ibedo dhako maŋon swa anena; 12aka ka Jomisir jonenin jobino waco ni, ‘Me cege.’ Kenyo jobino nekan, to joweyin makwo. 13#Cak 20:2; 26:7Waci nike ibedo nyamin an; kenyo ro in jokibino nekan aka to joteran maber.” 14Munyo joŋado kew to jodonjo i Misir, Jomisir joneno ni Saray oyido ŋon swa. 15Aka munyo jodhum pa Farawo joneno go, jopako go ri Farawo. Ameno oter go i cel pa kere pere. 16Aka ro Saray, Farawo otero Abram maber to miyo go rombo, diegi, dhok, punde, ŋecin, kodi ŋamia.

17To rupiri Farawo oyido otero Saray, Rwoth odhiro thoyamo madwoŋ kwoŋ Farawo kodi ji pere i cel pa kere. 18Kenyo Farawo olwoŋo Abram aka openjo go ni, “Me aŋo m'itimo ran? Raŋo ikiwaco ran nike go oyido obedo cegin? 19Raŋo iwaco nike go nyamin in t'atero go paka dhako paran? Onyo ee dhako perin, ter go aka kadhi!” 20Aka Farawo omiyo cwo pere cik aka jotero Abram to joketho go woko ma Misir, kanyacel gi cege kodi kisi gim'oyido nitie gine.

Currently Selected:

Cakirok 12: DHOPE

Highlight

Copy