Zekaria 8
8
Rwoth ciko dwoko Yerusalem
1Wac pa Rwoth pa lwak jolweny obino ran ka waco ama: 2Rwoth pa Lak Jolweny waco ama: Amako nyeko ri Zayon gi nyeko madwoŋ, aka gi keme madwoŋ, amako nyeko rigo. 3Me apaka Rwoth waco: Aladwoko i Zayon, aka alabedo i Yerusalem; Ilalwoŋo Yerusalem ni tindi madwoŋ ma genere, aka got pa Rwoth pa lwak jolweny, ilalwoŋo ni, got maleŋ. 4Rwoth pa lwak jolweny waco ama: Jodongo kodi mondongo m'oti jolabedo kam'othangere kendo i Yerusalem, kisi dhano gi luth pere i cinge ma ndelo ma tegino. 5Aka yac kodi nyir jolapoŋ tuko kam'othangere ma tindi madwoŋ.
6Rwoth pa lwak jolweny waco ama: K'obedo gimatek ruwaŋ ji me ma joboth i ndelo me je, bende obedi gimatek ruwaŋan, Rwoth pa lwak jolweny penjo? 7Rwoth pa lwak jolweny waco ama: Neni, acegin botho ji paran wok i piny ma yuwok ceŋ kodi wok i piny ma yupodho ceŋ; 8alakelo jo bedo i Yerusalem, jolabedo ji paran, aka alabedo Were pajo, iy'adieri kodi i tiro.
9Rwoth pa lwak jolweny waco ama: Weyi cingi win wobedi matek, win ma wiwinjo wac m'owok i dhok jotuci wac Were i ndelo me je, wok cuka i ndelo m'ocak'iye misingi ma Ot pa Rwoth pa lwak jolweny, ŋey wonyali geto kendo Ot pa Were. 10Kole mafodi ndelo no je, cul pa dhano kosa ogwaŋ oyido ongoye, aka siem oyido ongoye ri ŋata kadho woko, kosa ri ŋata donjo. Kole awiro kisi dhano kwoŋ nyawote. 11To pama akilatiyo gi joma joboth kwoŋ ji me paka i ndelo macon je, Rwoth pa lwak jolweny waco. 12Kole ilacwoyo kodhi ma siem; vini lanyak olemo mere, lowo lanywolo ranyak, polo lamiyo thoyo pajo, aka alamiyo joma joboth kwoŋ ji me lunjo gigipiny me je. 13Aka paka oyido wibedo lam i dier nonin, Awi ot pa Yuda kodi ot pa Isiraili, ameno alabotho win aka wilabedo silwany. Wikiri wibwoki, to weyi cingi win wobedi matek.
14Kole Rwoth pa lwak jolweny waco ama: Paka acano timo riwin raco, munyo jokwinyo keme paran, aka akiwiro paro paran, Rwoth pa lwak jolweny waco; 15ameno awiro can paran i ndelo me je timo bero ri Yerusalem kodi ot pa Yuda; wikiri wibwoki. 16#Efeso 4:25Me a gigipiny ma wiripo timo, luwo adieri kisi dhano ri nyawote, thum win banja mar'adieri aka siem wobedi i waŋkace mewin. 17Wongoye ŋata wobedi gi can marac i cunye ri nyawote, ongoye maro kwoŋirok ma nono, kole adaki twodo, ngoye pa tiro kodi akaka, Rwoth pa lwak jolweny waco.
18Wac pa Rwoth pa lwak jolweny obino ran ka waco ama: 19Rwoth pa lwak jolweny waco ama: Riyo kec ma dwe mar'aŋwen, ma dwe mar'abic, ma dwe mar'abirio kodi ma dwe mar'apar, lalokere ri ot pa Yuda kisangala kodi kalima m'oyik, bero, adieri, siem, kodi mar.
20Rwoth pa lwak jolweny waco ama: Ji ma tindin madongo kweth jolabino kendo; 21ji ma tindi madwoŋ acel jolakidho bongi man ka jowaco ni, “Weyi wakadhi piyo kwayo ruwaŋ Rwoth, kodi rango Rwoth pa lwak jolweny: An bende alakidho.” 22Ji kweth kodi nonin matek jolabino rango Rwoth pa lwak jolweny i Yerusalem, kodi kwayo ruwaŋ Rwoth. 23Rwoth pa lwak jolweny waco ama: I ndelo no je, cwo apar wok i dhodhok kweth ma nonin jolamako rinda pa Jayuda ka jowaco ni, “Weyi wakadhi kodin, kole watieko winjo nike Were nitie kodin.”
Currently Selected:
Zekaria 8: DHOCDC
Highlight
Share
Copy
Want to have your highlights saved across all your devices? Sign up or sign in
Dhopadhola DC Bible © Bible Society of Uganda, 2018.
